Matteu 27 - Lu Santu Vanghielu di Ghiesù Cristu Secondu Matteiu 1861

CAP. XXVII.

¹ Ghiunta la mane, tutti li principi di li sacerdoti, e li anziani di lu populu tensinu cunsigliu contra Ghiesù, per fallu mora.

² E lu cundussinu ligatu, e lu dedinu a Ponziu Pilatu presidente.

³ Allora Ghiuda, che l’ avia traditu, videndu, ch’ ellu era cundannatu; mossu da lu pentimentu, ripurtò li trenta danari a li principi di li sacerdoti, ed a li anziani,

⁴ Dicendu: Agghiu peccatu, avendu traditu lu sangue ghiustu. Ma elli li dissinu: Cosa ci face? pensaci tu.

⁵ Ed avendu ghittatu li danari in lu tempiu, si ritirò: ed essendusine andatu s’ impiccò cun una funa.

⁶ Ma li principi di li sacerdoti, avendu raccolti li danari, dissinu: Nun è permessu di mettali in la cascia: perchè è lu prezzu di lu sangue.

⁷ Dopu avè tinutu cunsigliu, ne cumpronu lu chiosu d’ un vasaiu, per suppellicci li furasteri.

⁸ E perciò stu chiosu è chiamatu ancu oghi, Haceldama, cioè, lu chiosu di lu sangue.

⁹ Allora si adempì ciò, che è statu scrittu da lu prufeta Ghieremia, che dice: Hannu ricivutu li trenta danari d’ arghientu, che era lu prezzu di quellu, che era statu messu a prezzu, e che avianu cunvinutu cun li figlioli d’ Isdraellu:

¹⁰ E li dedinu per cumprà lu chiosu di lu vasaiu, comu m’ ha prescrittu lu Signore.

¹¹ E Ghiesù fu presentatu a lu presidente, e quessu l’ interrugò, dicendu: Se’ tu lu Re di li Ghiudei? Ghiesù li disse: Tu l’ hai dettu.

¹² E siccome li principi di li sacerdoti, e li anziani l’ accusavanu, ellu nun rispundia nulla.

¹³ Alloru Pilatu li disse: Nun senti quante accuse fannu contra di te?

¹⁴ Ed ellu nun rispose a nissuna parola, ciò che maravigliò assai lu presidente.

¹⁵ Era d’ usu, che in lu ghiornu sulenne lu presidente accurdasse a lu populu la liberazione d’ un prighiuneru, a beneplacitu.

¹⁶ C’ era allora un famosu prighiuneru, che si chiamava Barabba.

¹⁷ Adunque avenduli riuniti, Pilatu li disse: Qual vulete, ch’ eiu vi libereghi? a Barabba, o a Ghiesù, ch’ è dettu lu Cristu?

¹⁸ Sapia, ch’ ell’ era per invidia, che l’ avianu messu in manu.

¹⁹ E comu ellu pusava in lu tribunale, la so moglie lu mandò a prevena, dicendu: Nun ti mischià in nulla di stu ghiustu, perchè agghiu avutu oghi molte visioni a lu so riguardu.

²⁰ Ma li principi di li sacerdoti, e l’ anziani cunvinsinu lu populu di dumandà a Barabba, e di fà mora a Ghiesù.

²¹ E lu presidente li disse: Qual vulete di li dui liberà? Ed elli risposinu: Barabba.

²² Pilatu li disse: Cosa faragghiu dunque di Ghiesù, chiamatu Cristu?

²³ Risposinu tutti: Ch’ ellu sii crucifissatu. Lu presidente disse ad elli: Cosa ha fattu di male? Ma elli gridandu più forte dicianu: Ch’ ellu sii crucifissatu.

²⁴ Pilatu videndu, che niente ci ghiuvava, ma che lu tumultu saria crisciutu: pigliò di l’ acqua, e si lavò le mani davanti a lu populu, dicendu. Eiu so’ innucente di u sangue di stu ghiustu: Voi ci pensarete.

²⁵ E tuttu lu populu rispundendu, disse: Che lu so sangue sii sopra di noi, e sopra li nostri figlioli.

²⁶ Allora li liberò a Barabba: ed avendu fattu flaghiellà a Ghiesù, u dede ad elli per crucifissallu.

²⁷ Allora li suldati di lu presidente avendu cundottu a Ghiesù in lu pretoriu, riuninu intornu ad ellu tutta la coorta:

²⁸ Ed avendulu spugliatu, li missinu un mantellu di scarlatu,

²⁹ Ed avendu fattu una curona di spine, li la posinu sopra lu capu, e li missinu in la manu dritta una canna. E piegandu lu ghinochiu davanti ad ellu, si ne ridianu, dicendu: Ti salutu, o re di li Ghiudei.

³⁰ E sputanduli addossu, li pigliavanu la canna, e li ne minavanu in capu.

³¹ E dopu essasine risi, li caccionu lu mantellu, e lu vistinu di le so’ veste, e lu cundussinu a crucifissà.

³² E come elli surtianu, rincuntronu un omu di Cirene, chiamatu Simone: e l’ ubbligonu a purtà la so croce.

³³ Ed arrivonu in un locu chiamatu Golgota, ciò che vo dì locu di lu Calvariu.

³⁴ E li dedinu a bia di lu vinu mischiatu cun lu fele. Ed avendulu tastatu, nun volse biane.

³⁵ E dopu ch’ elli l’ ebbinu crucifissatu, si spartinu li so’ vistiti, ghiucanduli a la sorte, affin di adempì ciò, che è statu dettu da lu prufeta, che dice: Si so’ spartiti li me’ abiti, ed hannu ghiucatu a la sorte la me vesta.

³⁶ E messisi a pusà li facianu la guardia.

³⁷ E posinu sopra lu so capu in iscrittu la causa di la so cundanna: Questu è Ghiesù re di li Ghiudei.

³⁸ Allora funu crucifissi cun ellu dui latri: unu a dritta, e l’ altru a sinistra.

³⁹ E quelli, che passavanu lu ghiastemavanu scutendu lu capu,

⁴⁰ E dicendu: O eh tu, che disdrugghi u tempiu di Diu, e lu torni a fabbricà in tre ghiorni: salvati te stessu: se tu se’ lu figliolu di Diu, scendi da la croce.

⁴¹ L’ istessa cosa dicianu li principi di li sacerdoti ridendusine cun li Scribi, e l’ anziani:

⁴² Ha salvatu a l’ altri, nun si po salvà ellu stessu: se ellu è re d’ Isdraellu, ch’ ellu scendi da la croce, e cridaremu in ellu:

⁴³ Ha cunfidatu in Diu: ch’ ellu lu libereghi avà, s’ ellu li vo bè: perchè ha dettu: Eiu so’ figliolu di Diu.

⁴⁴ E li latri, ch’ eranu crucifissi cun ellu, li rimpruvaravanu l’ istessa cosa.

⁴⁵ Ma da l’ ora sesta finu a l’ ora nona si fecinu di le tenebre sopra tutta la terra.

⁴⁶ E versu l’ ora nona Ghiesù gridò cun grande voce: Eli, Eli, lamma sabacthani? che vo dì: Diu meiu, Diu meiu, perchè m’ hai abbandunatu?

⁴⁷ Qualchiduni, ch’ eranu culà, sintendulu, dicianu: Quessu chiama ad Alia.

⁴⁸ E subitu unu d’ elli currendu pigliò una spunga, l’ inzuppò d’ acetu, la pose in cima ad una canna, e li dede da bia.

⁴⁹ L’ altri poi dicianu. Lascia fà, che noi vidiamu, se Alia vene a libarallu.

⁵⁰ Ma Ghiesù gridandu ancora cun gran voce, rese lu spiritu.

⁵¹ Ed eccu che lu velu di lu tempiu si spezzò in dui parti da cima in fondu, e la terra tremò, e le petre si spacconu,

⁵² E le tombe s’ aprinu: e molti corpi di santi, che durmianu, risuscitonu.

⁵³ E surtendu da le tombe dopu la so risurrezione, vensinu in la città santa, ed apparinu a molti.

⁵⁴ Ma lu Centurione, e quelli, che cun ellu guardavanu a Ghiesù, avendu vistu lu terramotu e l’ altre cose, che accadianu, ebbinu gran paura, dicendu: Veramente quessu era lu Figliolu di Diu.

⁵⁵ C’ eranu culà un po’ luntanu molte donne, che avianu seguitatu Ghiesù di poi la Galilea, e che l’ avianu assistitu:

⁵⁶ Fra le quali c’ era Maria Matalena, e Maria mamma di Ghiacumu, e di Ghiuseppe, e la mamma di li figlioli di Zebedeiu.

⁵⁷ Ma quandu fu fattu sera, venne un cert’ omu riccu d’ Arimatea, chiamatu Ghiuseppe, che era anche ellu discipulu di Ghiesù.

⁵⁸ Questu andò a truvà a Pilatu, e dumandò lu corpu di Ghiesù. Allora Pilatu urdinò di rendali lu corpu.

⁵⁹ Ed avendu presu lu corpu, Ghiuseppe l’ involse in un linzolu pulitu.

⁶⁰ E lu pose in la so tomba nova, ch’ ellu avia scavatu in un scogliu. E rutulò una gran petra a la porta di la tomba, e poi si n’ andò.

⁶¹ C’ era poi culà Maria Matalena, e l’ altra Maria, che pusavanu dirimpettu a la tomba.

⁶² U ghiornu seguente, ch’ è u ghiornu dopu a Parasceve, li principi di li sacerdoti, e li Farisei andonu da Pilatu,

⁶³ Dicendu: Signore, ci semu ricurdati, che quellu seduttore ha dettu essendu ancora vivu: Dopu tre ghiorni risuscitaragghiu.

⁶⁴ Ordina dunque di guardà lu sepolcru finu a lu terzu ghiornu: di paura che nun venghinu li so’ discipuli, e ch’ elli si l’ arrubbinu, e dichinu poi a lu populu: È risuscitatu da li morti: e saria st’ ultimu errore pegghiu di lu primu.

⁶⁵ Ma Pilatu li disse: Avete le guardie, andate, e guardate come vi pare.

⁶⁶ Ed elli andonu, furtificonu lu sepolcru, e missinu u sighillu a la petra, tinenduvi le guardie.