Matteu 26 - Lu Santu Vanghielu di Ghiesù Cristu Secondu Matteiu 1861

CAP. XXVI.

¹ Ed avendu Ghiesù terminatu tutti sti discorsi, disse a li so’ discipuli:

² Voi sapete, che da qui a dui ghiorni sarà la Pasqua, e lu Figliolu di l’ omu sarà traditu per essa crucifissatu.

³ Allora si riuninu li principi di li sacerdoti, e l’ anziani di lu populu in la casa di lu principe di li sacerdoti, che si chiamava Caifa:

⁴ E si cunsiglionu per piglià a Ghiesù a tradimentu, ed ammazzallu.

⁵ Ma dicianu: Ch’ ellu nun sii in un ghiornu di festa, di paura che nun nasca sussurru in lu populu.

⁶ Ed essendu Ghiesù in Betania in casa di Simone lu leprosu,

⁷ S’ avvicinò ad ellu una donna, che avia un vasu d’ alabastru pienu d’ unguentu priziosu, e li lu bucò sopra lu capu, mentre ch’ ellu pusava a tavula magnandu.

⁸ Ciò, che videndu li discipuli, si sdignonu, dicendu: Per cosa perda sta ropa?

⁹ Ed in fatti si putia venda questu assai caru, e dallu a li povari.

¹⁰ Ma Ghiesù sapendu, ciò ch’ elli dicianu, li disse: Per cosa turmentate sta donna? Ella ha fattu un’ opara bona versu di me.

¹¹ Perchè povari n’ aurete sempre cun voi: ma me nun m’ aurete sempre.

¹² Perchè questa sparghiendu st’ unguentu priziosu sopra a lu me corpu, l’ ha fattu come per suppellimmi.

¹³ Vi dicu in verità, in tutti li lochi, duve sarà predicatu questu vanghielu per tuttu lu mondu, si parlarà di ciò, che ha fattu sta donna per rammentà la so memoria.

¹⁴ Allora unu di li dodici, che si chiamava Ghiuda Iscariota, andò a truvà li principi di li sacerdoti:

¹⁵ E li disse: Cosa mi vulete dà, ed eiu vi lu daragghiu in le mani? Ed elli li prumissinu trenta munete d’ arghientu.

¹⁶ E da quellu mumentu circava l’ uccasione di dallu in manu.

¹⁷ Lu primu ghiornu di li azimi s’ avvicinonu i discipuli a Ghiesù, dicenduli: Duve voi, che ti prepariamu da magnà la Pasqua?

¹⁸ Ghiesù rispose: Andate in la città, e dite ad unu: Lu Maestru dice: Lu me tempu è vicinu, facciu la Pasqua in casa toia cun li me’ discipuli.

¹⁹ E li discipuli fecinu, secondu che l’ avia urdinatu Ghiesù, ed appruntonu la Pasqua.

²⁰ E ghiunta la sera, era a tavula cun li so’ dodici discipuli.

²¹ E mentre ch’ elli magnavanu, disse: Vi dicu in verità, che unu di voi altri m’ ha da tradì.

²² Ed essendu assai afflitti, ugnunu cuminciò a dì: Signore, saragghiu forze eiu?

²³ Ma ellu rispundendu, disse: Quellu, che mette la manu cun me in lu piattu, quellu m’ ha da tradì.

²⁴ Per ciò, ch’ è poi di lu Figliolu di l’ omu, si ne va, secondu ciò, ch’ è scrittu d’ ellu: ma guai a l’ omu, per mezu di lu quale lu Figliolu di l’ omu sarà traditu: saria statu bè per ellu, ch’ ellu nun fusse mai natu.

²⁵ Ma Ghiuda, quellu, che lu tradì, disse: So’ forze eiu, Maestru? Ellu li rispose: Tu l’ hai dettu.

²⁶ E mentre ch’ elli cenavanu, Ghiesù pigliò di lu pane, lu benedì, lu spezzò, e lu dede a li so’ discipuli, e disse: Pigliate, e magnate: questu è lu me corpu.

²⁷ E pigliandu lu calice rese le grazie: e lu dede ad elli, dicendu: Biite di questu tutti.

²⁸ Perchè questu è lu me sangue di lu novu testamentu, che sarà sparsu per molti per la rimissione di li peccati.

²⁹ Vi dicu in verità: Nun biaragghiu più di questu fruttu di la vita fin a quellu ghiornu, che lu biaragghiu novu cun voi in lu regnu di lu me Babbu.

³⁰ Ed avendu cantatu l’ innu, si n’ andonu su lu monte Ulivetu.

³¹ Allora Ghiesù li disse: Voi tutti suffrirete scandalu per me, in questa notte. Perchè è scrittu: Culparagghiu lu pastore, e le pecure di la banda sarannu disperse.

³² Ma quandu risuscitaragghiu, andaragghiu prima di voi in Galilea.

³³ E Petru rispundendu, li disse: Quantunque tutti l’ altri siinu scandalizati per te, eiu nun mi scandalizaragghiu mai.

³⁴ Ghiesù li rispose: Ti dicu in verità, che questa notte, prima di u cantu di u ghiallu, mi rinigarè tre volte.

³⁵ Petru li rispose: Quantunque eiu duvissi mora cun te, nun ti rinigaragghiu. E tutti li discipuli dissinu l’ istessa cosa.

³⁶ Allora Ghiesù andò cun elli in una villa, che si chiamava Ghietsemani, e disse a li so’ discipuli: Fermativi qui, fintantu che vadi in quellu locu, e che preghi.

³⁷ Ed avendu pigliatu a Petru, e a li dui figlioli di Zebedeiu, cuminciò ad affligghiasi ed a essa tristu.

³⁸ Allora li disse: La me anima è afflitta finu a la morte: ristate qui, e vegghiate cun me.

³⁹ Ed essendusi avanzatu un pucarellu, si ghiettò cun la faccia in terra, pregandu, e dicendu: Babbu meiu, se è pussibile, che stu calice sii alluntanatu da me; ma però che nun sii fattu come vogliu eiu, ma come voi tu.

⁴⁰ Ed andò a truvà li so’ discipuli, e li truvò durmendu, e disse a Petru: Cusì nun avete pututu vegghià un’ ora cun me?

⁴¹ Vegghiate, e pregate perchè nun caschiate in tentazione. Lu spiritu è prontu, ma la carne è debule.

⁴² Di novu si n’ andò per la seconda volta, e pregò, dicendu: Babbu meiu, se stu calice nun po passà senza ch’ eiu lu bii, sii fatta la to vuluntà.

⁴³ E venne un’ altra volta, e li truvò durmendu: perchè li so’ ochi eranu aggravati.

⁴⁴ Ed avenduli lasciati, si n’ andò ancora, e pregò per la terza volta, dicendu l’ istesse parole.

⁴⁵ Allora turnò versu li so’ discipuli, e li disse: Durmite pure e ripusativi: eccu s’ è avvicinata l’ ora, e lu Figliolu di l’ omu sarà datu in manu di li peccatori.

⁴⁶ Arrizzativi, andemu: eccu s’ è avvicinatu quellu, che m’ ha da tradì.

⁴⁷ Ellu parlava ancora, quandu arrivò Ghiuda unu di li dodici, e cun ellu una gran quantità di ghiente cun spade e bastoni, mandati da li principi di li sacerdoti, e da l’ anziani di lu populu.

⁴⁸ Ma quellu, che lu tradì, avia datu ad elli stu signale, dicendu: Quellu, ch’ eiu bagiaragghiu, è ellu stessu, arristatilu.

⁴⁹ E subitu essendusi avvicinatu da Ghiesù, disse: Ti salutu, Maestru. E lu bagiò.

⁵⁰ Ma Ghiesù li disse: Amicu, cosa sei ghiuntu a fà? Allora s’ avvicinonu, e missinu le mani sopra Ghiesù, e l’ arristonu.

⁵¹ Ed eccu unu di quelli, ch’ eranu cun Ghiesù, stindendu la so manu, cacciò la spada, e minandu a lu servu di lu principe di li sacerdoti li tagliò l’ arechia.

⁵² Allora Ghiesù li disse: Rimetti la to spada a lu so postu. Perchè tutti quelli, che si servirannu di la spada, murirannu di la spada.

⁵³ Pensi tu, che eiu nun possi pregà u me Babbu, ed ellu mi mandaria più di dodici leghioni d’ agnuli?

⁵⁴ Ma come s’ adempiarianu le Scritture, che vonnu, che sii fattu cusì?

⁵⁵ In quellu mumentu Ghiesù disse a quellu mondu: Sete ghiunti a pigliammi come un latru cun spade e cun bastoni: tutti li ghiorni pusava in mezu a voi insignandu in lu tempiu, e nun m’ avete pigliatu.

⁵⁶ E tuttu questu è statu fattu, perchè si adempischinu le Scritture di li prufeti. Allora tutti li discipuli, avendulu abbandunatu, si ne fughinu.

⁵⁷ Ma quelli, che tinianu Ghiesù, lu cundussinu da Caifa principe di li sacerdoti, induva s’ eranu riuniti li Scribi e l’ anziani.

⁵⁸ E Petru lu seguitava a la longa, insinu a lu curtile di lu principe di li sacerdoti. Ed essendu intratu, si ne pusava cun li servi, per vedane la fine.

⁵⁹ E li principi di li sacerdoti, e tuttu lu cunsigliu circavanu falsi tistimonii contra Ghiesù, per cundannallu a morte:

⁶⁰ E nun ne truvonu, quantunque si fussinu presentati molti falsi tistimonii. A la fine vensinu dui falsi tistimonii,

⁶¹ E dissinu: Questu ha dettu: Possu disdrugghia u tempiu di Diu, e dopu tre ghiorni rifabbricallu.

⁶² Ed alzandusi lu principe di li sacerdoti, li disse: Nun rispondi niente a ciò, che quessi tistimoneghianu contra di te?

⁶³ Ma Ghiesù si tacia. E lu principe di li sacerdoti li disse: Ti scunghiuru per lu Diu vivu di dicci, se tu se’ Cristu figliolu di Diu.

⁶⁴ Ghiesù li rispose: Tu l’ hai dettu. Anzi vi dicu, dopu vidirete lu Figliolu di l’ omu sidendu a la dritta di la virtù di Diu, e vinendu sopra li nivuli di lu celu.

⁶⁵ Allora lu principe di li sacerdoti stracciò lu so vistitu, dicendu: Ha ghiastematu: cosa avemu più bisognu di tistimonii? eccu avà avete intesu la ghiastema.

⁶⁶ Cosa vi ne pare? Ma elli rispundendu dissinu: È reiu di morte.

⁶⁷ Allora li sputonu in faccia, e li minonu pugni addossu: altri li minonu di li ciaffi,

⁶⁸ Dicendu: Cristu, prufetizaci, chi è quellu, che t’ ha minatu?

⁶⁹ Petru poi pusava fora in lu curtile: e s’ avvicinò d’ ellu una serva, dicendu: E tu eri cun Ghiesù lu Galileiu.

⁷⁰ Ma ellu nigò davanti a tutti, dicendu: Nun sò ciò, che tu dici.

⁷¹ Ed essendu surtitu da la porta, lu vidde un’ altra serva, e disse a quelli, ch’ eranu culà: Anche quessu era cun Ghiesù Nazarenu.

⁷² Ed ellu nigò di novu cun ghiuramentu: Eiu nun cunoscu st’ omu.

⁷³ E pocu dopu s’ avvicinonu quelli, ch’ eranu culà, e dissinu a Petru: Veramente tu se’ unu di quelli: perchè u to parlà ti face cunoscia.

⁷⁴ Allora incuminciò a fà di l’ imprecazioni, ed a ghiurà, ch’ ellu nun avia cunusciutu quell’ omu. E subitu lu ghiallu cantò.

⁷⁵ E Petru si ricurdò di le parole di Ghiesù, che avia dettu: Prima che u ghiallu canti, mi rinigarè tre volte. Ed essendu surtitu fora, si misse a piegna amaramente.