Matteu 23 - Lu Santu Vanghielu di Ghiesù Cristu Secondu Matteiu 1861

CAP. XXIII.

¹ Allora Ghiesù parlò a le ghienti, ed a li so’ discipuli,

² Dicendu: Sopra la sede di Musè si so’ messi a pusà li Scribi, e li Farisei.

³ Adunque tuttu quellu, che vi dirannu di fà, usservatilu e fatilu: ma nun seguite lu loru esempiu: perchè dicunu, e nun fannu.

⁴ Ed in fatti levanu carichi pisanti, ed insuppurtabili, e li mettunu su le spalle di l’ omi: ma nun li vonnu mova mancu cun lu ditu.

⁵ Tuttu quellu, che fannu è per essa viduti da l’ omi: e per questu hannu ingrandatu le filatterie, ed allungatu le franghie di le so’ veste.

⁶ Amanu li primi posti in le cene, e le prime sedie nele sinagoghe,

⁷ E d’ essa salutati su la piazza, e d’ essa chiamati da l’ omi maestri.

⁸ Ma voi nun circate a essa chiamati maestri: unu solu è lu vostru Maestru: voi altri sete tutti fratelli.

⁹ E nun chiamate vostru babbu alcunu sopra la terra: perchè unu solu è lu vostru Babbu, ch’ è in li celi.

¹⁰ Nè vi fate chiamà maestri: perchè lu solu vostru Maestru è Cristu.

¹¹ Quellu, che sarà più grande fra voi, sarà lu vostru servu.

¹² Quellu, che si vantarà, sarà umiliatu: e quellu, che si umiliarà, sarà esaltatu.

¹³ Guai a voi, Scribi e Farisei ipocriti: perchè chiudite lu regnu di li celi a l’ omi. Poichè nè c’ intrate voi, nè lasciate intrà quelli, che so’ per intracci.

¹⁴ Guai a voi, Scribi e Farisei ipocriti: perchè vi magnate le case di le veduve cun le vostre longhe urazioni: e per questu sarete ghiudicati cun più rigore.

¹⁵ Guai a voi, Scribi e Farisei ipocriti: perchè currite lu mare e la terra, per fà un pruselitu: e quandu l’ avete fattu, lu fate figliolu di l’ infernu lu doppiu di voi.

¹⁶ Guai a voi, guidi cechi, che dite: Quellu, che ghiura pe lu tempiu, nun è nulla: ma quellu, che ghiura per l’ oru di u tempiu, ferma debitore.

¹⁷ Sciocchi, e cechi: Ma qual si vale di più, l’ oru, o lu tempiu, che santifica l’ oru?

¹⁸ E quellu, che aurà ghiuratu per l’ altare, nun è nulla: ma quellu, che aurà ghiuratu per l’ ufferta, ch’ è sopra l’ altare, quellu è ubbligatu.

¹⁹ Cechi: Qual si vale di più, l’ ufferta, o l’ altare, che santifica l’ ufferta?

²⁰ Quellu dunque, che ghiura per l’ altare, ghiura per ellu, e per tuttu ciò, che c’ è annantu ad ellu.

²¹ E quellu, che ghiura per lu tempiu, ghiura per ellu, e per quellu, che ci abita dentru.

²² E quellu, che ghiura per lu celu, ghiura per lu tronu di Diu, e per quellu, che vi posa annantu.

²³ Guai a voi, Scribi e Farisei ipocriti: che pagate la decima di la menta, di l’ anetu, e di lu cuminu, e che avete trascuratu le cose più impurtanti di la legghie, la ghiustizia, la misericordia, e la fede. Bisognava fà ste cose, e nun trascurà quelle.

²⁴ Guidi cechi, che culate a bivanda per nun inghiotta un muschinu, e poi v’ ingullite un camellu.

²⁵ Guai a voi, Scribi e Farisei ipocriti, perchè lavate a l’ infora u bichiere e u piattu: ma dentru sete pieni di rapina, e d’ immundizie.

²⁶ Fariseiu cecu, netta prima ciò, ch’ è dentru a u bichiere ed a u piattu, affinch’ ellu diventi pulitu ancu a l’ infori.

²⁷ Guai a voi, Scribi e Farisei ipocriti: perchè vi sumigliate a le tombe imbiancate, che sembranu belle a l’ infori, ma che indentru sonu ripiene d’ osse di morti, e d’ ogni purcaria.

²⁸ Cusì sete voi: a l’ infori parete ghiusti a l’ omi: ma dentru sete pieni d’ ipocrisia e d’ iniquità.

²⁹ Guai a voi, Scribi e Farisei ipocriti, che fabbricate li sepolcri di li prufeti, ed imbellite li monumenti di li ghiusti,

³⁰ E dite: Se fussimu stati a li tempi di li nostri babbi, nun l’ auriamu mica aiutati a sparghia lu sangue di li prufeti.

³¹ In stu modu pruvate voi stessi, che sete li figlioli di quelli, che hannu ammazzatu li prufeti.

³² E voi impite pure la misura di li vostri babbi.

³³ Sarpenti razza di vipare, come farete a fugghia da lu ghiudiziu di l’ infernu?

³⁴ Perciò eccu ch’ eiu vi mandu di li prufeti, di li omi savii, di li scribi, e di questi ne ammazzarete, ne crucifissarete, e ne frustarete in le vostre sinagoghe, e li perseguitarete di città in città:

³⁵ Affinchè caschi sopra di voi tuttu lu sangue ghiustu, ch’ è statu sparsu sopra la terra, da poi u sangue d’ Abele u ghiustu finu a u sangue di Zaccaria figliolu di Barachia, che avete ammazzatu tra lu tempiu e l’ altare.

³⁶ Vi dicu in verità, tutte queste cose cascarannu sopra sta ghienerazione.

³⁷ Ghierusalemme, Ghierusalemme, che ammazzi li prufeti, e lapideghi quelli, che ti so’ mandati, quante volte agghiu circatu a riunì li to’ figlioli, come a ghiallina riunisce li so’ piulelli sottu a le so’ ale, e nun hai mai vulsutu?

³⁸ Eccu vi si lasciarà la vostra casa deserta.

³⁹ Perchè vi dicu, nun mi vidrete più, fin tantu che nun diciate: Benedettu quellu, che vene in lu nome di lu Signore.