Matteu 22 - Lu Santu Vanghielu di Ghiesù Cristu Secondu Matteiu 1861

CAP. XXII.

¹ E Ghiesù ricuminciò a parlalli in parabule, dicendu:

² Lu regnu di li celi è simile ad un re, che fece le nozze di lu so figliolu.

³ E mandò li so’ servi a chiamà quelli, ch’ eranu invitati a le nozze, e nun vulianu vena.

⁴ Mandò di novu altri servi, dicendu: Dite a l’ invitati: Eccu agghiu preparatu lu me pranzu, li me’ tori e li me’ animali riservati so’ stati ammazzati, e tutte le cose so’ pronte: vinite a le nozze.

⁵ Ma elli nun ci missinu premura: e si n’ andonu, chi a la so villa, chi a li so’ affari:

⁶ Altri presinu li so’ servi, e dopu avelli carchi di vituperii l’ ammazzonu.

⁷ Quandu lu re intese ste cose, muntò in collara: ed avendu mandatu le so’ armate, fece sdrugghia quelli micidiali, e brugià la loru città.

⁸ Allora disse a li so’ servi: Le nozze eranu pronte, ma quelli, che so’ stati invitati, nun n’ eranu degni.

⁹ Andate dunque a li capi di le strade, e tutti quelli, che truvarete, chiamatili a le nozze.

¹⁰ E li so’ servi essendu surtiti per le strade, riuninu tutti quelli, ch’ elli truvonu, boni e cattivi: e le nozze funu piene di magnatori.

¹¹ Lu re poi intrò per veda quelli, che eranu a tavula, e vidde un omu, che nun avia lu vistitu di le nozze.

¹² E li disse: Amicu, come hai fattu ad intrà qui nun avendu lu vistitu nuziale? Ma quellu restò mutu.

¹³ Allora lu re disse a li so’ ministri: Pigliatilu, e dopu avelli ligatu li pedi e le mani, lampatilu in le tenebre esteriori: culà ci sarà piantu, e stridu di denti.

¹⁴ Perchè molti so’ li chiamati, e pochi so’ li eletti.

¹⁵ Allora li Farisei essendusine andati, si cunsultonu tra di elli per putellu piglià a lingua.

¹⁶ E li mandonu li so’ discipuli cun di l’ Erodiani, dicendu: Maestru, sapemu, che sei veridicu, e che insegni la via di Diu secondu la verità, e che nun hai cura di altru: perchè nun hai riguardu a le persone:

¹⁷ Dicci dunque cosa ti ne sembra, cunvene sì, o no di pagà lu censu a Cesare?

¹⁸ Ma Ghiesù avendu cunusciutu la loru malizia, rispose: Perchè mi tentate, o ipocriti?

¹⁹ Mustratimi la muneta di lu censu. Ed elli li dedinu un danaru.

²⁰ E Ghiesù li disse: Di qual è sta figura, e questu soprascrittu?

²¹ Li risposinu: Di Cesare. Allora disse ad elli: Dunque rindite a Cesare quelle cose, che so’ di Cesare: ed a Diu quelle cose, che so’ di Diu.

²² Ed avendulu intesu si maraviglionu, ed avendulu lasciatu si n’ andonu.

²³ In quellu ghiornu s’ avvicinonu ad ellu li Sadducei, che pretendunu, che nun ci deve essa risurrezione: e l’ interrugonu,

²⁴ Dicendu: Maestru, Musè ha dettu: Se qualchidunu more senza figlioli, che lu so fratellu si pigli la so moglie, per dà discendenza a u fratellu.

²⁵ Ci avianu sette fratelli. Lu primu, dopu avè pigliatu moglie, si ne murì: e nun avendu figlioli, lasciò la so mugliè a lu so fratellu.

²⁶ Fu l’ istessu di lu secondu, di lu terzu, finu a lu settimu.

²⁷ In fine dopu a tutti murì la donna.

²⁸ In la risurrezione, di quale sarà moglie di li sette fratelli? tutti l’ hannu avuta.

²⁹ Ma Ghiesù rispundendu, li disse: Vi sbagliate, perchè nun cunuscite nè le Scritture, nè la virtù di Diu.

³⁰ In la risurrezione nè l’ omi si pigliarannu moglie, nè le donne maritu: ma sarannu come l’ agnuli di Diu in lu celu.

³¹ Nun avete lettu voi ciò, che vi è dettu da Diu sopra la risurrezione di li morti:

³² Eiu so’ lu Diu di Abramu, e lu Diu d’ Isaccu, e lu Diu di Ghiacobbe? Nun è lu Diu di li morti, ma di li vivi.

³³ Ciò che sintendu le ghienti si maravigliavanu di la so duttrina.

³⁴ Ma li Farisei avendu intesu, come ellu avia chiusu la bocca a li Sadducei, si uninu inseme:

³⁵ Ed unu d’ elli, duttore di legghie, l’ interrugò, tentandulu:

³⁶ Maestru, qual è lu gran cumandamentu di la legghie?

³⁷ Ghiesù li rispose: Amarè lu Signore u to Diu di tuttu lu to core, e cun tutta la to anima, e cun tutta la to mente.

³⁸ Questu è lu più grande, e lu primu cumandamentu.

³⁹ Lu secondu poi si sumiglia a quessu: Amarè lu to prossimu, come te stessu.

⁴⁰ In sti dui cumandamenti si riduce tutta la legghie, e li prufeti.

⁴¹ Li Farisei essendusi riuniti, Ghiesù l’ interrugò,

⁴² Dicendu: Cosa vi ne sembra di lu Cristu: di qual è figliolu? Li risposinu: Di Davidde.

⁴³ Ellu li disse: Ma come dunque si fa, che Davidde in spiritu lu chiama Signore, dicendu:

⁴⁴ Lu Signore ha dettu a lu me Signore: Posa a la me dritta, fin tantu ch’ eiu metti li to’ nimici sottu a li to’ pedi per servati di sgambellu?

⁴⁵ Adunque se Davidde lu chiama Signore, come po essa lu so figliolu?

⁴⁶ E nissunu li putia risponda una parola: e nimu di poi quellu ghiornu ardì più interrugallu.