Matteu 21 - Lu Santu Vanghielu di Ghiesù Cristu Secondu Matteiu 1861

CAP. XXI.

¹ Comu si avvicinavanu da Ghierusalemme, e ch’ elli funu in Betfaghie a lu monte d’ Ulivetu: allora Ghiesù mandò dui discipuli,

² Dicenduli: Andate in lu paese, che vi sta di rimpettu, e subitu ci truvarete ligata una sumera cun lu so pulledru: sciuglitila, e purtatimila:

³ E se qualchidunu vi dice qualche cosa, dite, che lu Signore ne ha bisognu: e vi li darannu subitu.

⁴ Tuttu questu è statu fattu per adempì ciò, che fu dettu da lu prufeta, dicendu:

⁵ Dite a la figliola di Sionne: Eccu che lu to re vene a te mansuetu, pusandu sopra una sumera, e u so pulledru figliolu d’ un’ asina da soma.

⁶ Li discipuli essendu andati fecinu ciò, che l’ avia cumandatu Ghiesù.

⁷ E purtonu a sumera, e u pulledru: e missinu sopra d’ elli le so’ veste, e lu fecinu pusà annantu.

⁸ E molta ghiente avia stesu le so’ veste su la strada: altri truncavanu li rami di l’ alberi, e li stindianu pe la strada.

⁹ Le ghienti, che eranu dinnanzi, e quelle, che vinianu daretu, gridavanu, dicendu: Osanna a lu figliolu di Davidde: benedettu quellu, che vene in nome di lu Signore: osanna in lu più altu di li celi.

¹⁰ E quandu ellu fu intratu in Ghierusalemme, tutta la città fu in sussurru, dicendu: Qual è quessu?

¹¹ E li populi dicianu: Questu è Ghiesù prufeta di Nazarette di Galilea.

¹² E Ghiesù intrò in lu tempiu di Diu, e scacciò tutti quelli, che vindianu e cumpravanu in lu tempiu; e ruvesciò le tavule di li marcanti di danari, e le carreghe di quelli, che vindianu le culombe:

¹³ E li disse: È scrittu: La me casa sarà chiamata la casa di la preghera: ma voi ne avete fattu una spilonca di latri.

¹⁴ E s’ avvicinonu ad ellu in lu tempiu di li cechi, e di li zoppi: e li guarì.

¹⁵ Ma li principi di li sacerdoti, e li Scribi, videndu li miraculi, ch’ ellu avia fattu, e li zitelli, che gridavanu in lu tempiu, dicendu: Osanna a lu figliolu di Davidde: ne funu sdignati,

¹⁶ E li dissinu: Senti quellu, che questi dicunu? E Ghiesù li rispose: Sì certamente. Nun avete mai lettu: Che da la bocca di li zitelli e di quelli, che sugghianu hai resu la lode la più perfetta?

¹⁷ Ed avenduli lasciati, si n’ andò fora di la città in Betania: e ci stette.

¹⁸ La mane poi turnandu in città, ebbe fame.

¹⁹ E videndu un pè di ficu vicinu a la strada, ci andò: e nun ci truvò nient’ altru che di le fronde, e li disse: Ch’ ellu nun nasca mai più fruttu da te in sempiternu: e subitu lu pè di ficu si siccò.

²⁰ Ciò che videndu li discipuli, si maraviglionu, dicendu: Come ellu ha siccatu subitu?

²¹ E Ghiesù li disse: Vi dicu in verità, se aurete la fede, e aghirete senza dubbiezza, nun sulamente farete com’ è statu fattu di stu pè di ficu, ma se diciarete a questu monte: Arrizzati, e ghiettati in mare, sarà fattu.

²² E tuttu quellu, che dumandarete in la preghera cun fede, voi lu ricivarete.

²³ E quandu ellu fu ghiuntu in lu tempiu, e ch’ ellu insignava, li principi di li sacerdoti, e l’ anziani di lu populu s’ avvicinonu, dicendu: Cun qual putere fai tu ste cose? E qual è, che t’ ha datu stu putè?

²⁴ Ghiesù li rispose: Vi interrugaragghiu anche eiu sopra una cosa: e se mi rispundete, eiu vi diciaragghiu, cun qual putere facciu ste cose.

²⁵ Lu battesimu di Ghiuvanni d’ unde vinia? da lu celu, o da l’ omi? Ma elli pensavanu tra di sè, dicendu:

²⁶ Se dimu, da lu celu, ellu ci dirà: Adunque perchè nun avete cridutu in ellu? Se a l’ incuntrariu dimu, da l’ omi, avemu da tema lu populu: ed in fatti tuttu lu mondu tinia a Ghiuvanni per prufeta.

²⁷ E rispundendu a Ghiesù, dissinu: Nun sapemu. Ed ellu li disse: Nè mancu eiu vi diragghiu, per qual putere facciu ste cose.

²⁸ Ma che vi ne pare? Un omu avia dui figlioli, ed avvicinandusi a lu primu, li disse: Figliolu, vaitine oghi a lavurà in la me vigna.

²⁹ Ed ellu li rispose: Nun vogliu andacci. Ma dopu, essendusi pentitu, ci andò.

³⁰ Essendusi avvicinatu di l’ altru, disse l’ istessa cosa. Ed ellu rispundendu, li disse: Ci vadu, Signore, e nun ci andò.

³¹ Lu quale di li dui fece la vuluntà di lu babbu? Li risposinu: Lu primu. Ghiesù disse ad elli: In verità vi dicu, che li pubblicani e le puttane andarannu prima che voi in lu regnu di Diu.

³² Ed in fatti è vinutu Ghiuvanni in la strada di la ghiustizia, e nun avete cridutu in ellu. Ma li pubblicani, e le puttane hannu cridutu in ellu: e voi altri sintendu nun vi sete pentiti dopu, per creda in ellu.

³³ Sintite un’ altra parabula: C’ era un babbu di famiglia, che piantò una vigna, la chiuse di sepe, ci misse dentru un torchiu, e vi fabbricò una torre, e la dede in affittu a di li cultivatori, e si ne andò in paese furestere.

³⁴ Quandu fu ghiuntu lu tempu di li frutti, mandò li so’ servitori a li cultivatori, per piglià lu fruttu.

³⁵ Ma li cultivatori, avendu presu li servi, parte ne culpinu, parte n’ ammazzonu, parte ne lapidonu.

³⁶ Mandò di novu altri servi più numerosi che li primi, ed elli li trattonu in l’ istessa manera.

³⁷ Su la fine li mandò lu so figliolu, dicendu: Purtarannu rispettu a lu me figliolu.

³⁸ Ma li travagliatori videndu lu figliolu, dissinu tra di sè: Quessu è l’ erede, vinite, ammazzemulu, ed auremu la so eredità.

³⁹ Ed avendulu pigliatu lu caccionu da la vigna, e l’ ammazzonu.

⁴⁰ Quandu vinirà lu patrone di la vigna, cosa farà a quelli cultivatori?

⁴¹ Li risposinu: Mandarà in malora li cattivi: ed affittarà la so vigna ad altri lavuratori, che li darannu lu so fruttu in lu so tempu.

⁴² Ghiesù li disse: Nun avete mai lettu in le Scritture: La petra, che hannu ributtatu quelli, che fabbricavanu, è stata messa in capu di l’ angulu? Questu è statu fattu da lu Signore, ed è maravigliosu a li nostri ochi?

⁴³ Perciò vi dicu, che lu regnu di Diu vi sarà cacciatu, e sarà datu a lu populu, che farà lu so fruttu.

⁴⁴ E quellu, che cascarà sopra questa petra, sarà rottu a pezzi: e quellu, sopra di lu quale ella cascarà, sarà sbrannatu.

⁴⁵ Ed avendu li principi di li sacerdoti, e li Farisei intesu le so’ parabule, capinu, ch’ ellu vulia parlà d’ elli.

⁴⁶ E circandu di pigliallu, ebbinu paura di lu populu: perchè lu tinianu per prufeta.