Matteu 2 - Lu Santu Vanghielu di Ghiesù Cristu Secondu Matteiu 1861

CAP. II.

¹ Adunque essendu natu Ghiesù in Betlemme di Ghiuda, in tempu che regnava lu re Erode, eccu che i Maghi arrivonu da l’ oriente in Ghierusalemme,

² Dicendu: Duv’ è quellu, ch’ è natu re di li Ghiudei? Avemu vistu la so stella nel’ oriente, e semu ghiunti per adurallu.

³ Sintendu sta cosa lu re Erode, si cunturbò, e cun ellu tutta Ghierusalemme.

⁴ Ed avendu cungregatu tutti i principi di li sacerdoti, ed i Scribi di lu populu, li dumandò, s’ elli sapianu, duve duvia nascia lu Cristu.

⁵ Elli li risposinu: In Betlemme di Ghiuda: perchè cusì è statu scrittu da lu prufeta:

⁶ E tu Betlemme terra di Ghiuda, nun se’ la minima fra i capi di Ghiuda: perchè da te surtirà lu capu, che guvernarà ad Isdraellu lu me populu.

⁷ Allora Erode, avendu chiamatu segretamente i Maghi, s’ infurmò accuratamente da elli, in qual tempu li cumparve la stella:

⁸ E mandanduli in Betlemme, disse: Ite, e circate accuratamente u zitellu: e quandu l’ aurete truvatu, fatimilu sapè, perchè possi andanduci adurallu anch’ eiu.

⁹ Elli dopu avè intesu lu re si n’ andonu. Ed eccu che la stella, che avianu vistu in oriente, marchiava davanti ad elli, fintantu ch’ ella arrivasse sopra di lu locu, duv’ era u zitellu; ed allora si fermò.

¹⁰ Elli videndu a stella si rallegronu di grand’ alligrezza.

¹¹ Ed essendu intrati nela casa, truvonu lu bambinu cun Maria la so mamma, ed essendusi messi inghinuchione l’ aduronu: ed avendu sfasciatu i so’ tesori, li uffrinu i doni, che eranu di l’ oru, di l’ incensu, e di la mirra.

¹² Ed essendu stati avvirtiti in sognu di nun turnà versu Erode, per un’ altra strada si ne andonu a u so paese.

¹³ Come elli si ne funu andati, eccu che l’ agnulu di lu Signore cumparve in sognu a Ghiuseppe, e li disse: Arrizzati, piglia u bambinu, e a so mamma, fugghi in Eghittu, e fermati culà, fintantu che nun t’ avvisi. Perchè Erode ha da circà lu bambinu per fallu mora.

¹⁴ Ed ellu svegliatusi prese lu bambinu, e la so mamma, e di notte tempu si n’ andò in Eghittu.

¹⁵ E vi stette finu a la morte d’ Erode: affinchè s’ adempisse quantu era statu dettu da lu Signore per mezu di lu so prufeta dicendu: Agghiu chiamatu lu me figliolu da l’ Eghittu.

¹⁶ Allora Erode videndusi burlatu da li Maghi, intrò in una gran collara, e mandò ad ammazzà tutti i zitelli, che eranu in Betlemme, ed in tutti li so’ cunfini, da l’ età di dui anni in sottu, d’ appressu quellu, che avia rilevatu da li Maghi.

¹⁷ Allora si adempì quantu fu predettu da lu prufeta Ghieremia, che dice:

¹⁸ S’ è intesu una voce in Rama, ed eranu gran pianti e grandi urli: Rachele piegnendu li so’ figlioli, e nun volse essa cunsulata, perchè nun sonu più.

¹⁹ Essendu mortu Erode, eccu l’ agnulu di lu Signore cumparve in sognu a Ghiuseppe in Eghittu,

²⁰ E li disse: Svegliati, piglia lu zitellu, e la so mamma, e vaitine nela terra d’ Isdraellu: perchè quelli, che vulianu ammazzà u bambinu so’ morti.

²¹ Ed ellu svegliatusi, prese u zitellu, e a mamma, e si ne venne nela terra d’ Isdraellu.

²² Ma avendu intesu, che Archelau regnava in Ghiudea in piazza di lu babbu Erode, ebbe timore d’ andà culà: ed essendu statu avvirtitu in sognu, si n’ andò in Galilea.

²³ Ed essendu ghiuntu in quellu locu, andò ad abità nela città chiamata Nazarette: affinchè s’ adempisse quellu, che è statu predettu da lu prufeta: Ellu sarà chiamatu Nazarenu.