Matteu 19 - Lu Santu Vanghielu di Ghiesù Cristu Secondu Matteiu 1861

CAP. XIX.

¹ E quandu Ghiesù ebbe finitu sti discorsi, si n’ andò da la Galilea a li cunfini di la Ghiudea al di là di lu Ghiurdanu,

² E lu seguitonu molte ghienti, e li guarì culà.

³ E s’ avvicinonu ad ellu i Farisei per tentallu, dicendu: È mica permessu a l’ omu di mandà via la moglie, per una causa qualunque?

⁴ Ed ellu li rispose: Nun avete lettu, che quellu, che ha fattu l’ omu da principiu, li fece masciu e femina? e disse:

⁵ Per questu l’ omu abbandunarà lu babbu, e la mamma, e starà strintu a la so moglie, e sarannu dui in una carne.

⁶ Perciò nun so’ più dui, ma una carne. Adunque che l’ omu nun divida ciò, che Diu ha unitu.

⁷ Li dissinu: Ma per cosa Musè urdinò di dà lu libellu di lu ripudiu, e di dividasi?

⁸ Ellu li disse: Per via di la durezza di lu vostru core Musè vi permisse di mandà via le vostre mogli: ma da principiu nun era cusì.

⁹ Ma eiu vi dicu: Quellu, che mandarà via la moglie, se non per causa d’ adulteriu, e si ne pigliarà un’ altra, cummette un adulteriu: e quellu, che piglia la donna mandata via, cummette un adulteriu.

¹⁰ Allora li so’ discipuli li dissinu: Se quessa è la cundizione di l’ omu cun la donna, nun torna a contu a maritassi.

¹¹ Ellu li disse: Nun capiscunu tutti sta parola, ma sulamente quelli, a li quali è statu datu di capilla.

¹² Perchè ci so’ di l’ eunuchi, che so’ nati cusì da lu corpu di le so’ mamme: ci so’ di l’ eunuchi, che so’ stati fatti da l’ omi: e ci so’ di l’ eunuchi, che si so’ castrati da per elli per guadagnà lu regnu di li celi. Che quellu, che po capì, capisca.

¹³ Allora li funu presentati di li chiucarelli, per ch’ ellu l’ impunisse le mani, e pregasse. E li so’ discipuli li rimpruvaravanu.

¹⁴ Ma Ghiesù li disse: Lasciate in pace li picculi, e nun l’ impedite di vena pressu di me: perchè lu regnu di li celi è a sti tali.

¹⁵ E dopu avelli impostu le mani, si n’ andò da culà.

¹⁶ Ed eccu che unu avvicinandusi, li disse: Bon Maestru, cosa putragghiu fà di bè per avè la vita eterna?

¹⁷ Ellu li disse: Per cosa m’ interrugheghi su lu bè? Unu solu è bonu, Iddiu. Se poi tu voi intrà in la vita, usserva li cumandamenti.

¹⁸ E quali so’, disse quellu? Ghiesù rispose: Nun farè umicidiu: Nun farè adulteriu: Nun farè latruciniu: Nun farè lu falsu tistimoniu:

¹⁹ Unora lu to babbu, e la to mamma, e teni caru lu to prossimu come te stessu.

²⁰ Lu ghiuvinottu li disse: Agghiu fattu tutte ste cose fin da la me ghiuventù: cosa mi tocca ancora da fà?

²¹ Ghiesù li disse: Se tu voi essa perfettu, vai, vendi quellu, che tu hai, e dallu a li povari, ed aurè un tesoru in lu celu: e veni, e seguiteghiami.

²² Quandu lu ghiuvanottu intese ste parole, si n’ andò tuttu tristu: perchè pussidia molti beni.

²³ E Ghiesù disse a li so’ discipuli: Vi dicu in verità, un riccu intrarà difficilmente in lu regnu di li celi.

²⁴ E vi tornu a dì: È più facile ad un camellu di passà per la cruna d’ un agu, che ad un riccu d’ intrà in lu regnu di li celi.

²⁵ E li discipuli sintendu ste cose, si maravigliavanu assai, dicendu: Qual è quellu, che si putrà salvà?

²⁶ E Ghiesù guardanduli, li disse: Pressu di l’ omi è impussibile: ma pressu di Diu tutte le cose so’ pussibili.

²⁷ Allora Petru rispundendu, li disse: Eccu, noi avemu lasciatu tuttu, e ti avemu seguitatu: cosa sarà dunque di noi?

²⁸ E Ghiesù disse ad elli: Vi dicu in verità, voi, che mi avete seguitatu, nela righienerazione, quandu lu Figliolu di l’ omu pusarà sopra lu tronu di la so maiestà, pusarete anche voi sopra dodici sedi, ghiudicandu li dodici tribù d’ Isdraellu.

²⁹ E quellu, che lasciarà la so casa, o li so’ fratelli, o le surelle, o lu babbu, o la mamma, o la moglie, o li figlioli, o li so’ chiosi per lu me nome, ricivarà centu volte di più, e pussidirà la vita eterna.

³⁰ E molti di li primi sarannu ultimi, e molti ultimi sarannu primi.