Matteu 18 - Lu Santu Vanghielu di Ghiesù Cristu Secondu Matteiu 1861

CAP. XVIII.

¹ In quellu mumentu s’ avvicinonu li discipuli a Ghiesù, e li dissinu: Qual pensi, che sii lu più grande in lu regnu di li celi?

² E Ghiesù chiamandu un zitellu, lu pose a mezu ad elli,

³ E disse: Vi dicu in verità, se nun vi cunvertite, e nun turnate come li zitelli, nun intrarete in lu regnu di li celi.

⁴ Quellu, che si farà chiucu come stu zitellu, quellu sarà lu più magghiò in lu regnu di li celi.

⁵ E quellu, che accugliarà un zitellu come quessu in nome meiu, accoglie a me stessu.

⁶ Ma quellu, che scandalizarà unu di sti chiucarelli, che credunu in me, li cunvene megliu, ch’ ellu s’ appendi a lu collu una macina da sumere, e ch’ ellu si ghietti in lu prufondu di lu mare.

⁷ Guai a lu mondu per causa di li scandali. È necessariu, che ci siinu di li scandali; ma guai a l’ omu, per colpa di lu quale arriva lu scandalu.

⁸ Se la to manu, o lu to pede ti dannu scandalu: tagliali, e ghiettali luntanu da te: è megliu per te intrà in la vita debule, o sciancu, che d’ avè le dui mani, e li dui pedi per essa poi ghittatu in lu focu eternu.

⁹ E se lu to ochiu ti scandaliza, cacciatilu, e ghiettalu luntanu da te: è megliu per te d’ intrà in la vita cun un ochiu solu, che d’ avè dui ochi, e d’ essa ghittatu in lu focu di l’ infernu.

¹⁰ Badate di nun sprezzà unu di sti chiuchi: perchè vi dicu, che li so’ agnuli in li celi vedunu sempre la faccia di u me Babbu, ch’ è in li celi.

¹¹ Ed in fatti lu Figliolu di l’ omu è ghiuntu per salvà ciò, ch’ era perdutu.

¹² Che vi ne pare? Se unu, che ha centu pecure ne smarrisce una: nun lasciarà ellu li nuantanove sopra lu monte, per andà a circà quella, che s’ è persa?

¹³ E se l’ accade di ritruvalla: vi dicu in verità, si rallegrarà più sopra di quessa, che sopra li nuantanove, che nun si eranu smarrite.

¹⁴ Cusì è la vuluntà di lu vostru Babbu, ch’ è in li celi, che nun si perdi unu di sti chiucarelli.

¹⁵ Se lu to fratellu ti ha mancatu, vai e curreghilu a solu a solu. S’ ellu ti sta a senta, aurè guadantu lu to fratellu.

¹⁶ Ma se ellu nun ti sta a senta, porta cun te unu, o dui, perchè tutti li detti si passinu fra dui, o tre tistimonii.

¹⁷ Ma se ellu nun ne face contu, dillu a la ghiesa. E s’ ellu nun sta a senta mancu la ghiesa, che ellu sii per te come un ghientile, e un pubblicanu.

¹⁸ Vi dicu in verità, tutte le cose, che ligarete sopra la terra, sarannu ligate in lu celu: e tutte quelle, che sciugliarete sopra la terra, sarannu sciolte in lu celu.

¹⁹ Vi dicu ancora, che se dui di voi altri cascanu d’ accordu per dumandà una cosa qualunque, lu me Babbu, che è in lu celu li l’ accurdarà.

²⁰ Perchè, induva dui, o tre so’ riuniti in nome meiu, culà eiu mi trovu in mezu ad elli.

²¹ Allora Petru essendusi avvicinatu, li disse: Signore, quante volte putragghiu perdunà l’ uffesa di lu me fratellu? finu a sette volte?

²² Ghiesù li rispose: Nun ti dicu finu a sette: ma finu a sittanta volte sette.

²³ Perciò lu regnu di li celi si assumiglia ad un re, che volse fà conti cun li so’ servitori.

²⁴ E quandu ellu principiava a fà conti, li ne presentonu unu, che li duvia decimila talenti.

²⁵ Ma siccome ellu nun avia di che pagà, lu so patrone cumandò, ch’ ellu fusse vindutu cun la moglie, e li figlioli, e tuttu ciò, ch’ ellu avia, per putè essa pagatu.

²⁶ Ma u servitore ghinuchione a li so’ pedi, u pregava dicendu: Abbi pacenza, ed eiu ti pagaragghiu tuttu.

²⁷ E lu patrone avendu pietà d’ ellu, lu mandò via, scaricandulu di lu debitu.

²⁸ Ed essendu surtitu lu servitore, truvò unu di li so’ cumpagni, che li duvia centu danari: e pigliatulu pe a gola u strangulava dicendu: Rendi ciò, che tu devi.

²⁹ E lu cumpagnu ghinuchione a li so’ pedi, lu pregava, dicendu: Abbi pacenza, e ti rindaragghiu ciò, che ti devu.

³⁰ Ma ellu nun volse accunsenta: ed andò a fallu metta in prighiò, fintantu ch’ ellu nun avesse pagatu lu so debitu.

³¹ Ma li so’ cumpagni avendu vistu sti fatti, si ne afflissinu assai: e andonu a raccuntà a lu patrone tutti li fatti, ch’ eranu accaduti.

³² Allora lu patrone lu mandò a chiamà: e li disse: Servu indegnu, t’ agghiu perdunatu tuttu lu to debitu, perchè mi n’ hai pregatu:

³³ Nun duvii tu avè pietà di lu to cumpagnu, come eiu avia avutu pietà di te?

³⁴ E sdignatu u patrone lu misse in manu a li boia, fin tantu ch’ ellu nun avesse pagatu tuttu lu so debitu.

³⁵ Cusì lu me Babbu celeste farà a voi, se nun perdunate ugnunu di core a lu vostru fratellu.