Matteu 17 - Lu Santu Vanghielu di Ghiesù Cristu Secondu Matteiu 1861

CAP. XVII.

¹ E dopu sei ghiorni Ghiesù pigliò a Petru, a Ghiacumu, e a lu so fratellu Ghiuvanni, e li cundusse sopra a d’ un monte assai altu e in disparte:

² E fu trasfiguratu davanti ad elli. E la so faccia lucia come lu sole: e le so’ veste vensinu bianche come la neve.

³ Ed eccu che li cumparinu Musè ed Alia, che discurrianu cun ellu.

⁴ Allora Petru si misse a parlà, e disse a Ghiesù: Signore, ci fa pro di stà qui: se tu voi faremu tre tende, una per te, una per Musè, e una per Alia.

⁵ Ellu parlava ancora, quandu un nivulu lucente li cuprì. Ed eccu che di stu nivulu surtì una voce, dicendu: Questu è lu me Figliolu caru, in lu quale mi so’ cumpiaciutu: statilu a senta.

⁶ E sintendu questu li discipuli casconu faccia in terra, ed ebbinu una gran paura.

⁷ Ma Ghiesù essendusi avvicinatu, li tuccò: e li disse: Arrizzativi, e nun timete nulla.

⁸ Ed avendu alzatu l’ ochi, nun viddinu nissunu, se non che Ghiesù solu.

⁹ E come elli scindianu da lu monte, Ghiesù li cumandò, dicendu: Nun direte a nimu sta visione, fintantu che lu Figliolu di l’ omu nun sii risuscitatu da li morti.

¹⁰ E li so’ discipuli l’ interrugonu, dicendu: Cosa vo dì, che li Scribi diciunu, che biscgna prima, che venghi Alia?

¹¹ Ma ellu rispundendu, li disse: In fatti Alia ha da vena, e ristabilirà tutte le cose.

¹² Ma vi dicu in verità, Alia è ghià vinutu, e nun l’ hannu cunusciutu, ma l’ hannu fattu tuttu ciò, ch’ hannu vulsutu. Ed in l’ istessa manera sarà trattatu da elli lu Figliolu di l’ omu.

¹³ Allora li discipuli capinu, ch’ ellu l’ avia parlatu di Ghiuvanni Battista.

¹⁴ Ed essendu ghiuntu, induva c’ era una gran quantità di ghiente, li s’ avvicinò un omu, che lampandusi ghinuchione dinnanzi ad ellu, li disse: Signore, abbi pietà di lu me figliolu, perchè è lunaticu, e soffre assai: di le volte casca in lu focu, e di le volte in l’ acqua.

¹⁵ E l’ agghiu presentatu a li to’ discipuli, e nun hannu pututu guarillu.

¹⁶ Ma Ghiesù rispundendu, disse: O ghienerazione incredula e perversa, fin quandu staragghiu in mezu a voi altri? fin quandu vi suffriragghiu? Purtatilumi qui.

¹⁷ E Ghiesù lu sgridacciò, e lu dimoniu si n’ andò di dentru ad ellu, e da quellu mumentu lu zitellu fu sanu.

¹⁸ Allora li discipuli s’ avvicinonu in secretu a Ghiesù, e li dissinu: Per cosa noi nun avemu pututu scacciallu?

¹⁹ Ghiesù li rispose: Per causa di la vostra incredulità. Vi dicu in verità, se voi aurete la fede, quantu un granellu di senapa, diciarete a stu monte: Trapassa da culà a qui, ed ellu trapassarà, e niente vi sarà impussibile.

²⁰ Ma questa sorte di dimonii nun si scaccia che cun l’ urazione, e lu dighiunu.

²¹ E mentre ch’ elli eranu in Galilea e si la discurrianu, Ghiesù li disse: U Figliolu di l’ omu sarà messu in le mani di l’ omi:

²² E l’ ammazzarannu, e u terzu ghiornu risuscitarà. E ne funu grandamente afflitti.

²³ Ed essendu ghiunti in Cafarnau, s’ avvicinonu a Petru, quelli che percipianu li dui drammi, e li dissinu: Lu vostru Maestru nun paga mica li dui drammi?

²⁴ Ellu rispose: Sì, li paga. Ed essendu intratu in casa, Ghiesù lu prevenne, dicendu: Cosa ti ne pare, o Simò? I re di la terra, da quali ricevunu lu tributu, o lu censu? da li so’ figlioli, o da li furasteri?

²⁵ Ed ellu rispose: Da li furasteri. E Ghiesù li disse: Dunque li so’ figlioli ne sonu libari.

²⁶ Ma perchè noi nun li scandalizighiamu, vaitine a lu mare, e lampa l’ ambu: e piglia lu primu pesce, che verrà. Apertuli la bocca truvarè un statere: lu pigliarè, e cun quellu pagarè per te, e per me.