Matteu 16 - Lu Santu Vanghielu di Ghiesù Cristu Secondu Matteiu 1861

CAP. XVI.

¹ E s’ avvicinonu ad ellu li Farisei, e li Sadducei per tentallu: e lu pregonu, ch’ ellu li facesse veda un miraculu da lu celu.

² Ma ellu rispundendu, li disse: Quandu è ghiunta la sera, dite: Farà bellu tempu, perchè u celu è russicciu.

³ E la mane: Oghi ci sarà tempesta, perchè u celu è cupertu, ed è rossu.

⁴ Avete dunque imparatu a cunoscia la faccia di lu celu: e nun putete cunoscia li segni di li tempi? La ghienerazione cattiva e adultera dumanda un miraculu: e nun li si darà altru miraculu, che lu miraculu di lu prufeta Ghiona. Ed avenduli lasciati, si n’ andò.

⁵ E li so’ discipuli essendu ghiunti al di là di lu lagu, s’ eranu scurdati di piglia di lu pane.

⁶ Ghiesù li disse: Fate attenzione, e guardatevi da lu levitu di li Farisei e di li Sadducei.

⁷ Ed elli pensavanu tra di sè, e dicianu: Perchè nun avemu pigliatu di lu pane.

⁸ Ma Ghiesù cunuscendu li so’ penseri, disse: Cosa pensate tra di voi, ghiente di poca fede, perchè nun avete pane?

⁹ Nun avete ancora capitu, e nun vi ricurdate di li cinque pani per li cinquemila omi, e quanti cufini vi ne ristò?

¹⁰ Nè di li sette pani per quattrumila omi, e quante sporte ne cugliste?

¹¹ Per cosa nun avete capitu, che nun era di lu pane, ch’ eiu parlava, dicenduvi: Guardatevi da lu levitu di li Farisei, e di li Sadducei?

¹² Allora capinu, ch’ ellu nun dicia, che si duvianu guardà da lu levitu di li pani di li Farisei e Sadducei, ma da la loru duttrina.

¹³ Ghiesù venne poi da le parti di Cesarea di Filippu: ed interrugava li so’ discipuli, dicendu: Qual diciunu l’ omi, che sii lu Figliolu di l’ omu?

¹⁴ Ed elli li risposinu: Qualchiduni diciunu, che sii Ghiuvanni Battista, altri Alia, altri Ghieremia, ed ancora unu di li prufeti.

¹⁵ Ghiesù li disse. E voi altri, qual dite voi, ch’ eiu sii?

¹⁶ Simon Petru rispundendu, disse: Tu sei lu Cristu, figliolu di Diu vivu.

¹⁷ Rispundendu Ghiesù li disse: Beatu te, Simon Bar‐Jona: perchè nun è nè la carne, nè lu sangue, che t’ ha rivelatu sta cosa, ma lu me Babbu, ch’ è in li celi.

¹⁸ Ed eiu ti dicu, che tu se’ Petru, e sopra di sta petra eiu piantaragghiu la me ghiesa, e le porte di l’ infernu nun aurannu putè contra d’ ella.

¹⁹ Ed eiu ti daragghiu le chiave di lu regnu di li celi. E tuttu ciò, che tu ligarè sopra la terra, sarà ligatu in li celi: e tuttu ciò, che tu sciugliarè sopra la terra, sarà scioltu in li celi.

²⁰ Allora raccumandò a li so’ discipuli, ch’ elli nun dicissinu a nimu, ch’ ellu era Ghiesù Cristu.

²¹ Da quellu mumentu Ghiesù incuminciò a spiegà a li so’ discipuli, come era necessariu, ch’ ellu andasse in Ghierusalemme, e culà soffra assai da la parte di li anziani, e di li Scribi, e di li principi di li sacerdoti, essa ammazzatu, e risuscità lu terzu ghiornu.

²² E Petru avendulu presu in disparte, cuminciò a rimpruvarallu dicendu: Diu ti ne guardi, Signore: nun ti sarà fattu cusì.

²³ Ma ellu vultandusi, disse a Petru: Ritirati da me, satanassu, mi se’ di scandalu: perchè nun cunosci le cose, che so’ di Diu, ma quelle, che so’ di l’ omi.

²⁴ Allora Ghiesù disse a li so’ discipuli: Se qualchidunu vo vena daretu a me, ch’ ellu rinunci a sè stessu, ch’ ellu pigli la so croce, e ch’ ellu mi seguiteghi.

²⁵ Quellu, che vurrà salvà la so anima, la perdarà: ma quellu, che aurà persu la so anima per causa di me, la truvarà.

²⁶ Ed in fatti cosa ghiova a l’ omu, s’ ellu guadagna tuttu l’ universu, e ch’ ellu perdi la so anima? O cosa po dà l’ omu in cambiu di la so anima?

²⁷ Perchè lu Figliolu di l’ omu ha da vena in la gloria di lu so Babbu cun li so’ agnuli: e allora rindarà ad ugnunu secondu le so’ opere.

²⁸ Vi dicu in verità, ci n’ è di quelli, che so’ qui, che nun murirannu, prima di veda lu Figliolu di l’ omu intrà in lu so regnu.