Matteu 15 - Lu Santu Vanghielu di Ghiesù Cristu Secondu Matteiu 1861

CAP. XV.

¹ Allora li si avvicinonu di li Scribi, e di li Farisei ghiunti da Ghierusalemme, dicendu:

² Perchè li to’ discipuli nun usservanu la tradizione di li vecchi? in fatti nun si lavanu le mani prima di magnà u pane.

³ Ma ellu rispundendu li disse: Perchè voi altri nun usservate u cumandamentu di Diu per causa di la vostra tradizione? Ed in fattu Diu ha dettu:

⁴ Unora lu to babbu e la to mamma, ed ancora: Quellu, che malediciarà lu babbu, o la mamma, sarà punitu di morte.

⁵ Ma voi altri dite: Quellu, che diciarà a lu babbu, o a la mamma: Qualunque ufferta fatta da me a Diu, ti deve prufittà:

⁶ Pocu preme, ch’ ellu tenghi in unore lu so babbu, o la so mamma: ed avete resu vanu lu cumandamentu di Diu per mezu di la vostra tradizione.

⁷ Ipocriti, prufetizò bè di voi altri Isaia, quandu ellu disse:

⁸ Questu populu mi unora cun la bocca: ma lu so core è luntanu da me.

⁹ Mi unoranu inutilmente, quandu elli insegnanu la duttrina e li cumandamenti di l’ omi.

¹⁰ Ed avendu fattu riunì le ghienti, li disse: Sintite, e capite.

¹¹ Nun è quellu, che entre in la bocca, che imbrutta l’ omu: ma quellu, che sorte di la bocca, imbrutta l’ omu.

¹² Allora li so’ discipuli avvicinandusi, li dissinu: Sai tu, che li Farisei si so’ scandalizati di ciò, ch’ hai dettu?

¹³ Ma ellu li rispose: Ogni pianta, che nun piantò lu me Babbu celeste, sarà sradicata.

¹⁴ Lasciatili fà: so’ cechi, e cunducunu li cechi. E se un cecu serve di guida ad un cecu, tutti dui cascanu in la fossa.

¹⁵ E Petru rispundendu, li disse: Spiegaci sta parabula.

¹⁶ Ma ellu li rispose: Sete anche voi altri senza intellettu?

¹⁷ Nun capite, che tuttu quellu, ch’ entre in la bocca, fala in lu corpu, e dopu è ghittatu in un locu segretu?

¹⁸ Ma le cose, che sortunu di la bocca, vengunu da lu core: e so’ quelle, che imbruttanu l’ omu:

¹⁹ Ed in fatti da lu core vengunu li cattivi penseri, l’ omicidii, l’ adulterii, le furnicazioni, li latrucinii, le falze tistimonianze, le ghiasteme.

²⁰ So’ queste cose, che imbruttanu l’ omu. Ma di magnà senza avè le mani lavate, nun imbrutta l’ omu.

²¹ Ed essendu surtitu da quellu locu, Ghiesù si ritirò da la parte di Tiru e di Sidone.

²² Ed eccu una donna cananea, che surtendu da quelli cuntorni gridò, dicenduli: Abbi pietà di me, Signore, figliolu di Davidde: la me figliola è malamente turmentata da lu dimoniu.

²³ Ma Ghiesù nun li rispose una parola. E li so’ discipuli essendusi avvicinati lu pregavanu dicendu: Spicciala: perchè ci grida a daretu.

²⁴ Ma ellu li rispose: Nun so’ mandatu che per salvà le pecure di la casa d’ Isdraellu, che si so’ perdute.

²⁵ E la donna venne, e l’ adurò, dicendu: Signore, aiutami.

²⁶ Ed ellu rispundendu disse: Nun è bè di piglià lu pane di li figlioli, e di dallu a li cani.

²⁷ Ed ella disse: Sì, Signore: ma anche li catelli magnanu li rugiuli, che cascanu di la tola di li patroni.

²⁸ Allora Ghiesù rispundendu, li disse: O donna, la to fede è grande: che ti sii fattu come tu voi. E da quellu mumentu fu sanata la so figliola.

²⁹ E Ghiesù essendusine andatu da quellu locu, s’ avvicinò a lu mare di Galilea: ed essendu cullatu sopra d’ un monte, si ne pusava culà.

³⁰ E s’ avvicinonu ad ellu molte ghienti, avendu cun elli di li muti, di li cechi, di li zoppi, di li debuli, ed assai altri: e li ghittonu a li so’ pedi, ed ellu li guarì:

³¹ Di modu che le ghienti si maravigliavanu videndu li muti parlà, li zoppi marchià, li cechi veda: e glurificavanu lu Diu d’ Isdraellu.

³² E Ghiesù, avendu chiamatu li so’ discipuli, li disse: Agghiu pietà di tutte ste ghienti, perchè da poi tre ghiorni so’ cun me, e nun hannu di che magnà: e nun li vogliu rinvià dighiuni, perch’ elli nun si svenghinu per la strada.

³³ E li so’ discipuli li risposinu: Duva truvaremu noi in stu locu desertu abbastanza pane, per sazià tanta ghiente?

³⁴ E Ghiesù li disse: Quant’ avete pani? Ed elli li risposinu: Sette pani, e pochi pisciuletti.

³⁵ Ed urdinò a la ghiente di mettasi a pusà in terra.

³⁶ E pigliandu li sette pani, e li pesci, ed avendu resu le grazie, li spezzò, e li dede a li so’ discipuli, e li discipuli li dedinu a lu populu.

³⁷ E magnonu tutti, e funu saziati. E di li pezzi, che ristonu in soprapiù, ne purtonu via sette sporte pie ne.

³⁸ Quelli, che magnonu eranu quattrumila omi, senza li zitelli e le donne.

³⁹ Ed avendu licenziatu la ghiente, si ne cullò sopra d’ una barca: e si ne venne su li cunfini di Maghiedan.