Matteu 12 - Lu Santu Vanghielu di Ghiesù Cristu Secondu Matteiu 1861

CAP. XII.

¹ In quellu tempu Ghiesù passò un ghiornu di sabatu per un chiosu pienu di granu: e li so’ discipuli, che avianu fame, cumincionu a strappà di le spiche, ed a magnanne.

² Ciò che videndu li Farisei, li dissinu: Eccu li to’ discipuli fannu ciò, che nun è permessu di fà lu sabatu.

³ Ma ellu li rispose: Nun avete lettu ciò, che fece Davidde, quandu ellu ebbe fame, e quelli, che eranu cun ellu:

⁴ Comu ellu intrò in la casa di Diu, e magnò li pani di la proposizione, ciò che nun era permessu nè ad ellu, nè a quelli, che eranu cun ellu, ma sulamente a li sacerdoti?

⁵ O nun avete lettu in la legghie, che li sacerdoti rompunu lu sabatu in lu tempiu, e per quessu nun fannu delittu?

⁶ Ma eiu vi dicu, che qui c’ è unu più magghiò che lu tempiu.

⁷ Ma se voi sapessite cosa vo dì: Amo la misericordia, e non lu sagrifiziu: nun auriste mai cundannatu l’ innucenti:

⁸ Perchè lu Figliolu di l’ omu è patrone anche di lu sabatu.

⁹ Ed essendusine partitu da culà, andò in la loru sinagoga.

¹⁰ Ed eccu che si presenta un omu avendu una manu secca, ed elli l’ interrugavanu, dicendu: È mica permessu di guarì lu sabatu? e lu facianu per putellu accusà.

¹¹ Ma ellu li rispose: Qual è l’ omu tra voi altri, che avendu una pecura, se sta pecura casca in una fossa in un ghiornu di sabatu, nun la pigli, e la cacci fora?

¹² Di quant’ è migliore un omu d’ una pecura? Dunque è permessu di fà bè lu sabatu.

¹³ Allora disse a l’ omu: Stendi la to manu. Ed ellu la stese, e turnò sana come l’ altra.

¹⁴ Ma li Farisei surtendu, si cunsigliavanu contra ellu, per sapè come fà per perdalu.

¹⁵ E Ghiesù sapendulu, si n’ andò da culà: e molti lu seguitonu, e li guarì tutti:

¹⁶ E li raccumandò di nun fallu sapè.

¹⁷ Affinchè fusse adempiutu ciò, ch’ è dettu da lu prufeta Isaia, dicendu:

¹⁸ Eccu lu me servu, che agghiu sceltu, u me caru, in lu quale si cumpiace l’ anima mia. Ponaragghiu u me spiritu sopra ad ellu, ed ellu annunziarà a ghiustizia a le nazioni.

¹⁹ Nun litigarà, nun gridarà, e nissunu sintirà la so voce su le piazze:

²⁰ Nun rumparà la canna dighià rotta, nun smuccarà u stuppinu fumante, fintantu che nun dia vittoria a la ghiustizia:

²¹ E le ghienti sperarannu in lu so nome.

²² Allora li presentonu unu, che avia in corpu lu dimoniu, ch’ era cecu e mutu, e lu guarì di modu, che vidia, e parlava.

²³ E si stupianu tutte le ghienti, e dicianu: Nun è quessu lu figliolu di Davidde?

²⁴ Ma li Farisei sintendu quessu, dissinu: Questu nun scaccia li dimonii, che per mezzu di Belzebù principe di li dimonii.

²⁵ Ma Ghiesù sapendu ciò, ch’ elli pensavanu, li disse: Ogni regnu, ch’ è divisu in partiti, si n’ andarà in ruina: ed ogni città, od ogni casa divisa tra di sè, nun po sussista.

²⁶ E se satanassu scaccia a satanassu, si trova allora in guerra cun sè stessu: ed allora come putirà sussista lu so regnu?

²⁷ E se eiu scacciu li dimonii per mezu di Belzebù, per qual mezu li scaccianu li vostri figlioli? E perciò elli stessi sarannu li vostri ghiudici.

²⁸ Se in cuntrariu eiu scacciu li dimonii per mezu di lu spiritu di Diu, vo dì, ch’ è ghiuntu a mezu a voi lu regnu di Diu.

²⁹ Ma come putirà mai unu intrà in la casa d’ un omu di stomacu, e rubballi la so ropa, se prima nun l’ ha ligatu? Allora putirà metta a saccu a so casa.

³⁰ Quellu, che nun è cun me, è contra di me: e quellu, che nun raccoglie cun me, dissipeghia.

³¹ Perciò vi dicu: Ogni peccatu, e ghiastema sarà perdunata a l’ omi: ma la ghiastema contra lu Spiritu santu nun sarà perdunata.

³² Ed a quellu, che aurà dettu parola contra u Figliolu di l’ omu, li sarà perdunata: ma quellu, che aurà sparlatu contra lu Spiritu santu, nun li sarà perdunatu nè in questu mondu, nè in l’ altru.

³³ O dite, che l’ alberu è bonu, e lu so fruttu è bonu: o dite, che l’ alberu è cattivu, e lu so fruttu è cattivu: perchè l’ alberu si cunosce a lu so fruttu.

³⁴ Razza di vipare, come putete voi parlà bè, quandu sete maligni? La bocca nun parla, che secondu lu core.

³⁵ L’ omu bonu ricaccia di lu bè da lu tesoru bonu: e l’ omu cattivu ricaccia lu male da lu tesoru cattivu.

³⁶ Vi dicu in verità: L’ omi, che aurannu parlatu parole oziose sarannu ubbligati di rendane contu in lu ghiornu di lu ghiudiziu.

³⁷ Ed in fatti sarè ghiustificatu per le to’ parole, e sarè cundannatu per le to’ parole.

³⁸ Allora li risposinu alcuni di li Scribi e di li Farisei, dicendu: Maestru, vurriamu da te veda qualche miraculu.

³⁹ Ed ellu rispundendu li disse: La ghienerazione cattiva, e adultera dumanda lu miraculu: e nun li si farà miraculu, se non quellu di lu prufeta Ghiona.

⁴⁰ Siccome Ghiona ristò in lu ventre di la balena tre ghiorni, e tre notti, cusì lu Figliolu di l’ omu ristarà tre ghiorni, e tre notti in lu senu di la terra.

⁴¹ L’ omi di Niniva s’ arrizzarannu in lu ghiornu di lu ghiudiziu contra sta ghienerazione, e la cundannarannu: perchè elli fecinu penitenza, quandu predicò Ghiona. Ed eccu c’ è qui unu, che è più che Ghiona.

⁴² La reghina di lu mezughiornu s’ arrizzarà contra sta ghienerazione in lu ghiornu di lu ghiudiziu, e la cundannarà: perchè ella ghiunse da li cunfini di la terra per senta la sapienza di Salumone, ed eccu c’ è qui unu, ch’ è più che Salumone.

⁴³ Quandu lu spiritu impuru è surtitu da lu corpu d’ un omu, percorre li lochi deserti, circandu lu riposu, e nun lu trova.

⁴⁴ Allora dice: Turnaragghiu in la me casa, da duve so’ surtitu. Ed arrivandu la trova biota, spazzata di scope, e urnata.

⁴⁵ Allora va, e si piglia sette altri spiriti più maligni d’ ellu, ed intrandu in quellu omu ci stannu, e l’ ultimu statu di quell’ omu è assai pegghiu di lu primu. Succedarà cusì a sta pessima ghienerazione.

⁴⁶ Mentre ch’ ellu parlava cusì a la ghiente, eccu la so mamma, e li so’ fratelli, che stavanu fora, che dumandavanu a parlà cun essu.

⁴⁷ Allora unu li disse: C’ è la to mamma, e li to’ fratelli fora, che ti cercanu.

⁴⁸ Ed ellu rispose a quellu, che li parlava: Qual è la me mamma, e qual so’ li me’ fratelli?

⁴⁹ E stindendu la so manu versu li so’ discipuli, disse: Eccu la me mamma, e li me’ fratelli.

⁵⁰ Perchè quellu, che farà la vuluntà di lu me Babbu, ch’ è in li celi: quellu è lu me fratellu, la me sorella, la me mamma.