Titus 2 - Yn Conaant Noa 1810

CAB. II

¹ Agh loayr uss ny reddyn ta cordail rish ynsagh slayntoil:

² Dy bee ny shenn gheiney fudagh, soccaragh, sheelt, fondagh ’sy chredjue, ayns giastyllys, ayns meenid:

³ Ny shenn vraane myrgeddin, dy bee ad dy ymmyrkey‐bea crauee, cha nee scammyltee, ny cur rour saynt da feeyn, soilshaghey sampleyr mie;

⁴ Gynsaghey ny mraane saa dy ve sheelt, dy ve graihagh er nyn sheshaghyn poost, dy choyrt graih da nyn gloan,

⁵ Dy ve tastagh, glen‐aignagh, freayll ec y thie, dy ve dooie, biallagh da ny sheshaghyn oc hene, nagh bee goo Yee loayrit dy olk jeh.

⁶ Coyrlee ny deiney aegey myrgeddin dy ve sheelt‐aignagh.

⁷ Ayns dy chooilley nhee jeeaghyn oo hene sampleyr dy obbraghyn mie: ayns ynsagh soilshaghey magh firrinys y chredjue, craueeaght, ynrickys,

⁸ Glare breeoil nagh vod ve loayrit n’oï; dy vod eshyn ta shassoo magh nearey ’ghoaill, gyn veg yn olk echey dy choyrt gys nyn lieh.

⁹ Coyrlee sharvaantyn dy ve biallagh da nyn mainshteryn hene, as dy wooiys ad dy mie ayns dy chooilley nhee; cha nee perkin‐nagh,

¹⁰ Cha nee myngyragh, agh soilshaghey slane jeidjys firrinagh; dy vod ad soiaghey magh ynsagh Yee nyn Saualtagh ayns dy chooilley nhee.

¹¹ Son ta grayse Yee er ny hoilshaghey, ta chebbal saualtys da dy chooilley ghooinney.

¹² Gynsaghey dooin, liorish, gobbal mee‐chraueeaght as yeearreeyn seihlltagh, dy lhisagh shin beaghey dy sheelt, dy cairal, as dy crauee ayns y theihll shoh;

¹³ Farkiagh son y treishteil bannit shen, as cheet gloyroil yn Jee mooar, as nyn Saualtagh Yeesey Creest:

¹⁴ Hug eh hene er nyn son, dy voddagh eh shin y eaysley veih dy chooilley vee‐chraueeaght, as casherickey da hene pobble reiht, jeean ayns obbraghyn mie.

¹⁵ Ny reddyn shoh jean uss loayrt as coyrlaghey, as cur oghsan lesh slane ’torrity. Ny lhig da dooinney erbee beg y hoiaghey jeed.