Romanee 7 - Yn Conaant Noa 1810

CAB. VII

¹ Nagh vel shiu toiggal, vraaraghyn, son (ta mee loayrt roosyn ta toiggal y leigh) kys dy vel pooar ec y leigh harrish dooinney, choud as t’eh bio?

² Son ta’n ven ta sheshey eck, kianlt liorish y leigh da’n sheshey eck choud as t’eh bio: agh my ta’n sheshey marroo t’ee feayshlit voish leigh yn sheshey eck.

³ Myr shen eisht my vees ee, choud as ta’n sheshey eck bio, poost rish dooinney elley, bee ee kyndagh jeh brishey‐poosey: agh my ta’n sheshey eck marroo, t’ee feayshlit veih’n leigh shen; myr shen cha vel ee brishey‐poosey, ga dy bee ee poost rish dooinney elley.

⁴ Shen‐y‐fa, my vraaraghyn, ta shiuish myrgeddin marroo gys y leigh liorish corp Chreest; dy voddagh shiu ve poost rish fer elley, dy jarroo rishyn ta troggit veih ny merriu, dy voddagh shin mess y ymmyrkey magh da Jee.

⁵ Son tra va shin ayns yn eill, ren yeearreeyn peccoil va liorish y leigh, gobbraghey ayns nyn oltyn dy ymmyrkey magh mess gys baase.

⁶ Agh nish ta shin livreit veih’n leigh, marroo gys shen fo va shin freilt; dy voddagh shin shirveish ayns spyrryd noa, as cha nee ayns y chenn letter.

⁷ Cre jir mayd eisht? vel y leigh peccah? ny lhig eh Jee. Dy jarroo, cha row fys er ve aym cre va peccah, agh liorish y leigh: son cha row fys er ve aym cre va saynt, er‐be dy dooyrt y leigh, Cha der oo saynt.

⁸ Agh peccah goaill vondeish liorish yn anney, ren gobbraghey aynym dy chooilley haynt. Son fegooish y leigh ta peccah marroo.

⁹ Son va mish dy jarroo bio un cheayrt fegooish y leigh; agh tra haink yn anney, vio‐ee peccah, as va mish marroo.

¹⁰ As yn anney v’er ny oardaghey son bioys, hooar mee dy ve baase.

¹¹ Son peccah goaill vondeish liorish yn anney, ren m’y volley, as liorish ren eh m’y varroo.

¹² Myr shen ta’n leigh casherick; as ta’n anney casherick, as cairagh, as mie.

¹³ Vel shen eisht va mie, er jeet dy ve baase dou? Ny lhig eh Jee. Agh peccah, dy voddagh eh ve soilshit dy ve peccah, gobbraghey baase aynym’s liorish shen ta mie; dy voddagh peccah liorish yn anney cheet dy ve erskyn towse peccoil.

¹⁴ Son ta fys ain dy vel y leigh spyrrydoil: agh ta mish callinagh creckit fo peccah.

¹⁵ Son ny ta mee jannoo, cha vel mee lowal jeh: son shen ny baillym, cha vel mee jannoo; agh ny ta dwoaie aym er, shen ta mee jannoo.

¹⁶ My ta mish eisht jannoo shen nagh baillym, ta mee goaill‐rish y leigh, dy vel eh mie.

¹⁷ Nish eisht, cha nee mee hene ta ny sodjey dy yannoo eh, agh peccah ta baghey aynym.

¹⁸ Son ta fys aym, nagh vel aynym’s, (ta shen, ayns m’eill) red erbee mie cummal: son ta my aigney arryltagh, agh dy yannoo shen ta mie, cha vel eh cheet lhiam.

¹⁹ Son y vie shen baillym, cha vel mee jannoo: agh yn olk nagh naillym, shen ta mee jannoo.

²⁰ Nish my ta mee jannoo shen nagh naillym, cha nee ny smoo mish ta dy yannoo eh, agh peccah ta baghey aynym.

²¹ Ta mee feddyn leigh eisht, tra baillym mie y yannoo, dy vel olk goll mârym.

²² Son ta taitnys aym ayns leigh Yee, cordail rish y dooinney er cheu‐sthie.

²³ Agh ta mee gennaghtyn leigh elley ayns my oltyn, caggey noi leigh my aigney, as dy my hayrn fo bondiaght gys y leigh dy pheccah, t’ayns my oltyn.

²⁴ O s’treih’n dooinney mee! quoi nee my livrey veih corp y vaase shoh!

²⁵ Ta mee cur booise da Jee, trooid Yeesey Creest nyn Jiarn. Myr shen eisht, ta mish mee‐hene lesh m’aigney shirveish leigh Yee; agh lesh yn eill, leigh peccah.