Romanee 6 - Yn Conaant Noa 1810

CAB. VI

¹ Cre jir mayd eisht? jean mayd tannaghtyn ayns peccah, dy vod grayse bishaghey?

² Ny lhig eh Jee: kys oddys shinyn ta marroo gys peccah, beaghey ny sodjey ayn?

³ Nagh vel fys eu, dy row whilleen j’inyn as va er nyn mashtey ayns Yeesey Creest, er nyn mashtey gys y baase echey?

⁴ Shen‐y‐fa ta shin oanluckit mârishyn liorish bashtey gys baase; ’naght myr va Creest troggit seose veih ny merriu liorish gloyr yn Ayr, dy jarroo myr shen lhisagh shin myrgeddin gimmeeaght ayns bea noa.

⁵ Son my ta shin er ve soit cooidjagh ayns co‐chaslys e vaase, bee mayd myrgeddin ayns co‐chaslys yn irree‐seose‐reesht echey:

⁶ Toiggal shoh, dy vel y chenn ghooinney ain er ny chrossey mârish, dy voddagh corp peccah ve er ny stroie, nagh jinnagh shin ny sodjey peccah y hirveish.

⁷ Son eshyn ta marroo, t’eh seyr veih peccah.

⁸ Nish my ta shin marroo mârish Creest, ta shin credjal dy bee mayd myrgeddin bio marish:

⁹ Toiggal, nagh vel Creest, myr t’eh er n’irree veih ny merriu, dy gheddyn baase arragh; cha vel pooar erbee sodjey ec y vaase harrish.

¹⁰ Son liorish dy dooar eh baase, hooar eh baase gys peccah un cheayrt: agh liorish dy vel eh bio, t’eh bio gys Jee.

¹¹ Ayns yn aght cheddin jeeagh‐jee shiuish neesht erriu hene dy ve marroo dy jarroo gys peccah; agh bio gys Jee, trooid Yeesey Creest nyn Jiarn.

¹² Ny lhig da peccah er‐y‐fa shen reill ayns nyn girp marvaanagh, dy jinnagh shiu eh y hirveish ayns ny yeearreeyn eck.

¹³ Chamoo livrey‐jee seose nyn oltyn myr greinyn dy neuchairys gys peccah: agh livrey‐jee shiu hene seose gys Jee, myr adsyn ta bio veih ny merriu; as nyn oltyn myr greinyn dy chairys gys Jee.

¹⁴ Son cha bee pooar ec peccah harrishdiu: son cha vel shiu fo’n leigh, agh fo grayse.

¹⁵ Cre eisht? der mayd rish peccah, er‐yn‐oyr nagh vel shin fo’n leigh, agh fo grayse? ny lhig eh Jee.

¹⁶ Nagh vel fys eu, da quoi‐erbee ta shiu kiangley shiu hene sharvaantyn dy chur biallys, ny sharvaantyn echeysyn ta shiu da ta shiu coyrt biallys; edyr jeh peccah gys baase, ny jeh biallys gys cairys?

¹⁷ Agh booise dy row gys Jee, son wheesh as dy row shiu roïe sharvaantyn peccah; dy vel shiu nish er choyrt biallys veih’n chree da’n cummey dy ynsagh v’er ny livrey diu.

¹⁸ Er nyn seyrey eisht veih peccah, haink shiu dy ve sharvaantyn dy chairys.

¹⁹ Ta mee loayrt lurg cliaghtey deiney, er coontey annooinid yn eill eu: son ’naght myr ta shiu er livrey seose ny oltyn eu dy ve sharvaantyn gys neu‐ghlennid, as veih mee‐chairys gys mee‐chairys; myr shen jean‐jee nish livrey seose ny oltyn eu sharvaantyn dy ynrickys, gys casherickys.

²⁰ Son tra va shiu nyn sharvaantyn dy pheccah, va shiu fegooish ynrickys.

²¹ Cre’n mess v’eu eisht ayns ny reddyn shen jeu ta shiu nish goaill nearey? son ta jerrey ny reddyn shen baase.

²² Agh nish myr ta shiu er nyn seyrey veih peccah, as er jeet dy ve nyn sharvaantyn dy Yee, ta eu nyn mess gys casherickys, as y jerrey echey yn vea dy bragh farraghtyn.

²³ Son she faill peccah yn baase: agh she gioot Yee yn vea dy bragh beayn, trooid Yeesey Creest nyn Jiarn.