Romanee 5 - Yn Conaant Noa 1810

CAB. V

¹ Shen‐y‐fa er nyn seyrey liorish credjue, ta shee ain rish Jee, trooid nyn Jiarn Yeesey Creest,

² Liorishyn myrgeddin ta shin goit stiagh liorish credjue gys y ghrayse shoh ayn ta shin shassoo, as ta shin goaill boggey ayns treishteil dy ghloyr Yee.

³ As cha nee ynrycan shen, agh ta shin goaill boggey ayns seaghyn myrgeddin, toiggal dy vel seaghyn gobbraghey meenid;

⁴ As meenid, prowal; as prowal treishteil:

⁵ As cha vel treishteil jannoo shin lhag‐chreeagh, er‐y‐fa dy vel graih Yee deayrtit magh ayns nyn greeaghyn, liorish yn Spyrryd Noo t’er ny choyrt dooin.

⁶ Son choud as va shin foast annoon, ayns traa cooie duillee Creest baase son ny mee‐chrauee.

⁷ Son s’coan son dooinney cairagh ragh fer dy baase: ga son dooinney mie yinnagh paart eer baase y hurranse.

⁸ Agh ta Jee soilshaghey magh e ghraih hooinyn, choud as va shin foast nyn beccee, hur Creest baase er nyn son.

⁹ Foddey smoo eisht, myr ta shin nish er nyn seyrey liorish e uill, bee mayd er nyn sauail voish jymmoose ny hrooidsyn.

¹⁰ Son choud as va shin ayns stayd dy noidys, my va shin coardit rish Jee liorish baase e Vac: foddey smoo, myr ta shin nish goit stiagh gys shee, vees mayd er nyn sauail liorish e vioys.

¹¹ As cha nee ynrycan shen, agh ta shin goaill boggey ayns Jee, trooid nyn Jiarn Yeesey Creest, liorishyn ta shin nish er n’gheddyn y choardail.

¹² Shen‐y‐fa, myr liorish un dooinney haink peccah stiagh ’sy theihll, as baase, liorish peccah; as myr shen jimmee’n baase er dy chooilley ghooinney, son dy vel ooilley er n’yannoo peccah.

¹³ Son derrey’n leigh, va peccah ’sy theihll; agh cha row peccah er ny choyrt gys lieh dooinney raad nagh row leigh erbee.

¹⁴ Ny‐yeih ren baase reill veih Adam derrey Moses, dy jarroo harroosyn nagh row er n’yannoo peccah lurg sampleyr loght Adam, va co‐chaslys jehsyn va dy heet.

¹⁵ Agh cha nee myr ta’n loght, myr shen neesht ta’n gioot arryltagh. Son my she shen kyndagh rish peccah un er, dy daink baase er ymmodee; foddey smoo ta grayse Yee, as y gioot trooid grayse, ta liorish un dooinney Yeesey Creest, er roshtyn er ymmodee.

¹⁶ As cha nee myr ve liorish un dooinney ren peccah, myr shen ta’n gioot: son va’n vriwnys liorish unnane gys kerraghey; agh ta’n gioot arryltagh gys seyrsnys veih ymmodee peccaghyn.

¹⁷ Son my she liorish peccah un dooinney, ta baase reill trooid un er; foddey smoo nee adsyn t’er gheddyn slane towse dy ghrayse, as jeh’n ghioot dy chairys, reill ayns bea liorish un er, Yeesey Creest.

¹⁸ Shen‐y‐fa myr liorish peccah un er, haink briwnys er dy chooilley ghooinney gys deyrey: myr shen myrgeddin liorish cairys fer, haink yn gioot arryltagh er dy chooilley ghooinney dy heyrey ad gys bea.

¹⁹ Son myr liorish mee‐viallys un dooinney va ymmodee jeant nyn beccee: myr shen myrgeddin liorish biallys un er, bee ymmodee jeant cairagh.

²⁰ Agh haink y leigh stiagh, dy voddagh loght ve ny s’cronnal: agh raad vishee peccah, ren grayse bishaghey foddey smoo:

²¹ ’Naght myr ta peccah er reill gys baase, eer myr shen dy voddagh grayse reill trooid cairys gys y vea ta dy bragh farraghtyn, liorish Yeesey Creest nyn Jiarn.