Romanee 4 - Yn Conaant Noa 1810

CAB. IV

¹ Cre jir mayd eisht dy vel Abraham nyn Ayr er chosney liorish leigh ny foalley?

² Son my va Abraham er ny heyrey liorish obbraghyn, ta oyr echey dy voggyssagh, agh cha nee fenish Yee.

³ Son cre ta’n scriptyr dy ghra? Ren Abraham Jee y chredjal as ve er ny choyrt gys e lieh son cairys.

⁴ Nish dasyn ta gobbraghey, cha vel y leagh coontit myr foayr, agh myr cair.

⁵ Agh dasyn nagh vel gobbraghey, agh credjal ersyn ta seyrey ny mee‐chrauee, ta e chredjue er ny choyrt gys e lieh son cairys.

⁶ Eer myr ta David myrgeddin soiaghey magh stayd bannit y dooinney ny lieh ta Jee cur cairys fegooish obbraghyn,

⁷ Gra, Bannit t’eshyn ta e neu‐chairys er ny leih da, as e pheccah er ny choodaghey.

⁸ Bannit ta’n dooinney nagh vel y Chiarn cur peccah ny lieh.

⁹ Vel y bannaght shoh eisht cheet er y ghiarey‐chymmylt ny lomarcan, ny er yn an‐ghiarey‐chymmylt myrgeddin? Son ta shin gra dy row soiagh er ny yannoo jeh credjue Abraham son cairys.

¹⁰ Kys eisht va soiagh ey ny yannoo jeh? nee lurg da v’er ny ghiarey‐chymmylt, ny roish da v’er ny ghiarey chymmylt? cha nee lurg da v’er ny ghiarey‐chymmylt, agh roish my row eh er ny ghiarey‐chymmylt.

¹¹ As hooar eh yn cowrey dy ghiarey‐chymmylt, myr seal jeh cairys y chredjue va echey roish hie giarey‐chymmylt er; dy voddagh eh ve yn ayr ocsyn ooilley ta credjal, ga nagh vel ad er nyn ghiarey‐chymmylt; dy voddagh cairys ve er ny choyrt gys y lieh ocsyn myrgeddin:

¹² As ayr jeh giarey‐chymmylt dauesyn nagh vel jeh’n ghiarey‐chymmylt ny lomarcan, agh dauesyn myrgeddin ta gimmeeaght ayns kesmadyn y chredjue shen va ec yn ayr ain Abraham roish my row eh er ny ghiarey‐chymmylt.

¹³ Son y gialdyn dy beagh eh eirey’n seihll, cha row eh jeant da Abraham, ny da e luight liorish y leigh, agh liorish cairys credjue.

¹⁴ Son my she adsyn ta jeh’n leigh ta eiraghyn, ta credjue gyn veg y vree, as y gialdyn gyn ymmyd erbee.

¹⁵ Son ta’n leigh gobbraghey jymmoose: son raad nagh vel leigh, cha vod eh ve er ny vrishey.

¹⁶ Shen‐y‐fa te jeh credjue, dy voddagh eh ve jeh foayr; dy voddagh y gialdyn ve shickyr da ooilley’n sluight, cha nee dauesyn ny lomacan ta fo’n leigh, agh dauesyn myrgeddin ta jeh credjue Abraham, ta’n ayr ain ooilley.

¹⁷ (Myr te scruit, Ta mee er dty yannoo ayr ymmodee ashoonyn) cordail rishyn er ren eh credjal, dy jarroo Jee, ta bioghey ny merriu, as geamagh er ny reddyn shen nagh vel, myr dy beagh ad hannah ayn:

¹⁸ Quoi noi treishteil ren credjal ayns treishteil, dy voddagh eh cheet dy ve ayr ymmodee ashoonyn; cordail rish shen ny v’er ny loayrt, Shen myr vees dty luight.

¹⁹ As myr nagh row eh faase‐chredjuagh, cha ren eh soiaghey jeh [annooinid] e chorp hene nish gyn mioyr, tra v’eh mysh keead bleïn dy eash, ny foast jeh merriuid brein Sara.

²⁰ Cha row eh dooyteilagh mychione gialdyn Yee trooid mee‐chredjue, agh v’eh niartal ayns credjue, coyrt gloyr da Jee:

²¹ Ayns slane treishteil, cre‐erbee v’eh er ghialdyn, dy row eh abyl myrgeddin dy chooilleeney.

²² As shen‐y‐fa ve er ny choyrt ny lieh son cairys.

²³ Nish cha row eh scruit er y ghraih echeysyn ny lomarcan, dy row shoh currit ny lieh;

²⁴ Agh er y choontey ainyn myrgeddin, gys nyn lieh vees eh er ny choyrt, my ta shin credjal ersyn hrog seose Yeesey nyn Jiarn veih ny merriu,

²⁵ Eh va er ny livrey son nyn loghtyn, as va troggit reesht dy heyrey shin.