Romanee 3 - Yn Conaant Noa 1810

CAB. III

¹ Cre’n vondeish eisht t’ec yn Ew? ny cre’n cosney ta liorish giarey‐chymmylt?

² Mooarane er dy chooilley aght: hoshiaght, son dy nee dauesyn v’er ny livrey goo Yee.

³ Son cre mannagh ren paart credjal? jean y mee‐chredjue ocsyn firrinys Yee y choyrt naardey?

⁴ Ny lhig eh Jee: dy jarroo, lhig da Jee ve firrinagh, as dy chooilley ghooinney ny vreagerey; myr te scruit, Dy voddagh oo v’er dty heyrey ayns dty raa, as ynrick tra t’ou briwnys.

⁵ Agh myr ta’n neu‐ynrickys ainyn soilshaghey magh ynrickys Yee, cre jir mayd? Vel Jee neu‐chairagh ta goaill kerraghey? (ta mee loayrt myr dooinney)

⁶ Ny lhig eh Jee: son kys eisht nee Jee yn seihll y vriwnys?

⁷ Son my ta firrinys Yee (jir ad) er vishaghey ny smoo trooid y neu ynrickys aym’s gys y ghloyr echeysyn: cre’n‐fa foast ta mish myrgeddin er my vriwnys myr peccagh?

⁸ Agh cha nee (myr ta shin er nyn oltooan, as myr ta paart liassaghey dy vel shin gra,) Lhig dooin olk y yannoo, dy vod mie cheet jeh? ta’n deyrey oc cairagh.

⁹ Cre eisht? vel shinyn ny share na adsyn? Cha vel er aght erbee: son ta shin roïe er phrowal dy vel chammah Ewnyn as Ashoonee, ooilley fo peccah;

¹⁰ Myr te scruit, Cha vel fer erbee cairagh, cha vel unnane:

¹¹ Cha vel fer erbee ta toiggal, cha vel fer erbee ta shirrey lurg Jee.

¹² T’ad ooilley er n’gholl ass y raad, t’ad ooilley dyn ymmyd: cha vel fer hene ta jannoo dy mie, cha vel unnane.

¹³ Ta’n scoarnagh oc oaie foshlit; lesh nyn jengey t’ad er chliaghtey molteyrys; ta pyshoon ard‐nieughyn fo nyn meillyn:

¹⁴ Ta’n beeal oc lane dy ghweeaghyn as dy herriuid:

¹⁵ Ta ny cassyn oc gastey dy gheayrtey fuill.

¹⁶ Ta toyrt‐mow as treihys ayns nyn raaidyn:

¹⁷ As raad y chee cha bione daue.

¹⁸ Cha vel aggle Yee edyr roish nyn sooillyn.

¹⁹ Nish ta fys ain cre‐erbee ta’n leigh dy ghra, te dy ghra roosyn ta fo’n leigh: dy vod dagh beeal ve ny host, as dy vod ooilley’n seihll ve oolee fenish Yee.

²⁰ Shen‐y‐fa liorish obbraghyn y leigh cha bee dooinney erbee er ny heyrey ayns e hilley: son liorish y leigh ta toiggal ain jeh peccah.

²¹ Son nish ta cairys Yee fegooish y leigh er ny hoilshaghey, myr ta’n leigh as ny phadeyryn gymmyrkey feanish lesh;

²² Dy jarroo cairys Yee, ta liorish credjue Yeesey Creest, dauesyn ooilley, as orroosyn ooilley ta credjal; son cha vel liettrimys erbee:

²³ Son ta ooilley er n’yannoo peccah, as er jeet giare jeh gloyr Yee.

²⁴ Dy nastee jeant seyr liorish e ghrayse, trooid y livrey‐ys ta ayns Yeesey Creest:

²⁵ Eh ta Jee er chiarail dy ve ny lhiassaghey, trooid credjue ayns e uill, dy hoilshaghey magh e chairys son leih peccaghyn t’er n’gholl shaghey, trooid meenid Yee:

²⁶ Dy hoilshaghey magh, ta mee gra, ec y traa‐shoh e chairys: dy voddagh eh ve cairagh, as eshyn y heyrey ta credjal ayns Yeesey.

²⁷ Cre vel boggys eisht? te giarit magh. Liorish cre’n leigh? nee jeh obbraghyn? Cha nee: agh liorish y leigh dy chredjue.

²⁸ Shen‐y‐fa ta shin briwnys, dy vel dooinney er ny heyrey liorish credjue fegooish obbraghyn y leigh.

²⁹ Vel eshyn Jee ny Hewnyn ny lomarcan? nagh vel eh myrgeddin [Jee] ny Hashoonee? S’feer jeh ny Ashoonee myrgeddin.

³⁰ Fakin dy nee yn un Jee cheddin, nee seyrey yn giarey‐chymmylt liorish credjue, as yn an‐ghiarey‐chymmylt trooid credjue.

³¹ Vel shin eisht rassey yn leigh trooid credjue? ny lhig eh Jee: dy jarroo firrinagh, ta shin niartaghey’n leigh.