Romanee 2 - Yn Conaant Noa 1810

CAB. II

¹ Shen‐y‐fa t’ou fegooish leshtal, O ghooinney, quoi‐erbee oo hene ta briwnys: son ayns ny t’ou briwnys fer elley, t’ou deyrey oo hene; son uss ta briwnys, t’ou jannoo ny reddyn cheddin.

² Agh ta fys ain dy vel briwnys Yee cordail rish yn irriney, n’oï adsyn ta cur rish lheid ny reddyn.

³ As vel oo smooinaghtyn shoh, O ghooinney, ta briwnys adsyn ta jannoo lheid ny reddyn, as oo hene cur rish ny reddyn cheddin, dy scaap oo briwnys Yee?

⁴ Ny vel oo soiaghey beg jeh berchys e vieys, as e veenid, as surranse‐foddey, gyn toiggal dy vel mieys Yee dy dty leeideil gys arrys?

⁵ Agh cordail rish creoghys dty chree vee‐arryssagh, t’ou stoyral seose dhyt hene jymmoose cour laa’n yymmoose, as tra vees briwnys cairagh Yee er ny hoilshaghey;

⁶ Nee cooilleeney dy chooilley ghooinney cordail rish e obbraghyn:

⁷ Dauesyn, liorish tannaghtyn dy meen ayns jannoo mie, ta shirrey son gloyr, as ooashley, as flaunys; yn vea dy bragh farraghtyn:

⁸ Agh dauesyn ta anveagh, as nagh vel coyrt biallys da’n irriney, agh geiyrt da neu‐ynrickys; jymmoose as corree;

⁹ Seaghyn as angaish er dy chooilley annym ta gobbraghey olk, er yn Ew hoshiaght, as myrgeddin er yn Ashoonagh.

¹⁰ Agh gloyr, ooashley, as shee, da dy chooilley ghooinney ta gobbraghey mie, da’n Ew hoshiaght, as myrgeddin da’n Ashoonagh.

¹¹ Son cha vel Jee jannoo soiaghey jeh persoonyn.

¹² Son bee whilleen as t’er n’yannoo peccah fegooish leigh, er nyn gheyrey neesht fegooish y leigh: as bee whilleen as t’er n’yannoo peccah fo’n leigh, er nyn mriwnys liorish y leigh,

¹³ (Son cha nee adsyn ta clashtyn y leigh ta seyr fenish Yee, agh jeantee yn leigh vees er ny heyrey.

¹⁴ Son tra ta ny Ashoonee nagh vel y leigh oc, jannoo liorish dooghys ny reddyn t’ayns y leigh t’ad shoh nagh vel y leigh oc, ny leigh daue hene:

¹⁵ Ta soilshaghey obbyr y leigh scruit ayns nyn greeaghyn, nyn gooinsheanseyn myrgeddin gymmyrkey feanish, as nyn smooinaghtyn hene deyrey, ny seyrey ad ec y traa cheddin.)

¹⁶ Ayns y laa tra nee Jee folliaghtyn gheiney y vriwnys liorish Yeesey Creest, cordail rish y sushtal fo my churrym.

¹⁷ Cur‐my‐ner, t’ou goaill ort dy ve dty Ew, as t’ou coyrt dty varrant gys y leigh, as boggyssagh ayns Jee;

¹⁸ As ta toiggal ayd jeh e aigney, as t’ou prowal ny reddyn s’ooasle, myr t’ou ynsit ass y leigh.

¹⁹ As t’ou goaill ort hene, dy vel uss oo hene leeideilagh da ny doail, soilshey dauesyn t’ayns dorraghys,

²⁰ Coyrleyder yn vooinjer vee‐hushtagh, fer‐ynsee oikanyn, ayd ta cummey jeh’n tushtey as y firrinys t’ayns y leigh.

²¹ Uss er‐y‐fa shen ta gynsaghey fer elley, nagh vel oo gynsaghey oo hene? uss ta preacheil nagh lhisagh dooinney geid, Vel oo hene geid?

²² Uss ta gra nagh lhisagh dooinney poosey y vrishey, vel oo hene brishey poosey? uss ta cur dwoaie da jallooyn, vel uss dty vaarliagh er cooid chasherick?

²³ Uss ta boggyssagh ayns y leigh, vel oo liorish brishey’n leigh mee‐ooashlaghey Jee?

²⁴ Son ta ennym Yee oltooanit mastey ny Ashoonee, kyndagh riuish, myr te scruit.

²⁵ Son dy firrinagh ta giarey‐chymmylt vondeishagh, my t’ou freayll y leigh: agh my t’ou brishey’n leigh, ta dty ghiarey‐chymmylt jeant ny an‐ghiarey‐chymmylt.

²⁶ Shen‐y‐fa, my ta’n an‐ghiarey‐chymmylt freayll cairys y leigh, nagh bee yn an‐ghiarey‐chymmylt echey er ny choontey son giarey‐chymmylt?

²⁷ As nagh jean yn an ghiarey‐chymmylt ta liorish dooghys, my chooilleenys eh yn leigh, uss y vriwnys, ta liorish eer focklyn y leigh as giarey‐chymmylt brishey’n leigh?

²⁸ Son cha nee Ew eshyn, ta fer er cheu‐mooie; chamoo ta shen giarey‐chymmylt, ta jeant er cheu‐mooie ayns yn eill:

²⁹ Agh t’eshyn ny Ew, ta fer er cheu‐sthie: as ta’n giarey‐chymmylt [firrinagh shen] jeh’n chree, ayns y spyrryd, as cha nee ayns y letter, yn moylley echey cha vel veih deiney, agh veih Jee.