Romanee 16 - Yn Conaant Noa 1810

CAB. XVI

¹ Ta mee moylley hiu Phebe nyn shuyr, ee ta ny sharvaant da’n agglish ta ec Cenchrea.

² Dy gow shiu r’ee ayns y Chiarn, myr te cooie da nooghyn, as dy gooin shiu lh’ee ayns cooish erbee vees feme eck erriu: son t’ee er choyrt oltagh‐bea da ymmodee, as dou hene myrgeddin.

³ Bannee‐jee Priscilla as Aquila my cholaboree ayns Creest Yeesey:

⁴ (Ren, dy hauail my vioys, coyrt ayns dangeyr ny mwannalyn oc hene: dauesyn cha nee mish my lomarcan ta coyrt booise, agh myrgeddin ooilley kialteenyn ny Hashoonee).

⁵ Bannee‐jee myrgeddin ny Creesteenyn t’ayns y thie oc. Bannee‐jee my charrey graihagh Epenetus, yn chied‐vess dy Chreest ayns Achaia.

⁶ Bannee‐jee Moirrey, t’er ve feer dooie dooin.

⁷ Bannee‐jee Andronicus as Junia my gheiney‐mooinjerey as my heshaghyn‐pryssoonee, ta jeh goo ooasle mastey ny ostyllyn, va myrgeddin ayns Creest roym’s.

⁸ Bannee‐jee Amplias shynney lhiam ayns y Chiarn.

⁹ Bannee‐jee Urban m’ercoonee ayns Creest, as Stachys shynney lhiam.

¹⁰ Bannee‐jee Apelles firrinagh ayns Creest. Bannee‐jee adsyn ta jeh lught thie Aristobulus.

¹¹ Bannee‐jee Herodian my ghooinney‐mooinjerey. Bannee‐jee adsyn ta jeh lught‐thie Narcissus, ta ayns y Chiarn.

¹² Bannee‐jee Tryphena as Tryphosa, ta laboraght ayns y Chiarn. Bannee‐jee Persis ennoil, ren lane shirveish ayns obbyr y Chiarn.

¹³ Bannee‐jee Rufus reiht liorish y Chiarn, as y voir echeysyn as aym’s.

¹⁴ Bannee‐jee Asyncritus, Phlegon, Hermas, Patrobas, as ny braaraghyn ta mâroo.

¹⁵ Bannee‐jee Philologus, as Julia, Nereus, as e huyr, as Olympas, as ooilley ny nooghyn ta mâroo.

¹⁶ Banne‐jee y cheilley lesh paag chasherick. Ta kialteenyn Chreest dy nyn mannaghey.

¹⁷ Nish ta mee guee erriu, vraaraghyn, gow‐jee tastey jeusyn ta kyndagh jeh anvea as scammyltyn, ta noi’n chredjue ta shiuish er n’ynsaghey; as chea‐jee voue.

¹⁸ Son cha vel nyn lheid shirveish nyn Jiarn Yeesey Creest, agh nyn molg hene; as liorish goan aalin as glare vrynneragh t’ad molley creeaghyn yn vooinjer ôney.

¹⁹ Son ta’n viallys euish er ny imraa mastey dy chooilley ghooinney. Ta mee er‐y‐fa shen goaill boggey er y lieh eu: agh ny‐yeih baillym shiu ve tastagh gys shen ny ta mie, as ôney mychione olk.

²⁰ As nee’n Jee dy hee dy gerrit Noid‐ny‐hanmey y vroo fo nyn gassyn. Grayse nyn Jiarn Yeesey Creest dy row mêriu. Amen.

²¹ Ta Timotheus my heshey‐obbree, as Lucius, as Jason, as Sosipater my gheiney‐mooinjerey, bannaghey shiu.

²² Ta mish Tertius, ren shoh y scrieu, bannaghey shiu ayns y Chiarn.

²³ Ta Gaius ren oltagh‐bea y choyrt dooys, as da’n slane agglish, dy vannaghey shiu. Ta Erastus stiurt yn ard‐valley dy nyn mannaghey, as Quartus ta braar Creestee.

²⁴ Grayse nyn Jiarn Yeesey Creest dy row mêriu ooilley. Amen.

²⁵ Nish dasyn ta pooaral dy niartaghey shiu cordail rish yn sushtal aym’s, as preacheil Yeesey Creest, (cordail rish soilshaghey yn folliaght, v’er ny cheiltyn er dy hoshiaght y theihll,

²⁶ Agh ta nish jeant cronnal, as liorish scriptyryn ny phadeyryn, cordail rish sarey yn Jee dy bragh farraghtyn, er ny hoilshaghey da dy chooilley ashoon son biallys da’n chredjue).

²⁷ Gys yn ynrycan Jee creeney dy row gloyr trooid Yeesey Creest son dy bragh. Amen.