Romanee 15 - Yn Conaant Noa 1810

CAB. XV

¹ Lhisagh shinyn eisht ta lajer , gymmyrkey lesh ny annooinidyn ocsyn ta moal‐chredjuagh, as cha nee dy wooiys shin hene.

² Lhig da dagh unnane ain shirrey e naboo y wooiys, son y foays echey dy niartaghey e chredjue.

³ Son dy jarroo cha ren Creest eh hene y wooiys; agh myr te scruit, Ta ny oltooanyn ocsyn ren dty oltooaney, er duittym orrym’s.

⁴ Son cre‐erbee ny reddyn v’er nyn scrieu ’sy traa t’er n’gholl shaghey, v’ad scruit son yn ynsagh ain; trooid meenid as gerjagh ny scriptyryn dy voddagh treishteil ve ain.

⁵ Nish dy giall y Jee dy veenid as dy gherjagh diuish dy ve jeh un aigney yn derrey yeh gys y jeh elley, lurg Creest Yeesey:

⁶ Dy vod shiu lesh un aigney as un veeal Jee y ghloyraghey, dy jarroo Ayr nyn Jiarn Yeesey Creest.

⁷ Shen‐y‐fa jean‐jee soiaghey yn derrey yeh jeh’n jeh elley, myr ta Creest myrgeddin er n’yannoo soiagh j’in gys gloyr Yee.

⁸ Nish ta mee gra, dy row Yeesey Creest ny hirveishagh jeh’n ghiarey‐chymmylt, son firrinys Yee, dy hickyraghey ny gialdynyn va jeant da ny aryraghyn.

⁹ As dy voddagh ny Ashoonyn‐quaagh Jee y ghloyraghey son e vyghin; myr te scruit, Son yn oyr shoh ver‐yms moylley dhyt mastey ny Ashoonyn‐quaagh, as nee’m arrane y ghoaill gys dty ennym.

¹⁰ As reesht t’eh gra, Gow‐jee boggey, shiuish Ashoonyn‐quaagh, marish e phobble.

¹¹ As reesht, Moylley‐jee yn Chiarn, ooilley shiuish Ashoonyn‐quaagh, as cur‐jee moylley da, ooilley shiuish phobble.

¹² As reesht ta Esaias gra, Bee fraue jeh Jesse, as eshyn nee girree dy reill harrish ny Ashoonyn‐quaagh; aynsyn nee ny Ashoonyn‐quaagh treishteil.

¹³ Nish dy jean y Jee dy hreishteil shiuish y lhieeney lesh dy chooilley voggey as shee ayns credjal, dy vod shiu bishaghey ayns treishteil trooid pooar y Spyrryd Noo.

¹⁴ As ta mish mee hene myrgeddin ayns slane treishteil mychione eu, vraaraghyn, dy vel shiuish myrgeddin lane dy vieys, jeant magh lesh dy chooilley hushtey, fondagh myrgeddin dy choyrlaghey yn derrey yeh yn jeh elley.

¹⁵ Ny‐yeih, vraaraghyn, ta mee er scrieu ny ’sarryltee hiu, ayns ayrn, dy choyrt shiu ayns cooinaghtyn, er coontey yn ghrayse t’er ny choyrt dooys liorish Jee,

¹⁶ Dy beign’s shirveishagh Yeesey Creest gys ny Ashoonee, shirveish sushtal Yee, dy voddagh soiagh ve jeant jeh ny Ashoonee chebbit seose son oural, er ny chasherickey liorish y Spyrryd Noo.

¹⁷ Ta aym er‐y‐fa shen oyr dy ve boggyssagh trooid Yeesey Creest, ayns ny reddyn shen ta bentyn rish Jee.

¹⁸ Son cha goym orrym dy loayrt jeh veg jeh ny reddyn shen nagh vel Creest er n’obbraghey liorym, ayns tayrn ny Ashoonee gys biallys, liorish raa as jannoo.

¹⁹ Trooid cowraghyn niartal as yindyssyn, liorish pooar Spyrryd Yee; myr shen voish Jerusalem, as ooilley mygeayrt Illyricum, ta mee dy slane er phreacheil sushtal Chreest.

²⁰ As te er ve my yeearree jeean dy phreacheil y sushtal, cha nee raad va Creest hannah er ny enmys, son nagh jinnin troggal er undin dooinney elley:

²¹ Agh myr te scruit, Dauesyn nagh row imraa er ny yannoo jeh, nee ad shoh fakin: as adsyn nagh vel er chlashtyn, nee ad toiggal.

²² Er‐yn‐oyr shoh myrgeddin ta mee er ve dy mooar er my lhiettal veih cheet hiuish.

²³ Agh nish nagh vel arragh aym dy yannoo ayns ny ardjyn shoh, as myr te er ve my aigney jeean ny ymmodee bleeantyn shoh dy heet nyn raad:

²⁴ Tra ghoym my yurnah gys y Spainey, hig‐ym hiu: son ta mee jerkal dy akin shiu er my yurnah, as dy der shiu mee er my raad, lurg dou hoshiaght ve jeant magh myr dy beagh eh, lesh y cheshaght eu.

²⁵ Agh ta mee goll nish gys Jerusalem, dy hirveish er ny nooghyn.

²⁶ Son s’gooidsave lhieusyn jeh Macedonia as Achaia, dy yannoo chaglym ennagh son ny Creesteenyn boghtey ta ec Jerusalem.

²⁷ As ta mee gra dy gooidsave lhieu, as t’ad ayns lhiastynys daue. Son my ta ny Ashoonee er ny ve jeant co‐ayrnee jeh ny nheeghyn spyrrydoil ocsyn, yn currym oc eh myrgeddin dy hirveish orroosyn ayns nheeghyn seihltagh.

²⁸ Tra ta mee er‐y fa shen er chooilleeney shoh, as er livrey daue dy sauchey yn mess shoh, goym’s shiuish er my raad gys y Spainey.

²⁹ As ta mee shickyr tra higym hiu, dy jig‐ym ayns y slane towse jeh bannaght sushtal Chreest.

³⁰ Nish ta mee guee erriu, vraaraghyn, er graih nyn Jiarn Yeesey Creest, as er graih’n Spyrryd, dy jean shiu gobbraghey cooidjagh mârym ayns nyn badjeryn gys Jee er my hon’s;

³¹ Dy voddym v’er my livrey vouseyn ayns Judea nagh vel credjal; as dy vod y toyrtys t’aym’s dy hirveish ec Jerusalem, ve goit ayns aigney‐mie liorish ny nooghyn:

³² Dy voddym cheet hiu lesh boggey liorish aigney Yee, as mêriuish ve er my ooraghey.

³³ Nish dy row yn Jee dy hee mêriu ooilley. Amen.