Romanee 13 - Yn Conaant Noa 1810

CAB. XIII

¹ Lhig da dy chooilley annym ve biallagh da ny pooaraghyn syrjey; son cha vel pooar ayn agh veih Jee: ta ny pooaraghyn t’ayn er nyn bointeil liorish Jee.

² Quoi‐erbee er‐y‐fa shen ta shassoo seose noi’n phooar, t’eh shassoo seose noi oardagh Yee: as nee adsyn ta shassoo seose tayrn kerraghey orroo hene.

³ Son cha vel fir‐reill oyr aggle da obbraghyn mie, agh da drogh obbraghyn. Nailt eisht ve gyn aggle jeh’n phooar? jean shen ta mie, as yiow moylley er y hon:

⁴ Son shirveishagh Yee eh dhyt’s son foays. Agh my t’ou jannoo shen ta olk, gow aggle; son cha vel eh gymmyrkey yn cliwe ayns fardail: son sharvaant Yee eh, fer ta coamrit lesh pooar dy ghoaill cooilleen ersyn ta jannoo olk.

⁵ Shen‐y‐fa shegin diu ve biallagh, cha nee ny lomarcan son aggle roish kerraghey, agh myrgeddin er graih cooinsheanse.

⁶ Son er y choontey shoh ta shiu myrgeddin geeck keesh: son shirveishee Yee ad, tendeil dy kinjagh er yn eer red shoh.

⁷ Eeeck‐jee er‐y‐fa shen da dy chooilley unnane e chair; keesh dauesyn ta keesh cair, custom dauesyn ta custom; aggle dauesyn ta aggle; ooashley dauesyn ta ooashley cair.

⁸ Ny bee‐jee fo lhiastynys son nhee erbee da dooinney erbee, agh dy choyrt graih yn derrey yeh da’n jeh elley: son t’eshyn ta graihagh er fer elley, er lhieeney yn leigh.

⁹ Son shoh t’er ny ghra, Cha brish oo poosey, Cha jean oo dunverys, Cha jean oo geid, Cha n’ymmyrk oo feanish foalsey, Cha der oo saynt; as my ta anney erbee elley, te ayns focklyn giarey goit stiagh fo’n raa shoh, ta shen, Ver oo graih da dty naboo myr dhyt hene.

¹⁰ Cha vel graih jannoo aggair da e naboo; shen‐y‐fa she graih lhieeney yn leigh.

¹¹ As shen, liorish coyrt tastey da’n traa, dy vel eh nish ard traa dy ghoostey ass cadley: son nish ta nyn saualtys ny sniessey na ve tra ren shin hoshiaght credjal.

¹² Ta’n oie foddey ceaut, ta’n laa er‐gerrey: lhig dooin er‐y‐fa shen tilgey ersooyl obbraghyn y dorraghys, as lhig dooin cur orrin eïlley yn toilshey.

¹³ Lhig dooin gimmeeaght dy onneragh myr ayns y laa; cha nee ayns rouanys as meshtyrys, cha nee ayns cloie as reaid, cha nee ayns streeu as troo:

¹⁴ Agh cur‐jee erriu yn Chiarn Yeesey Creest, as ny gowjee kiarail erbee son yn eill, dy chooilleeney yn thaynt eck.