Romanee 10 - Yn Conaant Noa 1810

CAB. X

¹ Vraaraghyn, yeearree my chree as my phadjer gys Jee son Israel te, dy voddagh ad ve er nyn sauail.

² Son ta mee gymmyrkey feanish daue, dy vel graih jeean oc er Jee, agh cha nee cordail rish tushtey (firrinagh.)

³ Son mee‐hushtagh jeh cairys Yee, as shirrey dy hoiaghey seose yn chairys oc hene, cha vel ad er injillaghey ad hene gys cairys Yee.

⁴ Son ta Creest jerrey yn leigh son cairys, da dy chooilley unnane ta credjal.

⁵ Son ta Moses soiaghey roïn yn chairys ta liorish y leigh, Dy bee yn dooinney ta cooilleeney ny reddyn shen, bio lioroo.

⁶ Agh ta’n chairys ta liorish credjue, loayrt er yn aght shoh, Ny abbyr ayns dty chree, Quoi hed seose gys niau? (ta shen, dy chur lesh Creest neose)

⁷ Ny, Quoi hed sheese gys y diunid? (ta shen, dy chur lesh Creest seose reesht veih ny merriu)

⁸ Agh cre te gra? Ta’n goo er‐gerrey dhyt, dy jarroo ayns dty veeal, as ayns dty chree; ta shen goo yn chredjue ta shin dy phreacheil;

⁹ My nee oo lesh dty veeal goaill‐rish yn Chiarn Yeesey, as credjal ayns dty chree dy vel Jee er hroggal eh veih ny merriu, bee oo er dty hauail.

¹⁰ Son lesh y chree ta dooinney credjal gys cairys, as lesh y veeal ta goaill rish [y chredjue] er ny yannoo gys saualtys.

¹¹ Son ta’n scriptyr gra, Quoi‐erbee ta credjal ersyn, nagh bee eh er ny choyrt gys nearey.

¹² Son cha vel veg y soiagh eddyr yn Hew as y Greek; son ta’n Chiarn cheddin harrish ooilley, berchagh dauesyn ooilley ta geamagh er.

¹³ Son quoi‐erbee nee geamagh er Ennym y Chiarn, bee eh er ny hauail.

¹⁴ Kys eisht nee ad geamagh ersyn, nagh vel ad er chredjal ayn? As kys nee ad credjal aynsyn, nagh vel ad er chlashtyn jeh? As kys nee ad clashtyn fegooish preachoor?

¹⁵ As kys nee ad preacheil, mannagh vel ad er nyn goyrt? Myr te scruit, Cre cha aalin ta ny cassyn ocsyn ta preacheil y sushtal dy hee, as cur lhieu naightyn gennal dy nheeghyn mie!

¹⁶ Agh cha vel ad ooilley er choyrt biallys da’n sushtal: Son ta Esaias gra, Hiarn, quoi ta er chredjal y goo ain?

¹⁷ Myr shen eisht, ta credjue cheet liorish clashtyn, as clashtyn liorish goo Yee.

¹⁸ Agh ta mish dy ghra, Nagh vel adsyn er chlashtyn? Ta dy feer, hie yn coraa oc er feai‐nycruinney, as ny goan oc gys ny ardjyn sodjey magh jeh’n theihll.

¹⁹ Agh ta mish gra, Row shoh gyn‐yss da Israel? Ta Moses roïe er ghra, Nee’m shiu y ghriennaghey gys eadaghey lioroosyn nagh nee pobble ad, as liorish ashoon ommijagh ver‐ym corree erriu.

²⁰ Agh ta Esaias lesh dunnallys smoo gra, Va mee er my gheddyn lioroosyn nagh row dy my hirrey; Va mee er my hoilshaghey dauesyn nagh ren briaght my lurg.

²¹ Agh rish Israel t’eh gra, Fey‐ny‐laa ta mee er heeyney magh my laueyn gys pobble roonagh as mee‐viallagh.