Romanee 1 - Yn Conaant Noa 1810

CAB. I

¹ Paul sharvaant Yeesey Creest, er ny eam dy ve ny ostyl, soit er‐lheh gys sushtal Yee;

² (V’eh er ghialdyn ro‐laue liorish e adeyryn ayns ny scriptyryn casherick)

³ Mychione e Vac Yeesey Creest nyn Jiarn, rug jeh sluight Ghavid lurg dooghys ny foalley,

⁴ As soilshit dy ve Mac Yee lesh pooar, cordail rish y spyrryd dy chasherickys, liorish yn irree‐seose‐reesht veih ny merriu;

⁵ Liorishyn ta shin er n’gheddyn grayse as ostyllys son biallys gys y chredjue mastey dy chooilley ashoon liorish yn ennym echey:

⁶ Nyn mast’ oc ta shiuish myrgeddin er nyn eam liorish Yeesey Chreest.

⁷ Dauesyn ooilley ta ’sy Raue, deyr gys Jee, eït dy ve nooghyn: Grayse dy row hiu, as shee veih Jee nyn Ayr, as y Chiarn Yeesey Creest.

⁸ Hoshiaght, ta mee coyrt booise da my Yee trooid Yeesey Creest er nyn son eu ooilley, dy vel y credjue euish er ny imraa jeh trooid y slane seihll.

⁹ Son Jee m’eanish, eh ta mee dy hirveish lesh my spyrryd ayns sushtal e Vac, dy vel mee dy kinjagh cooinaghtyn erriu ayns my phadjeryn,

¹⁰ Geearree (my she aigney Yee eh dy choyrt dou fey‐yerrey jurnah sauchey) dy heet hiu.

¹¹ Son ta foddiaght orrym dy akin shiu, dy voddym gioot ennagh spyrrydoil y hirveish erriu, dy vod shiu ve er ny niartaghey;

¹² Ta shen, dy voddym’s v’er my gherjaghey cooidjagh mêriu, liorish yn chredjue cadjin euish chammah as aym’s.

¹³ Nish cha baill‐ym eh ve gyn‐yss diu, vraaraghyn, dy row mee dy mennick kiarail cheet hiu (agh choud shoh va mee er my lhiettal) dy voddagh mess ennagh ve aym ny vud euish myrgeddin, dy jarroo myr mastey Ashoonee elley.

¹⁴ Ta mee fo kiangley chammah da ny Greekyn, as da ny Barbarianee, chammah da’n (vooinjer) ynsit, as da’n neu‐ynsit.

¹⁵ Shen‐y‐fa, gys rere my phooar, ta mee aarloo dy phreacheil yn sushtal diuish myrgeddin t’ec y Raue.

¹⁶ Son cha vel nearey orrym jeh sushtal Chreest: son te pooar Yee gys saualtys, da dy chooilley unnane ta credjal, da’n Ew hoshiaght, as myrgeddin da’n Greek.

¹⁷ Son ayns shen ta firrinys Yee er ny hoilshaghey veih credjue gys credjue: myr te scruit, Bee’n fer cairagh bio liorish credjue.

¹⁸ Son ta jymmoose Yee er ny hoilshaghey veih niau noi dy chooilley vee‐chraueeaght, as neu‐ynrickys ayns neu‐ynrickys.

¹⁹ Er‐yn‐oyr dy vel shen ny oddys ve er ny hoiggal mychione Jee, er ny hoilshaghey ayndoo; son ta Jee er hoilshaghey shen daue.

²⁰ Son shen jehsyn nagh vel ry‐akin, ta shen, e phooar dy bragh beayn as e ghooghys flaunyssagh, veih croo’n theihll, t’ad dy baghtal cronnit, er ny hoiggal liorish ny reddyn ta jeant; myr shen dy vel ad gyn leshtal:

²¹ Er‐yn‐oyr tra va toiggal oc dy Yee, cha ren ad eh y ghloyraghey myr Jee, chamoo v’ad booisal, agh haink ad dy ve fardalagh ayns nyn smooinaghtyn; as va’n cree ommijagh oc fo dorraghys.

²² Goaill orroo hene dy ve creeney, haink ad dy ve nyn ommydanyn:

²³ As cheaghil ad gloyr y Jee nagh vod goll naardey, gys jalloo casley rish dooinney ta goll naardey, as eeanlee, as beiyn kiare‐chassagh, as beishteigyn.

²⁴ Shen‐y‐fa ren Jee myrgeddin ad y livrey seose gys neughiennid, trooid sayntyn nyn greeaghyn hene, dy vee‐ooashlaghey nyn girp ry cheilley:

²⁵ Ren caghlaa firrinys Yee gys breg, as ooashlaghey as shirveish y cretoor erskyn y Fer croo, ta bannit son dy bragh. Amen.

²⁶ Er‐yn‐oyr shoh livrey Jee ad seose gys yeearreeyn neuchooie: Son ren eer nyn mraane yn ymmyd dooghyssagh y chaghlaa gys shen ny ta noi dooghys:

²⁷ As ren myrgeddin ny deiney faagail ymmyd dooghyssagh y ven, lostey ayns nyn saynt yn derrey yeh gys y jeh elley, deiney rish deiney cur rish neu‐ghlennid, as geddyn ayndoo hene yn cooilleeney shen va cair da nyn shaghrynys.

²⁸ As dy jarroo myr nagh smooinee ad mie dy reayll Jee ayns nyn dushtey, livrey Jee ad harrish gys creoghys cree, dy yannoo shen nagh row lowal:

²⁹ Laadit lesh dy chooilley neu‐ynrickys, maarderys, olkys, saynt, goanlys; lane dy hroo, dunverys, streeu, molteyraght, drogh‐yannoo; scammyltee cooylchlea,

³⁰ Cooylchasseydee, noidyn Yee, roonee, moyrnee, boggyssee, gientyn reddyn olk, mee‐viallee da ayraghyn as moiraghyn,

³¹ Fegooish tushtey, brishey conaantyn, fegooish graih dooghyssagh, elgyssee, neu‐vyghinagh:

³² Ga dy vel toiggal oc jeh briwnys Yee, (dy vel adsyn ta cur rish lheid ny reddyn shoh toilchin baase) cha vel ny lomarcan jannoo ny reddyn cheddin ad hene, agh ta taitnys oc ayndoosyn ta cur roo.