Philippianee 4 - Yn Conaant Noa 1810

CAB. IV

¹ Shen‐y‐fa my vraaraghyn, deyr graihagh as nyn lurg eu ta foddiaght orrym, my voggey as my attey, shass‐jee myr shen shickyr ayns y Chiarn, my chaarjyn ennoil.

² Ta mee guee er Euodias, as guee er Syntyche, dy bee ad jeh’n aigney cheddin ayns y Chiarn.

³ As ta mee guee ort’s myrgeddin, cho‐obbree firrinagh, cooin lesh my mraane shen ren m’y hirveish ayns y sushtal, marish Clement myrgeddin, as y chooid elley jeh my cho‐labreeyn, ny enmyn oc ta ayns lioar y vea.

⁴ Gow‐jee boggey ayns y Chiarn dy kinjagh, as reesht ta mee gra, Gow‐jee boggey.

⁵ Lhig da’n ymmyrkey meen eu ve cronnal da dy chooilley ghooinney. Ta’n Chiarn er‐gerrey.

⁶ Ny bee‐jee imneagh son nhee erbee: agh ayns dy chooilley nhee liorish padjer as accan lesh toyrt‐booise, lhig da ny aghinyn eu ve soilshit da Jee.

⁷ As nee shee Yee ta erskyn dy chooilley hushtey ny creeaghyn as ny aignaghyn eu y reayll trooid Creest Yeesey.

⁸ Ayns focklyn giarey, my chaarjyn, cre‐erbee ny reddyn ta firrinagh, cre‐erbee ny reddyn ta ooasle, cre‐erbee ny reddyn ta cairagh, cre‐erbee ny reddyn ta glen, cre‐erbee ny reddyn ta graihoil, cre‐erbee ny reddyn ta jeh goo mie; my ta foays erbee, as my ta moylley erbee, smooinee‐jee er ny reddyn shoh.

⁹ Ny reddyn shen ta shiu chammah er n’ynsaghey as er n’ghoaill roo, as er chlashtyn, as er vakin aynym’s, jean‐jee ad y chooilleeney: as bee Jee yn chee mêriu.

¹⁰ Agh ghow mee boggey mooar ayns y Chiarn, nish ec y jerrey dy vel y chiarail euish er my hon er vlaaghey reesht, ayns dy row shiu myrgeddin imneagh, agh cha daink eh lhieu.

¹¹ Cha nee dy vel mee loayrt myr dy beign ayns feme: son ta mee er n’ynsaghey cre‐erbee yn stayd ta mee ayn, lesh shen dy ve booiagh.

¹² Shione dou chammah cre te dy ve ayns boghtynid, as shione dou cre te dy ve ayns palchey: ayns dy chooilley ynnyd, as ayns dy chooilley nee ta mee ynsit, chammah dy ve er my yannoo magh as dy ve accryssagh, chammah dy ve ayns palchey as dy ve ayns feme.

¹³ Foddym dy chooilley nhee y yannoo trooid Creest ta dy my niartaghey.

¹⁴ Ny‐yeih, ta shiu er n’yannoo dy mie, dy ren shiu feaysley orrym ayns my heaghyn.

¹⁵ Nish ta fys euish Philippianee myrgeddin, ayns toshiaght my phreacheil y sushtal, er my raad veih Macedonia, nagh ren keeill erbee shirveish orrym, mychione coyrt as goaill, agh shiu hene ny lomarcan.

¹⁶ Son ayns Thessalonica hene, ren shiu keayrt as keayrt feaysley er my ymmyrch.

¹⁷ Cha nee dy vel mee shirrey gioot: agh ta mee geearree mess oddys bishaghey gys y vondeish euish.

¹⁸ Agh ta dy liooar aym, as er y phalchey: ta mee jeant magh, neayr’s hooar mee veih Epaphroditus shen hug shiu hym, chebbal dy hoar millish, oural booisal, lheid as nee Jee soiaghey jeh.

¹⁹ Agh nee my Yee ooilley nyn veme y yannoo magh, cordail rish e verchys ayns gloyr, liorish Creest Yeesey.

²⁰ Nish gys Jee as nyn Ayr dy row gloyr son dy bragh as dy bragh. Amen.

²¹ Bea as slaynt gys dy chooilley noo ays Creest Yeesey. Ta ny braaraghyn ta mârym’s dy nyn mannaghey shiu.

²² Ta ooilley ny nooghyn coyrt nyn mannaght hiu, er‐lheh adsyn ta jeh lught‐thie Cesar.

²³ Grayse nyn Jiarn Yeesey Creest dy row mêriu ooilley. Amen.