Philippianee 3 - Yn Conaant Noa 1810

CAB. III

¹ Ny sodjey, my vraaraghyn, gow‐jee boggey ayns y Chiarn. Dy scrieu ny reddyn cheddin hiuish, cha vel eh deinagh dooys, agh diuish te vondeishagh.

² Cur‐jee twoaie jeh moddee, cur‐jee twoaie jeh drogh‐yantee, cur‐jee twoaie jeh’n cowrey‐foalley.

³ Son ta shinyn yn giarey‐chymmylt, ta cur ooashley da Jee ayns y spyrryd, as boggyssagh ayns Creest Yeesey, as cha vel shin coyrt barrant erbee gys yn eill:

⁴ Ga dy voddin’s myrgeddin barrant y choyrt gys yn eill. My ta dooinney erbee elley smooinaghtyn dy vel oyr echey dy hreishteil ayns yn eill, ta ny smoo aym’s:

⁵ Er my ghiarey chymmylt yn hoghtoo laa, jeh kynney Israel, jeh sheeloghe Venjamin, Hebrew [dooie] jeh ny Hebrewnee; mychione my chredjue ’sy leigh, my Pharisee:

⁶ Mychione jeeanid son y leigh, jannoo tranlaase er yn agglish; mychione y chairys ta liorish y leigh, gyn foill.

⁷ Agh ny reddyn shen va cosney dooys, ad shen choont mee coayl er graih Chreest.

⁸ As dy firrinagh, cha vel mee coontey dy chooilley nhee agh coayl, son y tushtey smoo ooasle jeh Creest Yeesey my Hiarn: er y hon ta mee er hurranse coayl dy chooilley nhee, as cha vel mee soiaghey jeu agh myr eoylley, dy voddym Creest y chosney,

⁹ As ve er my gheddyn aynsyn, cha nee shassoo er my chairys hene, ta liorish y leigh, agh er shen ta liorish credjue ayns Creest, yn chairys shen ta veih Jee liorish credjue:

¹⁰ Dy vod enney ’ve aym ersyn, as toiggal pooar yn irree‐seose reesht echey, as yn ayrn t’aym’s ayns e hurranse, dy ve er my yannoo casley rishyn ayns e vaase;

¹¹ Dy voddin liorish saase erbee cosney gys irree‐reesht ny merriu:

¹² Cha nee myr dy beign hannah er chosney, ny foast er gheddyn yn slane leagh: agh ta mee chionney huggey, my she shen dy voddym tayrtyn shen, er y hon va mee er my hayrtyn liorish Creest Yeesey.

¹³ My vraaraghyn, cha vel mee jeeaghyn orrym pene myr dy beign er roshtyn huggey: agh un red ta foym dy yannoo, jarrood ny reddyn shen ta my yeï, as sheeyney er my hoshiaght gys ny reddyn ta roym,

¹⁴ Ta mee chionney gys y vark, son leagh yn eam hug Jee dou veih’n yrjid ayns Creest Yeesey.

¹⁵ Lhig dooinyn er‐y‐fa shen, whilleen as ta dy slane ynsit, ve jeh’n aigney shoh: as my vees shiu ayns nhee erbee jeh aigney elley, nee Jee shoh myrgeddin y hoilshaghey diu.

¹⁶ Ny‐yeih, choud as ta shin er roshtyn huggey, lhig dooin gimmeeaght liorish y rule cheddin, lhig dooin tastey choyrt da’n red cheddin.

¹⁷ Vraaraghyn, eiyr‐jee ry‐cheilley orrym’s, as cur‐jee tastey dauesyn ta gimmeeaght myr shen, myr ta shinyn eu son sampleyr.

¹⁸ (Son ta ymmodee gimmeeaght, my‐nyn gione ta mee er n’insh diu dy mennick, as nish lesh jeir ginsh diu, dy nee ad noidyn crosh Chreest:

¹⁹ Ta’n jerrey oc toyrt‐mow, yn Jee oc ta nyn molg, as ta’n gloyr oc ayns nyn nearey, ta nyn aigney er nheeghyn seihltagh.)

²⁰ Son ta cairys cummaltee ain ayns niau, veih ta shin myrgeddin jeaghyn son yn Saualtagh, yn Chiarn Yeesey Creest:

²¹ Nee caghlaa yn corp marvaanagh ain dy vod eh ve er ny chummey casley rish e chorp gloyroil hene, cordail rish y phooar niartal liorish t’eh abyl dy jarroo dy injillaghey dy chooilley nhee huggey hene.