Philippianee 1 - Yn Conaant Noa 1810

CAB. I

¹ Paul as Timotheus sharvaantyn Yeesey Creest, gys ooilley ny nooghyn ayns Creest Yeesey, ta ec Philippi, marish ny aspickyn as shirveishee:

² Grayse dy row hiu, as shee veih Jee nyn Ayr, as veih’n Chiarn Yeesey Creest.

³ Ta mee cur booise da my Yee dy chooilley cheayrt ta mee dy imraa shiu,

⁴ (Dy kinjagh ayns ooilley my phadjeryn er nyn son eu ooilley, jannoo aghin lesh boggey)

⁵ Son y co‐ayrn eu ayns y sushtal veih’n chied laa gys nish;

⁶ Myr ta shickyrys aym jeh’n eer red shoh, dy der eshyn ta er chur obbyr vie er y hoshiaght ny‐vud eu, mullagh er derrey laa Yeesey Creest:

⁷ Dy jarroo myr te jesh dooys yn smooinaghtyn shoh y ve aym mychione eu ooilley, er‐y‐fa dy vel shiu aym ec my chree, ayns wheesh as chammah ayns my gheulaghyn, as ayns fendeil as niartaghey yn sushtal, ta shiu ooilley paarteeassyn mârym jeh grayse.

⁸ Son Jee my eanish, cre cha jeean as ta mee goaill foddeeaght nyn yeï eu ooilley ayns meiyghys Yeesey Creest.

⁹ As shoh ta mee guee, dy vod y ghraih eu bishaghey foast ny smoo as ny smoo ayns fysseree, as ayns dy chooilley vriwnys:

¹⁰ Dy vod shiu lowal jeh ny reddyn smoo ooasle, dy vod shiu ve ynrick, as shickyr gys laa Creest;

¹¹ Lhieent lesh ny messyn dy chairys, ta liorish Yeesey Chreest, gys gloyr as moylley Yee.

¹² Agh baillym shiu dy hoiggal, vraaraghyn, dy vel ny reddyn t’er jeet my raad, er jyndaa magh dy chur y sushtal ny smoo er y hoshiaght:

¹³ Myr shen dy vel my gheulaghyn er coontey Chreest imraït ayns ooilley plaase y ree, as ayns dy chooilley ynnyd elley;

¹⁴ As ta ymmodee jeh ny braaraghyn ayns y Chiarn, er n’aase dunnal liorish my gheulaghyn’s, foddey s’creeoil dy loayrt yn goo fegooish aggle.

¹⁵ Ta paart dy jarroo preacheil Creest trooid eer troo as anvea; as paart myrgeddin trooid aigney‐mie.

¹⁶ Ta’n derrey yeh preacheil Creest trooid streeu, cha nee dy ynrick, er‐chee dy chur trimmid gys my gheulaghyn:

¹⁷ Agh y jeh elley trooid graih, myr ta fys oc dy vel mee er my phointeil son fendeilys y tushtal.

¹⁸ Cre eisht? ny‐yeih, er dy chooilley aght, edyr eh ve ayns foalsaght, ny ayns firrinys, ta Creest er ny phreacheil; as er y choontey shen ta mee goaill boggey, as dy jarroo nee’m boggey y ghoaill.

¹⁹ Son ta fys aym dy jean shoh chyndaa gys my livrey‐ys trooid y phadjer euish, as cooney Spyrryd Yeesey Creest,

²⁰ Cordail rish my yerkal jeean, as my hreishteil, nagh bee nearey orrym ayns nhee erbee, agh lesh dy chooilley ghunnallys, myr dy kinjagh, myr shen nish myrgeddin dy bee Creest er ny ghloyraghey ayns my chorp, edyr eh ve liorish bioys ny baase.

²¹ Son dooys dy ve bio te [son] Creest, as dy gheddyn baase te cosney.

²² Agh dy ve bio ’syn eill, shoh mess my laboraght: agh foast cre dy reih, cha s’aym.

²³ Son ta mee ayns chennid eddyr jees, aggindagh dy gholl roym, as dy ve marish Creest; ta foddey share:

²⁴ Ny‐yeih, dy hannaghtyn ayns y challin, te ny s’vondeishee diuish.

²⁵ As ayns treishteil shickyr jeh shoh, ta fys aym dy bee’m bio as dy jean‐ym tannaghtyn mêriuish ooilley, dy choyrt er y hoshiaght nyn moggey as nyn gredjue:

²⁶ Dy vod yn boggey euish ve foddey smoo ayns Creest Yeesey er my hon’s, tra hig‐ym’s hiuish reesht.

²⁷ Erskyn ooilley, lhig da’n ymmyrkey‐bea eu ve cordail rish sushtal Chreest: myr shen edyr mee dy heet dy yeeaghyn shiu, ny gyn cheet, dy voddym clashtyn jeh nyn stayd, dy vel shiu shassoo shickyr ayns un Spyrryd, lesh un aigney streeu cooidjah son credjue yn tushtal;

²⁸ As gyn ve agglit ayns nhee erbee liorish nyn noidyn: yn chooid cheddin ta dauesyn cowrey cronnal dy hoyrt‐mow, agh diuish dy haualtys, as shen veih Jee.

²⁹ Son diuish te er ny choyrt ass lieh Chreest, cha nee ny‐lomarcan dy chredjal ayn, agh myrgeddin dy hurranse er y ghraih echey;

³⁰ Fakin dy vel shiu hene caggey fo’n seaghyn cheddin honnick shiu mish ayn, as nish clashtyn dy vel mee ayn.