Philemon 1 - Yn Conaant Noa 1810

CAB. I

¹ Paul pryssoonagh Yeesey Creest, as Timothy nyn mraar, gys Philemon nyn mraar graihagh, as sheshey‐shirveishagh [ayns y sushtal],

² As gys nyn gaarjyn ennoil Apphia, as Archippus nyn sheshey‐sidoor, as gys y cheshaght‐chreestee ta ayns dty hie:

³ Grayse dy row hiu, as shee voish Jee nyn Ayr, as y Chiarn Yeesey Creest.

⁴ Ta mee coyrt booise da my Yee, dy kinjagh gimraa ort ayns my phadjeryn,

⁵ Lurg clashtyn ve aym jeh dty chredjue ayns y Chiarn Yeesey, as jeh dty ghraih da ooilley ny nooghyn;

⁶ Dy vod yn ayrn t’ayd’s mârin ’sy chredjue cadjin ve breeoil, gys goaill‐rish dy chooilley, nhee mie, ta nyn mast’ eu ayns Creest Yeesey.

⁷ Son ta boggey as gerjagh mooar ain ayns dty ghraih, er‐yn‐oyr dy vel yeearreeyn ny nooghyn femoil er nyn ooraghey liort’s, vraar.

⁸ Ga dy voddin er‐y‐fa shen goaill y daanys shen orrym ayns Creest, dy dty harey gys shen ta cooie dy ve jeant;

⁹ Ny‐yeih er graih ainjys [creestee] ta mee goaill myr reih dy yannoo aghin hood’s, mish Paul ta my henn ghooinney, as nish myrgeddin pryssoonagh Yeesey Creest.

¹⁰ Ta mee jannoo aghin hood ayns lieh my vac Onesimus, ta mee er gheddyn ayns y chredjue tra va mee ayns my gheulaghyn:

¹¹ Va ayns traa dy row neu‐vondeishagh dhyt’s, agh nish vondeishagh dhyt’s as dooys:

¹² Eshyn ta mee er choyrt hoods reesht: gow uss rishyn er‐y‐fa shen myr rish my chree hene.

¹³ Eshyn veign er reayll mârish, ayns yn ynnyd ayd’s dy voddagh eh ve shirveishagh dou ayns geulaghyn y tushtal.

¹⁴ Agh noi dt’aigney cha jinnin nhee erbee; nagh beagh dty aigney‐mie myr êginit, agh dy arryltagh.

¹⁵ Son foddee dy daag eh oo son traa giare, dy voddagh oo eh y reayll mayrt choud as s’bio eh;

¹⁶ Cha nee nish myr sharvaant, agh, erskyn sharvaant, braar ennoil, dooys er‐lheh, agh foddey smoo dhyt’s, chammah ayns yn eill as ayns y Chiarn?

¹⁷ My t’ou er‐y‐fa shen jeeaghyn orrym myr sheshey‐creestee, gow rishyn myr rhym pene.

¹⁸ My t’eh er n’yannoo aggair dhyt, ny my t’eh lhiastyn veg dhyt, cur shen gys y choontey aym’s.

¹⁹ Ta mish Paul er scrieu eh fo my laue hene, cooilleen‐yms eh: gyn dy insh dhyt dy vel uss cheu‐mooie jeh shoh lhiastyn dooys eer oo hene.

²⁰ Dy jarroo, guee‐ym ort, vraar, lhig da boggey ve aym jeed ayns y Chiarn: jean mian my chree y ooraghey ayns y Chiarn.

²¹ Ayns slane treishteil jeh dty viallys, ta mee er scrieu hood, as s’mie ta fys aym dy jean uss eer ny smoo na ta mee shirrey.

²² Agh marish shoh kiare aaght er my hon: son ta mee treishteil liorish ny padjeryn eu, trooid foayr Yee, dy jig‐ym hiu reesht.

²³ Ta dy dty vannaghey Epaphras, my cho‐phryssoonagh ayns Creest Yeesey;

²⁴ Marcus, Aristarchus, Demas, Lucas, my cho‐labreeyn.

²⁵ Dy row grayse nyn Jiarn Yeesey Creest marish nyn spyrryd. Amen.