Noo Mian 4 - Yn Conaant Noa 1810

CAB. IV

¹ Eisht va Yeesey er ny leeideil liorish Spyrryd Yee gys yn aasagh, dy v’er ny violaghey liorish y drogh‐spyrryd.

² As tra v’eh er drostey da‐eed laa as da‐eed oie v’eh ny lurg shen accryssagh.

³ As haink y mioleyder huggey, gra, My she mac Yee oo, cur sarey da ny claghyn shoh dy ve jeant nyn arran.

⁴ Agh dreggyr eshyn, gra, Te scruit, Cha nee liorish arran ny lomarcan nee dooinney beaghey, agh liorish dy chooilley ockle ta cheet magh ass beeal Yee.

⁵ Eisht ghow y drogh spyrryd lesh seose eh gys yn ard‐valley casherick, as hoie eh eh er beinn toor syrjey yn chiamble,

⁶ As dooyrt eh rish, My she Mac Yee oo, tilg oo hene sheese: son te scruit, Ver eh currym da e ainleyn my‐dty‐chione, as ayns nyn laueyn nee ad oo y ymmyrkey, nagh bwoaill oo ec traa erbee dty chass noi clagh.

⁷ Dooyrt Yeesey rish, Te scruit myrgeddin, Cha jean oo yn Chiarn dty Yee y violaghey.

⁸ Reesht hug y drogh‐spyrryd lesh eh seose er slieau feer ard, as yeeagh eh da ooiley reeriaghtyn y theihll as y ghloyr oc:

⁹ As dooyrt eh rish. Ooilley shoh ver‐ym’s dhyt’s my huittys oo sheese, as ooashley ’chur dou.

¹⁰ Eisht dooyrt Yeesey rish, Ass my enish oo, Noid‐ny‐hanmey: son te scruit, Ver oo ooashley da’n Chiarn dty Yee, as eshyn ynrycan nee oo shirveish.

¹¹ Eisht daag y drogh‐spyrryd eh, as cur‐my‐ner haink ainleyn as ren ad shirveish er.

¹² Nish tra cheayll Yeesey dy row Ean ny phryssoonagh, jimmee eh dy lhiattee gys Galilee.

¹³ As faagail Nazareth, haink eh dy chummal ayns Capernaum, ta rish oirr ny marrey, rish ardjyn Zabulon as Nepthalim:

¹⁴ As shoh myr va coolleenit shen ny loayr Esaias yn phadeyr, gra,

¹⁵ Thalloo Zabulon, as thalloo Nepthalim, er slyst ny marrey, cheu elley dy Yordan, Galilee ny Ashoonee:

¹⁶ Ta’n pobble va nyn soie ayns dorraghys, er vakin soilshey mooar: as orroosyn va nyn soie ayns cheer as scadoon vaaish, ta soilshey er n’irree seose.

¹⁷ Veih yn traa shen ren Yeesey toshiaght dy phreacheil, as dy ghra, Gow‐jee arrys, son ta reeriaght niau er‐gerrey.

¹⁸ As myr va Yeesey shooyl liorish keayn Ghalilee, honnick eh daa vraar, Simon va enmyssit Peddyr, as Andreays e vraar, cur magh lieen ’sy cheayn: (son v’ad nyn eeasteyryn)

¹⁹ As dooyrt eh roo, Eiyr‐jee orrym’s, as neem’s shiu nyn eeasteyryn dy gheiney.

²⁰ As chelleeragh daag ad nyn lieenteenyn, as deiyr ad er.

²¹ As goll er e hoshiaght veih shen, honnick eh daa vraar elley, Jamys mac Zebedee, as Ean e vraar, ayns lhong marish Zebedee nyn ayr, kerraghey nyn lieen: as deïe eh orroo.

²² As chelleeragh daag ad y lhong as nyn ayr, as deiyr ad er.

²³ As hie Yeesey mygeayrt ooilley Galilee, gynsaghey ayns nyn gialteenyn, as preacheil sushtal y reeriaght, as lheihys dy chooilley hingys, as dy chooilley ghoghan mastey’n pobble.

²⁴ As hie goo jeh magh trooid ooilley Syria: as hug ad lhieu huggey ooilley ny aslayntee, fo doghanyn as pianyn, adsyn va seaghnit lesh drogh‐spyrrydyn, sleih ass nyn geeayl, as an‐lheiltee, as ren eh ad y lheihys.

²⁵ As deiyr er chaglym mooar dy leih veih Galilee, as Decapolis, as Jerusalem, as Judea, as veih cheu elley dy Yordan.