Noo Mian 1 - Yn Conaant Noa 1810

CAB. I

¹ Lioar sheeloghe Yeesey Creest, mac Ghavid, mac Abraham.

² Hooar Abraham Isaac, as hooar Isaac Jacob, as hooar Jacob Judas as e vraaraghyn.

³ As hooar Judas Phares as Zarah rish Thamar, as hooar Phares Esrom, as hooar Esrom Aram.

⁴ As hooar Aram Aminadab, as hooar Aminadab Naason, as hooar Naason Salmon.

⁵ As hooar Salmon Booz rish Rachab, as hooar Booz Obed rish Ruth, as hooar Obed Jesse.

⁶ As hooar Jesse David yn ree, as hooar David yn ree Solomon reeish v’er ny ve ben Urias.

⁷ As hooar Solomon Roboam, as hooar Roboam Abia, as hooar Abia Asa.

⁸ As hooar Asa Josaphat, as hooar Josaphat Joram, as hooar Joram Ozias.

⁹ As hooar Ozias Joatham, as hooar Joatham Achaz, as hooar Achaz Ezekias.

¹⁰ As hooar Ezekias Manasses, as hooar Manasses Amon, as hooar Amon Josias.

¹¹ As hooar Josias Jechonias as e vraaraghyn, mysh am yn chappeeys Babylonagh.

¹² As rish earish yn chappeeys Babylonagh hooar Jechonias Salathiel, as hooar Salathiel Zorobabel.

¹³ As hooar Zorobabel Abiud, as hooar Abiud Eliakim, as hooar Eliakim Azor.

¹⁴ As hooar Azor Sadoc, as hooar Sadoc Achim, as hooar Achim Eliud.

¹⁵ As hooar Eliud Eliazar, as hooar Eliazar Matthan, as hooar Matthan Jacob.

¹⁶ As hooar Jacob Joseph sheshey Voirrey, j’eeish ruggyr Yeesey, ta enmyssit Creest.

¹⁷ Myr shen ta ooilley ny sheelogheyn veih Abraham gys David, kiare sheelogheyn jeig: as veih David derrey’n chappeeys ayns Babylon, kiare sheelogheyn jeig: as veih’n chappeeys ayns Babylon derrey Creest kiare sheelogheyn jeig.

¹⁸ Nish shoh myr haink [Yeesey] Creest er y theihll: Erreish da e voir Moirrey ve nasht rish Joseph, roish my daink ad dy vaghey cooidjagh, v’ee ry‐akin dy ve corrym liorish yn Spyrryd Noo.

¹⁹ As myr va Joseph e sheshey ny ghooinney cairal, as neu‐wooiagh dy choyrt ee gys nearey foshlit, v’eh smooinaghtyn dy scarrey r’ee dy follit.

²⁰ Agh choud as va ny reddyn shoh er e aigney, cur‐my‐ner haink ainle y Chiarn huggey ayns ashlish, gra, Yoseph, vac Ghavid, ny bee aggle ort dy ghoaill hood Moirrey dty ven: son shen t’er ny ghientyn aynjee, te jeh’n Spyrryd Noo.

²¹ As ver ee mac son y theihll, as nee oo genmys eh Yeesey, son sauee eh e phobble veih nyn beccaghyn.

²² (Shoh myr va er ny chooilleeney ooilley ny loayr y Chiarn liorish y phadeyr, gra,

²³ Cur‐my‐ner nee moidyn gientyn, as ver ee mac son y theihll, as nee ad genmys eh Emmanuel, ta shen dy ghra, Jee mârin.)

²⁴ Tra va Joseph eisht er n’irree veih cadley, ren, eh myr va ainle y Chiarn er chur roish, as ghow eh thie e ven:

²⁵ As cha row veg echey dy yannoo r’ee, derrey hug ee e ynrycan vac son y theihll, as denmys eh yn ennym echey Yeesey.