Noo Mark 6 - Yn Conaant Noa 1810

CAB. VI

¹ As hie eh magh veih shen, as haink eh gys e heer hene, as deiyr e ostyllyn er.

² As tra va’n doonaght er jeet ren eh toshiaght dy ynsaghey ayns y synagogue: as ghow ymmodee jeusyn va dy chlashtyn eh yindys mooar, gra, Cre voish ta ny reddyn shoh ec y dooinney shoh? as cre’n chreenaght shoh te’r ny choyrt da, dy vel lheid ny obbraghyn niartal er nyn obbraghey liorish ny laueyn echey?

³ Nagh nee shoh yn seyir, mac Voirrey, braar Yamys as Yoses as Juda as Simon, as nagh vel ny shayraghyn echey ayns shoh mârin? as ghow ad cômys rish.

⁴ Agh dooyrt Yeesey roo, Cha vel phadeyr fegooish ooashley, agh ayns e heer hene, as mastey e chynney hene, as ayns e hie hene.

⁵ As cha dod eh mirril erbee y obbraghey ayns shen, cheu‐mooie jeh dy dug eh e laueyn er regyryn dy leih chingey, as dy ren eh ad y lheihys.

⁶ As ghow eh yindys jeh’n vee‐chredjue oc. As hie eh mygeayrt ny baljyn‐cheerey oc gynsaghey.

⁷ As deïe eh er y daa ostyl yeig huggey, as ren eh toshiaght dy chur ad magh jees as jees, as hug eh daue pooar harrish spyrrydyn neu‐ghlen,

⁸ As sarey gyn ad dy ghoaill red erbee cour nyn yurnah, agh ynrycan lorg: gyn ad dy ghoaill spaagey, ny arran, ny argid ayns nyn sporran:

⁹ Agh dy gholl ayns nyn mraa‐gyn, as gyn ad dy chur orroo daa chooat.

¹⁰ As dooyrt eh roo, Raad erbee dy jed shiu stiagh ayns thie, fuirree jee ayn derrey aagys shiu yn ynnyd shen.

¹¹ As quoi‐erbee nagh jean goaill riu, ny geill y choyrt da ny goan eu, tra vees shiu goll reue, crie‐jee yn joan ta fo ny cassyn eu, son feanish nyn ’oï. Dy firrinagh ta mee gra riu, Dy bee eh ny sassey son Sodom as Gomorrah ec laa ny briwnys, na son yn ard‐valley shen.

¹² As hie ad magh, as ren ad preacheil, sleih dy ghoaill arrys.

¹³ As deiyr ad magh ymmodee drogh‐spyrrydyn, as d’ooilee ad lesh ooil ymmodee sleih chingey, as ren ad ad y laanaghey.

¹⁴ As cheayll ree Herod jeh (son va’n goo echey er n’gholl magh) as dooyrt eh, Dy row Ean Bashtey er n’irree veih ny merriu, as er‐yn‐oyr shen dy row mirrillyn er nyn obbraghey liorish.

¹⁵ Dooyrt paart dy leih, dy nee Elias v’ayn: dooyrt feallagh elley, Dy nee phadeyr v’eh, ny myr fer jeh ny phadeyryn.

¹⁶ Agh tra cheayll Herod jeh, dooyrt eh, She Ean Bashtey t’ayn, hug mish y kione jeh, t’eh er n’irree veih ny merriu.

¹⁷ Son va Herod hene er chur fys magh, as er ghoaill Ean, as er choyrt eh ayns geulaghyn ’sy phryssoon, kyndagh rish Herodias ben e vraar Philip; son v’eh er phoosey ee.

¹⁸ Son va Ean er ghra rish Herod, Te noi yn leigh dhyt ben dty vraarey y ve ayd son ben.

¹⁹ Shen‐y‐fa va Herodias ayns goanlys da, as v’ee shleeuit er cur dy baase eh, agh cha daink eh lh’ee.

²⁰ Son va Herod ayns ammys Ean, toiggal dy row eh ny ghooinney cairagh as crauee, as hug eh geill da, as er y choyrle echey v’eh er n’yannoo ymmodee reddyn, as deaisht eh rish dy arryltagh.

²¹ Agh tra va laa jesh er y hon er jeet, dy ren Herod corrym rish y laa ruggyr eh, shibber y yannoo, son e hiarnyn, ard‐chaptanyn, as deiney ooasle Ghalilee:

²² As haink inneen Herodias cheddin stiagh, as ghaunse ee, as ghow Herod as e ghoaldee va mârish ard‐voggey j’ee, as dooyrt y ree rish y ven‐aeg, Shir orrym’s aghin erbee dy nailt, as giall‐ym dhyt eh.

²³ As loo eh jee, Cre‐erbee hirrys oo orrym, ver‐ym dhyt eh, gys y derrey lieh jeh my reeriaght.

²⁴ As hie ee magh, as dooyrt ee rish e moir, Cre hirrym? As dooyrt ish, Kione Ean Bashtey.

²⁵ As haink ee stiagh er‐y‐chooyl ayns siyr gys y ree, as hir ee, gra, Saillym oo dy chur dou nish hene er claare kione Ean Bashtey.

²⁶ As va’n ree trome trimshagh, ny‐yeih er coontey e loo, as y vooinjer va nyn soie mârish, cha row eh booiagh cur obbal jee.

²⁷ As chelleeragh hug y ree magh marrooder, as doardee eh cur lesh e chione as hie eh, as hug eh yn kione jeh Ean ayns y phryssoon.

²⁸ As hug eh lesh yn kione er claare, as livrey eh eh gys y ven‐aeg: as livrey ish eh gys e moir.

²⁹ As tra cheayll e ynseydee jeh shoh, haink ad as hrog ad e chorp, as doanluck ad eh ayns‐lhiaght.

³⁰ As haink ny ostyllyn cooidjagh gys Yeesey, as dinsh ad da dy chooilley nhee, chammah cre v’ad er n’yannoo, as cre v’ad er n’ynsaghey.

³¹ As dooyrt eh roo, Tar‐jee shiuish er‐lheh gys boayl faasagh, as gow‐jee tammylt dy nyn aash: son va ymmodee cheet as goll, as cha row caa oc wheesh as dy ee.

³² As jimmee ad ayns lhong gys ynnyd faasagh er‐lheh.

³³ Agh honnick y pobble ad goll roue, as hug ymmodee jeu enney er, as roie ad gys shen rish nyn gosh veih dy chooilley ard‐valley, as raink ad gys shen rhymboo, as chruinnee ad huggey.

³⁴ As tra va Yeesey er jeet er thalloo honnick eh earroo mooar dy leih, as v’eh er ny veiyghey lesh chymmey orroo, er‐yn‐oyr dy row ad myr kirree fegooish bochilley: as ren eh toshiaght dy ynsaghey ad ayns ymmodee reddyn.

³⁵ As tra va’n laa nish foddey baarit, haink e ostyllyn huggey, as dooyrt ad, Shoh boayl faasagh, as ta’n traa nish er n’gholl foddey shaghey:

³⁶ Lhig y raad daue, dy vod ad goll er y cheer mygeayrt, as gys ny baljyn cheerey, dy chionnaghey arran daue hene: son cha vel veg y veaghey oc.

³⁷ As dreggyr eshyn as dooyrt eh roo, Cur‐jee shiuish bee daue. As dooyrt ad rish, Nailt shin goll dy chionnaghey feeagh daa cheead ping dy arran, as beaghey ’chur daue?

³⁸ Dooyrt eh roo, Cre‐woad bwilleen t’eu? immee‐jee as jeeagh‐jee. As tra va fys oc, dooyrt ad, Quieg, as daa eeast.

³⁹ As doardee eh daue ad dy chur orroo ooilley soie sheese ayns sheshaghtyn er yn aiyr ghlass.

⁴⁰ As hoie ad sheese ayns roa‐ghyn, keead as lieh‐cheead ayns roa.

⁴¹ As tra v’eh er ghoaill ny queig bwilleenyn as y daa eeast, yeeagh eh seose gys niau, as vannee eh, as vrish eh ny bwilleenyn, as hug eh ad da e ostyllyn dy hoiaghey rhymboo; as y daa eeast rheynn eh ny mast’ oc ooilley.

⁴² As ren ad ooilley gee, as va’d er nyn n’yannoo magh.

⁴³ As hrog ad jeh’n fooilliagh as jeh ny eeastyn lane daa vaskad jeig.

⁴⁴ As v’adsyn v’er n’ee jeh ny bwilleenyn mysh quieg thousane dooinney.

⁴⁵ As chelleragh hug eh er e ostyllyn lhuingys y ghoaill, as ad dy gholl roish gys y cheu elley gys Bethsaida, choud as v’eh cur y pobble ersooyl.

⁴⁶ As tra v’eh er chur ad ersooyl, hie eh seose er slieau dy ghoaill padjer.

⁴⁷ As tra va’n fastyr er jeet, va’n lhong ayns mean ny marrey, as eshyn ny lomarcan er y thalloo.

⁴⁸ As honnick eh ad tooilleil ayns gymmyrt; (son va’n gheay nyn ’oï oc) as mygeayrt y chiarroo arrey jeh’n oie, haink eh huc shooyll er y cheayn, as ren eh myr dy ragh eh shaghey ad.

⁴⁹ Agh tra honnick ad eh shooyll er y cheayn, heill ad dy nee scaan v’ayn, as dyllee ad.

⁵⁰ (Son honnick ad ooilley eh, as v’ad seaghnit.) As chelleeragh loayr eh roo, as dooyrt eh roo, Bee‐jee dy yien mie, she mish t’ayn, ny gow‐jee aggle.

⁵¹ As hie eh seose ’sy lhong huc, as ghow yn gheay fea: as v’ad feer atchimagh ayndoo hene erskyn towse, as goaill yindys.

⁵² Son cha chooinee ad er [mirril] ny bwilleenyn, son va’n cree oc er ny chreoghey.

⁵³ As tra v’ad er n’gholl harrish, haink ad gys cheer Ghennesaret, as hayrn ad gys thalloo.

⁵⁴ As tra v’ad er jeet ass y lhong, chelleeragh hug y sleih enney er,

⁵⁵ As roie ad trooid ooilley yn cheer mygeayrt, as hug ad lhieu er lhiabbaghyn adsyn va ching, raad v’ad clashtyn v’eh.

⁵⁶ As raad erbee dy jagh eh, gys baljyn‐cheerey, ny ard‐valjyn, ny er y cheer, lhie ad yn vooinjer hingey ayns ny raaidyn, as ghuee ad er agh dy ventyn rish oirr e gharmad: as whilleen as venn rish, v’ad er nyn lheihys.