Noo Mark 5 - Yn Conaant Noa 1810

CAB. V

¹ As haink ad harrish gys y cheu elley jeh’n cheayn, gys cheer ny Gadarenee.

² As tra v’eh er jeet ass y lhong, chelleeragh, haink ny whail veih mastey ny oaiaghyn, dooinney lesh spyrryd neu‐ghlen.

³ Va cummal mastey ny oaiaghyn, as cha voddagh dooinney erbee y chiangley eh, eer lesh geulaghyn:

⁴ Er‐y‐fa dy row eh dy mennick er ny ve kianlt lesh yiarnyn as geulaghyn, as va ny geulaghyn er ny ve tayrnit veih‐my‐cheilley liorish, as ny yiarnyn brisht ayns peeshyn: as cha dod dooinney erbee eh y veeinaghey.

⁵ As kinjagh oie as laa v’eh ayns ny sleityn, as mastey ny oaiaghyn gyllagh, as dy ghiarey eh hene lesh claghyn.

⁶ Agh tra honnick eh Yeesey foddey jeh, roie eh, as hug eh ooashley da,

⁷ Agh deïe eh lesh ard‐choraa, as dooyrt eh, Cre’n eïe t’ayd orrym, Yeesey Vac yn Jee smoo ard? ta mee guee ort, ayns ennym Yee gyn oo dy my horchaghey.

⁸ (Son v’eh er ghra rish, Tar magh ass y dooinney, uss spyrryd neu‐ghlen)

⁹ As dênee eh jeh, Cre’n ennym t’ort? As dreggyr eh, gra, Ta m’ennym Legion: son ta shin ymmodee.

¹⁰ As ren eh aghin jeean huggey, gyn eh dy chur ad ersooyl ass y cheer.

¹¹ Nish va ayns shen, er‐gerrey da ny sleityn, griagh mooar dy vucyn fo bochillyn.

¹² As ghuee ooilley ny drogh‐spyrrydyn er, gra, Eiyr shin gys ny mucyn, dy vod magh goll stiagh ayndoo.

¹³ As chelleeragh hug Yeesey kied daue. As hie ny spyrrydyn neu‐ghlen roue, as hie ad stiagh ayns ny mucyn, as roie yn ghriagh gour nyn mullee lesh yn eaynee gys y cheayn (v’ad mysh daa housane) as v’ad plooghit ayns y cheayn.

¹⁴ As roie bochillyn ny mucyn roue, as dinsh ad eh ayns yn ard‐valley, as er y cheer. As hie ad magh dy akin cre va jeant.

¹⁵ As haink ad gys Yeesey, as honnick ad eshyn va’n drogh‐spyrryd as y legion er ny ve ayn, ny hoie, as e eaddagh er, as dy mie ayns e cheeayl, as ghow ad aggle.

¹⁶ As dinsh y vooinjer honnick eh daue, kys ve er daghyrt dasyn va’n drogh‐spyrryd er ve ayn, as myrgeddin mychione ny mucyn.

¹⁷ As ren ad toshiaght dy ghuee er, eh dy gholl roish ass ny ardjyn oc.

¹⁸ As tra v’eh er jeet gys y lhong, ren eshyn va’n drogh‐spyrryd er ve ayn guee er, kied y chur da goll mârish.

¹⁹ Agh cha lhiggagh Yeesey da, agh dooyrt eh rish, Immee thie gys dty vooinjer hene, as insh daue cre ny reddyn mooarey ta’n Chiarn er n’yannoo er dty hon, as dy vel chimmey er ve echey ort.

²⁰ As jimmee eh roish, as ren eh toshiaght dy hoilshaghey magh ayns Decapolis, cre ny reddyn mooarey va Yeesey er n’yannoo er e hon: as ghow dy chooilley ghooinney yindys.

²¹ As tra va Yeesey er n’gholl harrish reesht ayns y lhong gys y cheu elley, va earroo mooar dy leih er nyn jaglym cooidjagh huggey, as v’eh er‐gerrey da’n cheayn.

²² As cur‐my‐ner, haink fer jeh reiltee yn synagogue va enmyssit Jairus, as tra honnick eh eh, huitt eh sheese ec e chassyn.

²³ As ghuee eh er dy jeean, gra, Ta my inneen veg ny lhie raad y vaaish, tar as cur dty laueyn urree, dy vod ee v’er ny lheihys, as bee ee bio.

²⁴ As hie Yeesey mârish, as deiyr ymmodee dy leih, as ren ad chionney stiagh er.

²⁵ (As va ben dy row va seaghnit lesh roie foalley rish daa vlein jeig.

²⁶ As v’ee er hurranse mooarane liorish ymmodee fir‐lhee, as er vaarail ooilley ny v’eck, as cha row ee veg share, agh goll ny smessey,

²⁷ Tra cheayll ee jeh Yeesey, haink ee ayns y chennid cheu e chooylloo, as venn ee rish e gharmad.

²⁸ Son dooyrt ee, My oddym agh bentyn rish e eaddagh, bee’m er my laanaghey.

²⁹ As chelleeragh va’n roie‐foalley eck er ny hyrmaghey: as dennee ee ayns e corp dy row ee er ny lheihys jeh’n doghan shen.

³⁰ As chelleeragh va fys ec Yeesey cheu‐sthie jeh hene, dy row bree er n’gholl ass, as hyndaa eh mygeayrt ayns y chennid, as dooyrt eh, Quoi venn rish my eaddagh.

³¹ As dooyrt e ostyllyn rish, T’ou fakin y pobble chionney stiagh ort, as vel oo gra, Quoi venn rhym?

³² As yeeagh eh mygeayrt dy akin ish v’er n’yannoo shoh.

³³ Agh va’n ven agglagh as er‐creau, gennaghtyn ny va jeant aynjee, as haink ee as huitt eh sheese kiongoyrt rish, as dinsh ee da ooilley yn irriney.

³⁴ As dooyrt eh r’ee, Inneen, ta dty chredjue er dty laanaghey; immee ayns shee, as bee slane jeh dty ghoghan).

³⁵ Choud as v’eh foast loayrt, haink feallagh veih thie fer‐reill y synagogue, dooyrt rish, ta dty inneen marroo, cre s’lhiass dhyt trubbyl sodjey y chur er y vainshter?

³⁶ Tra va Yeesey er chlashtyn yn fockle va loayrit, dooyrt eh rish fer‐reill yn synagogue, Ny gow aggle, ynrycan jean credjal.

³⁷ As cha lhig eh da dooinney erbee cheet geiyrt er, cheu‐mooie jeh Peddyr, as Jamys, as Ean braar Yamys.

³⁸ As haink eh gys thie fer‐reill yn synagogue, as hug eh my‐ner yn boirey, as adsyn va keayney as dobberan dy trimshagh.

³⁹ As tra v’eh er jeet stiagh, dooyrt eh roo, Cre’n‐fa ta ooilley yn anvea as y cheayney shoh? cha vel y ven‐aeg marroo agh ny cadley.

⁴⁰ As hie ad son craidey mysh, agh tra v’eh er chur ad ooilley magh, ghow eh ayr as moir yn ven‐aeg, as adsyn va mârish, as hie eh stiagh raad va’n ven‐aeg ny lhie.

⁴¹ As ghow eh yn ven‐aeg er laue, as dooyrt eh r’ee, Talitha cumi, ta shen dy ghra, Ven‐aeg (ta mee gra rhyt) irree.

⁴² As chelleeragh dirree yn ven‐aeg, as huill ee; son v’ee daa vlein jeig dy eash: as v’ad erskyn‐towse atchimagh.

⁴³ As hug eh currym gyere orroo, nagh voghe dooinney erbee fys er shoh: as doardee eh red ennagh dy ve er ny choyrt j’ee dy ee.