Noo Mark 15 - Yn Conaant Noa 1810

CAB. XV

¹ As chelleeragh ayns y voghrey hug ny ard‐saggyrtyn, as y chanstyr, as ny scrudeyryn, as y slane coonceil, nyn goyrle dy cheilley, as chiangle ad Yeesey, as leeid ad eh ersooyl, as livrey ad eh gys Pilate.

² As dênee Pilate jeh, Nee uss ree ny Hewnyn? As dreggyr eshyn as dooyrt eh rish, Ta mee ny t’ou uss dy ghra.

³ As ren ny ard‐saggyrtyn ymmodee reddyn y lhiassaghey n’oï, agh cha dreggyr eh gys nhee erbee.

⁴ As dênee Pilate jeh reesht, gra, Nagh vel oo cur ansoor erbee? cur‐my‐ner cre whilleen red as t’ad shoh dy lhiassaghey dt’oï.

⁵ As cha dug Yeesey ansoor erbee da; myr shen dy ghow Pilate yindys.

⁶ Nish ec y feailley shen ve [yn cliaghtey dy] eaysley daue un phryssoonagh ec yeearree yn phobble.

⁷ As va fer va enmyssit Barabbas, va ny phryssoonagh mâroosyn v’er n’irree magh mârish, as v’er n’yannoo dunverys ayns nyn irree‐magh.

⁸ As dyllee yn pobble dy ard, as ren ad toshiaght dy ghuee er, Eh dy yannoo er nyn son, myr v’eh rieau cliaghtey.

⁹ Agh dreggyr Pilate ad, gra, Nailliu mee dy easley diu ree ny Hewnyn?

¹⁰ (Son va fys echey dy nee trooid goanlys va ny ard‐saggyrtyn er chur stiagh eh)

¹¹ Agh ghreinnee ny ard‐saggyrtyn y pobble, ad dy yeearree er myr reih, eh dy eaysley daue Barabbas.

¹² As dreggyr Pilate, as dooyrt eh reesht roo, Cre bailliu mee eisht dy yannoo rishyn ta shiu dy enmys ree ny Hewnyn?

¹³ As dyllee ad dy ard reesht, Jean y chrossey eh.

¹⁴ Eisht dooyrt Pilate roo, Cre’n oyr, cre’n olk t’eh er n’yannoo? As dyllee ad wheesh shen s’elgyssee, Jean y chrossey eh.

¹⁵ As er shoh va Pilate booiagh nyn aigney y choyrt da’n pobble, as deayshil eh Barabbas daue, agh livrey eh Yeesey, erreish da ve scuitchit, dy ve er ny chrossey.

¹⁶ As hug ny sidooryn lhieu ersooyl eh gys yn halley va enmyssit Pretorium; as deïe ad er y slane sheshaght dy cheilley.

¹⁷ Ad hug ad er coamrey gorrym‐jiarg, as fee ad attey dy ghrineyn, as hug ad eh mysh y chione echey.

¹⁸ As ren ad toshiaght dy oltaghey da, Dy vannee dhyt, Ree ny Hewnyn.

¹⁹ As woaill ad eh er y chione lesh cuirtliagh, as cheau ad shellaghyn er, as chroym ad nyn ghlioonyn kiongoyrt rish, as hug ad ooashley da.

²⁰ As tra v’ad [myr shoh] er chraidey mysh, ghow ad yn coamrey purple jeh, as hug ad e eaddagh hene er, as chur ad lhieu magh eh dy chrossey eh.

²¹ As d’êginee ad fer va enmyssit Simon Cyrenian va goll shaghey, cheet ass y cheer, ayr Alexander as Rufus, dy ymmyrkey e chrosh.

²² As hug ad lhieu eh gys yn ynnyd Golgotha, ta shen dy ghra ’sy ghlare ainyn, ynnyd bollag.

²³ As hug ad da dy iu, feeyn as myrrh ny chione: agh cha ghow eh eh.

²⁴ As tra v’ad er chrossey eh, reynn ad e gharmadyn, tilgey lottyn orroo, son ayrn dagh dooinney.

²⁵ As ve yn trass oor tra ren ad y chrossey eh.

²⁶ As er‐e‐skyn va scruit oyr e vaaish, REE NY HEWNYN.

²⁷ As mârish ren ad daa vaarliagh y chrossey; fer er e laue‐yesh, as fer elley er e laue‐chiare.

²⁸ As shoh myr va’n scriptyr cooilleenit, ta dy ghra, As v’eh er ny earroo marish ny drogh‐yantee.

²⁹ As loayr yn vooinjer va goll shaghey dy lunagh n’oi, craa nyn ghing, as gra, Ah, uss ta lhieggal y chiamble, as dy hroggal eh reesht ayns three laa,

³⁰ Saue oo hene, as tar neose jeh’n chrosh.

³¹ Er yn aght cheddin neesht ren ny ard‐saggyrtyn craidey mysh, gra ny mast’oc hene marish ny scrudeyryn, Haue eh feallagh elley, agh eh hene cha vod eh sauail.

³² Lhig da Creest Ree Israel cheet neose nish jeh’n chrosh, dy vod mayd fakin as credjal. As ren adsyn v’er nyn grossey mârish, eh y oltooan,

³³ As tra va’n cheyoo oor er jeet, va dorraghys harrish ooilley yn cheer, gys yn nuyoo oor.

³⁴ As ec yn nuyoo oor deïe Yeesey lesh ard‐choraa, gra, Eloi, Eloi, lama sabachthani? ta shen dy ghra ’sy ghlare ainyn, My Yee, My Yee, cre’n‐fa t’ou er my hreigeil?

³⁵ As dooyrt paart jeusyn va nyn shassoo ayns shen, tra cheayll ad shoh, Cur‐my‐ner, t’eh geamagh er Elias.

³⁶ As roie fer, as lhieen eh spunge lesh vinegar, as hug eh eh er cuirtliagh, as heeyn eh huggey dy iu, gra, Faag‐jee eh; hee mayd jig Elias dy ghoaill neose eh.

³⁷ As deïe Yeesey lesh ard‐choraa, as ren eh paartail.

³⁸ As va’n coodaghey va eddyr y chiamble as yn ynnyd casherick raipit veih‐my‐cheilley, veih’n vullagh gys y laare.

³⁹ As tra honnick yn captan‐keead va ny hassoo kiongoyrt rish, dy row eh myr shen er n’eamagh, as er phaartail, dooyrt eh, Dy firrinagh she Mac Yee va’n dooinney shoh.

⁴⁰ Va myrgeddin ymmodee mraane cur‐my‐ner veih foddey: nyn mast’ oc va Moirrey Malaine, as Moirrey moir Yamys byloo as Joses as Salome;

⁴¹ Va myrgeddin er n’eiyrt er, as v’ad shirveishagh da choud’s v’eh ayns Galilee; as mâroosyn ymmodee mraane elley v’er jeet seose mârish gys Jerusalem.

⁴² As nish tra va’n fastyr er jeet (er‐yn‐oyr dy nee traa yn aarlaghey ve, ta shen, yn laa roish yn doonaght)

⁴³ Haink Joseph dy Arimathea, fer‐coyrlee ooasle, va myrgeddin eh hene farkiaght son reeriaght Yee, as cha ghow eh aggle, agh hie eh stiagh dy dunnal gys Pilate, as ren eh aghin son corp Yeesey.

⁴⁴ As ghow Pilate yindys my v’eh hannah marroo: as deïe eh er y centurion huggey, as dênee eh jeh, row eh er ve foddey marroo?

⁴⁵ As tra hooar eh fys er veih’n centurion, hug eh yn corp da Joseph.

⁴⁶ As chionnee eh aanritkeyl as ghow eh neose eh, as hoïll eh eh ayns y aanrit, as doanluck eh eh ayns oaie va cleight ayns creg, as rowll eh clagh er beeayl yn oaie.

⁴⁷ As honnick Moirrey Malaine, as Moirrey moir Yoses, cre raad v’eh er ny oanluckey.