Noo Mark 14 - Yn Conaant Noa 1810

CAB. XIV

¹ Lurg daa laa va feailley ny Caisht as yn arran gyn soorid: as va ny ard‐saggyrtyn as ny scrudeyryn shêgin er goaill eh dy follit, as dy choyrt eh gy baase.

² Agh dooyrt ad, Cha nee er laa ny feailley, er‐aggle dy bee irree‐magh ayn mastey’n pobble.

³ As myr v’eh ny hoie ec bee, ayns Bethany, ayns thie Simon yn lourane, haink ben as box alabaster dy ooil eck, jeh spikenard, feer chostal; as doshil ee yn box, as gheayrt ee eh er y chione echey.

⁴ As va paart va mooaraghey shoh ayns nyn greeaghyn, gra, Cre’n‐fa va’n jummal shoh jeant er yn ooil?

⁵ Son oddagh eh v’er ny ve creckit son ny smoo na three cheead ping, as shen baarit er ny boghtyn. As v’ad jymmoosagh r’ee.

⁶ As dooyrt Yeesey, Faag‐jee veue ee, cre’n eïe t’eu urree? t’ee er n’yannoo obbyr vie orrym’s.

⁷ Son ta ny boghtyn eu kinjagh, mêriu, as tra erbee dy nailliu, foddee shiu ve mie roo: agh mish cha vel eu dy kinjagh.

⁸ T’ee er n’yannoo gys rere e pooar; t’ee er jeet ro‐laue dy ooillaghey my chorp cour my oanluckey.

⁹ Dy firrinagh ta mee gra riu, Cre theihll yn raad bee yn sushtal shoh er ny phreacheil, dy bee shoh t’eeish er n’yannoo, er ny imraa ayns cooinaghtyn jeeish.

¹⁰ As hie Yuaase Iscariot, fer jeh’n daa ostyl yeig, gys ny ard‐saggyrtyn, dy vrah eh huc.

¹¹ As tra cheayll ad shoh, ghow ad boggey jeh, as ghiall ad argid da. As v’eh fieau er caa dy vrah eh.

¹² As er yn chied laa j’ehn arran caisht, tra va’d marroo yn Eayn‐caisht, dooyrt e ostyllyn rish, Cre’n raad sailt shin dy gholl, as dy yannoo aarloo dhyts, dy ee yn Eayn‐caisht?

¹³ As hug eh magh jees jeh e ostyllyn, as dooyrt eh roo, Immee‐jee gys yn ard‐valley, as hig nyn guail dooinney cur lesh saagh craïe dy ushtey: eiyr‐jee ersyn.

¹⁴ As raad erbee dy jed eh stiagh, abbyr‐jee rish y fer‐thie, Ta’n Mainshter gra, Cre vel shamyr ny goaldee, raad nee’m yn Eayn‐caisht y ee marish my ostyllyn?

¹⁵ As jeeaghee eh diu ard‐shamyr mooar soit magh as jeant aarloo: ayns shen aarlee‐jee er nyn son.

¹⁶ As jimmee ny ostyllyn rhymboo, as tra v’ad er jeet gys yn ard‐valley, hooar ad myr v’eh er ghra roo: as daarlee ad yn Eayn‐caisht.

¹⁷ As ec yn astyr haink eh marish yn daa ostyl yeig.

¹⁸ As myr v’ad nyn soie ec bee, dooyrt Yeesey, Dy firrinagh ta mee gra riu, Dy jean fer jiuish ta gee mârym mish y vrah.

¹⁹ As ren ad toshiaght dy ve trimshagh, as dy ghra rish, fer lurg fer, Nee mish eh? as dooyrt fer elley, Nee orrym’s t’ou cheet?

²⁰ As dreggyr eh, as dooyrt eh roo, She fer jeh’n daa ostyl yeig eh, ta cur e laue mârym ayns y chlaare.

²¹ Ta Mac y dooinney dy jarroo goll myr te scruit jeh: agh smerg da’n dooinney shen, liorish ta Mac y dooinney er ny vrah; s’mie veagh eh er ve son y dooinney shen nagh beagh eh rieau er jeet er y theihll.

²² As myr v’ad gee, ghow Yeesey arran, as vannee eh, as vrish eh eh, as hug eh eh daue, gra, Gow‐jee, ee‐jee, shoh my chorp.

²³ As ghow eh yn cappan, as tra v’eh er chur booise, hug eh eh daue: as diu ad ooilley jeh.

²⁴ As dooyrt eh roo, Shoh my uill’s jeh’n conaant noa, t’er ny gheayrtey son ymmodee.

²⁵ Dy firrinagh ta mee gra riu, Nagh n’iu‐ym arragh jeh mess y villey‐feeyney, derrey’n laa iu‐ym eh ass‐y‐noa ayns reeright Yee.

²⁶ As tra va’d er ghoaill arrane‐moyllee, hie ad magh gys cronk ny Oliveyn.

²⁷ As dooyrt Yeesey roo, Failee yn credjue euish ooilley noght kyndagh rhym’s: son te scruit, Bwoaill‐ym’s ny bochilley, as bee ny kirree er nyn skeayley.

²⁸ Agh erreish dou ver n’irree reesht, hem reue gys Galilee.

²⁹ Agh dooyrt Peddyr rish, Ga dy vaill credjue dy chooilley unnane, foast cha vaill my chredjue’s.

³⁰ As dooyrt Yeesey rish, Dy firrinagh ta mee gra rhyt, Yn laa jiu, eer yn oie noght roish my gerr y kellagh daa cheayrt, dy nob uss mish three keayrtyn.

³¹ Agh loayr eshyn ny s’jeean‐ney, Dy beign dy gholl gy‐baase mayrt, cha nobbin oo er coontey erbee. As er yn aght cheddin loayr ad ooilley.

³² As haink ad gys ynnyd va enmyssit Gethsemane: as dooyrt eh rish e ostyllyn, Soie‐jee shiuish ayns shoh, choud as hem’s gys padjer.

³³ As ghow eh mârish Peddyr as Jamys as Ean, as ren eh toshiaght dy ve mooar seaghnit as trome‐chreeagh,

³⁴ As dooyrt eh roo, Ta my annym feer trimshagh eer gys y baase: fuirree‐jee ayns shoh, as freill‐jee arrey.

³⁵ As hie eh red beg er e hoshiaght, as huitt eh er y thalloo, as ghow eh padjer, my oddys eh ve yn oor shen dy gholl shaghey.

³⁶ As dooyrt eh, Abba, Ayr, ta dy chooilley nhee ayns dty phooar, gow ersooyl yn cappan shoh voym: ny‐yeih cha nee my aigney’s, agh dty aigney’s dy row jeant.

³⁷ As haink eh as hooar eh ad nyn gadley, as dooyrt eh rish Peddyr, Simon, vel uss dty chadley? nagh voddagh oo arrey y reayll mârym un oor?

³⁸ Bee‐jee er nyn arrey, as gow‐jee padjer, nagh duitt shiu ayns miolagh: ta’n spyrryd eu dy jarroo arryltagh, agh ta’n eill annoon.

³⁹ As hie eh roish reesht, as ghow eh padjer, as loayr eh ny goan cheddin.

⁴⁰ As tra haink eh reesht, hooar eh ad nyn gadley reesht, (son va ny sooilyn oc trome) as cha row fys oc cre’n ansoor dy chur da.

⁴¹ As haink eh yn trass cheayrt, as dooyrt eh roo, Caddil‐jee nish, as gow‐jee nyn vea; s’liooar eh, ta’n oor er jeet; cur‐my‐ner ta Mac y dooinney er ny vrah gys laueyn peccee.

⁴² Trog jee erriu, lhig dooin goll: cur‐my‐ner, ta eshyn er‐gerrey dooin ta dy my vrah.

⁴³ As chelleeragh choud as v’eh foast loayrt, haink Yuaase, fer jeh’n daa ostyl yeig, as mârish va sheshaght vooar lesh cliwenyn as luirg, veih ny ard‐saggyrtyn, as ny scrudeyryn, as y chanstyr.

⁴⁴ As hug eshyn v’er vrah eh cowrey daue, gra, Quoi‐erbee ver‐yms paag da, shen eh; gow‐jee eh, as leeid‐jee eh ersooyl dy sauchey.

⁴⁵ As cha leah as v’eh er jeet, hie eh chelleeragh huggey, as dooyrt eh, Vainshter, vainshter; as phaag ad eh.

⁴⁶ As hug ad nyn laueyn er, as ghow ad eh.

⁴⁷ As hayrn fer jeusyn va nyn shassoo mârish cliwe, as woaill eh fer mooinjerey yn ard‐saggyrt, as ghiare eh e chleaysh jeh.

⁴⁸ As dreggyr Yeesey, as dooyrt eh roo, Vel shiu er jeet magh myr noi marliagh, lesh cliwenyn as luirg dy my ghoaill?

⁴⁹ Va mee mêriu gagh laa ayns y chiamble, gynsaghey, as cha ghow shiu mee: agh shegin da ny scriptyryn v’er nyn gooilleeney.

⁵⁰ As ren ny ostyllyn ooilley treigeil eh as cosney roue.

⁵¹ As deiyr er dooinney aeg dy row, nagh row monney agh bril‐leen mysh e chorp; as haare ny deiney aegey greme er.

⁵² As daag eh yn vrilleen, as chossyn eh voue rooisht.

⁵³ As hug ad lhieu Yeesey ersooyl gys yn ard‐saggyrt: as mârishyn v’er nyn jaglym cooidjagh ooilley ny ard‐saggyrtyn as y chanstyr, as ny scrudeyryn.

⁵⁴ As deiyr Peddyr er foddey ny yeï, gys eer plaase yn ard‐saggyrt: as hoie eh marish yn vooinjer, as hiow eh eh‐hene ec yn aile.

⁵⁵ As va ny ard‐saggyrtyn as ooilley’n choonceil shirrey feanishyn noi Yeesey dy chur eh gy baase; as cha dooar ad veg.

⁵⁶ Son dymmyrk ymmodee feanish foalsey n’oï, agh cha row yn eanish oc coardail ry‐cheilley.

⁵⁷ As dirree shiartanse, as dymmyrk ad feanish foalsey n’oï, gra,

⁵⁸ Cheayll shin eh gra, Lhieg‐yms y chiamble shoh ta jeant lesh laueyn, as cheu‐sthie jeh three laa, trog‐ym chiamble elley vees jeant fegooish laueyn.

⁵⁹ Agh myr shen hene cha row yn eanish oc coardail ry‐cheilley.

⁶⁰ As hass yn ard‐saggyrt seose ayns mean y cheshaght, as dênee eh jeh Yeesey, gra, Nagh vel oo cur ansoor erbee? cre ta ny feanishyn shoh dy lhiassaghey dt’oï?

⁶¹ Agh v’eh ny host, as cha dug eh ansoor erbee. Reesht dênee yn ard‐saggyrt jeh, as dooyrt eh rish, Nee uss yn Creest, Mac yn Er‐vannit?

⁶² As dooyrt Yeesey, She shen mee: as hee shiuish Mac y dooinney ny hoie er laue yesh y phooar, as cheet ayns bodjallyn yn aer.

⁶³ Eisht raip yn ard‐saggyrt e eaddagh, as dooyrt eh, Cre’n feme t’ain er feanishyn erbee sodjey?

⁶⁴ Ta shiu er chlashtyn ny goan‐mollaghtagh? cre ta shiu smooinaghtyn? As hug ad ooilley briwnys er, dy row eh toilchin baase.

⁶⁵ As ren paart toshiaght dy cheau shellaghyn er, as dy choodaghey yn eddin echey, as dy woalley eh, as dy ghra rish, Jean phadeyrys: as woaill ny sidooryn eh lesh nyn massyn.

⁶⁶ As myr va Peddyr heese ayns halley yn ard‐saggyrt, haink unnane jeh ny sharvaantyn,

⁶⁷ As tra honnick ee Peddyr dy hiow eh hene, yeeagh ee er, as dooyrt ee, As v’ou uss neesht marish Yeesey dy Nazareth.

⁶⁸ Agh dob eh, gra, Cha vel fys ny toiggal aym, cre t’ou dy ghra. As hie eh magh ayns y phorch; as gherr y kellagh.

⁶⁹ As honnick ben‐aeg elley eh reesht, as ren ee toshiaght dy ghra rish y cheshaght, T’eh shoh fer jeu.

⁷⁰ As dob eh reesht. As tammylt ny lurg shen, dooyrt paart jeh’n cheshaght, reesht rish Peddyr, Son shickyrys t’ou uss fer jeu: son she Galilean oo, as ta dty ghlare dy hoilshaghey eh.

⁷¹ Agh ren eh toshiaght dy ghweeaghyn as dy loo, gra, Cha nione dou yn dooinney shoh mychione ta shiu loayrt.

⁷² As ren y kellagh gerrym yn nah cheayrt. As chooinee Peddyr er ny goan va Yeesey er loayrt rish, Roish my gerr y kellagh daa cheayrt, nee uss mish y obbal three keayrtyn. As tra smooinee eh er shen, ren eh keayney.