Noo Mark 12 - Yn Conaant Noa 1810

CAB. XII

¹ As ren eh toshiaght dy loayrt roo liorish coraaghyn‐dorraghey. Va dooinney dy row ren garey‐feeyney y hoiaghey, as ren eh cleigh mygeayrt‐y‐mysh, as chleiy eh ynnyd son y press‐feeyney, as hrog eh toor, as hoie eh eh rish eir‐rinnee, as hie eh gys cheer foddey.

² As ec yn imbagh cooie hug eh shaarvant gys ny eirinnee, dy gheddyn veih ny eirinnee jeh mess y gharey feeyney.

³ As ghow ad as woaill ad eh, as hug ad eh er ersooyl follym.

⁴ As reesht hug eh huc sharvaant elley; as ersyn cheau ad claghyn, as vrish ad y kione er, as hug ad eh ersooyl lesh dellal feer scammyltagh.

⁵ As reesht hug eh huc sharvaant elley; as eshyn ren ad y vârroo: as ymmodee elley, bwoalley paart, as marroo paart.

⁶ As va echey foast un vac, er v’eh feer ghraihagh, as hug eh eshyn myrgeddin ec y jerrey huc, gra, Ver ad arrym da my vac.

⁷ Agh dooyrt ny eirinnee shen ny mast’ oc hene, Shoh’n eirey: tar‐jee as lhig dooin eh y varroo, as bee yn eiraght lhien hene.

⁸ As ghow ad, as varr ad eh, as hilg ad eh magh ass y gharey‐feeyney.

⁹ Cre nee Chiarn y gharey‐feeyney er‐y‐fa shen y yannoo? hig eh as stroie‐ee eh ny eirinnee, as ver eh yn garey‐feeyney da eirinnee elley.

¹⁰ Nagh vel shiuish er lhaih ayns goo Yee? Ta’n chlagh ren ny masoonee y vee‐lowal, er jeet dy ve yn ard chlagh chorneilagh.

¹¹ Shoh va jannoo yn Chiarn, as te yindyssagh ayns ny sooillyn ainyn.

¹² As v’ad shêgin er goaill eh, agh v’ad ayns aggle roish y pobble; son va fys oc dy row eh er loayrt yn coraa‐dorraghey noi ad hene: as daag ad eh, as hie ad rhymboo.

¹³ As hug ad huggey shiartanse jeh ny Phariseeyn, as ny Herodianee, dy ghoaill vondeish jeh ayns e ghoan.

¹⁴ As tra v’ad er jeet, dooyrt ad rish, Vainshter, ta fys ain dy vel oo firrinagh, as nagh vel oo ayns imnea roish dooinney erbee; son cha vel oo soiaghey jeh persoon deiney, agh gynsaghey raad Yee ayns firrinys: vel eh lowal keesh y choyrt da Cesar, mannagh vel?

¹⁵ Jean mayd coyrt, ny dyn coyrt? Agh va fys echeysyn er y chialgeyrys oc, as dooyrt eh roo, Cre’n‐fa ta shiu shirrey dy my ghoaill ayns ribbey? cur‐jee lhieu ping hym, dy vaik‐ym eh.

¹⁶ As hug ad lhieu eh: as dooyrt eh roo, Quoi gys ta’n cowrey as y screeu shoh bentyn? As dooyrt adsyn rish, Gys Cesar.

¹⁷ As dreggyr Yeesey, as dooyrt eh roo, Eeck‐jee da Cesar, shen ny ta lesh Cesar, as da Jee, ny reddyn ta lesh Jee. As ghow ad yindys jeh.

¹⁸ Eisht haink huggey ny Sadduceeyn, ta gra nagh vel irree‐seose‐reesht dy ve ayn; as dênee ad jeh, gra,

¹⁹ Vainshter, ta Moses er scrieu dooin, My ta braar dooinney geddyn baase, as faagail e ven ny yei, gyn cloan echey r’ee, dy vel e vraar dy phoosey yn ven echey, as dy hroggal seose sluight da e vraar.

²⁰ Nish va shiaght braaraghyn: as ghow yn braar shinney ben, agh geddyn baase cha daag eh sluight.

²¹ As ghow yn nah vraar ee, as hooar eh baase, as cha daag eh sluight: as y trass myrgeddin.

²² As v’ee ec y chiaght, as cha daag ad sluight: er‐jerrey ooilley hooar y ven baase myrgeddin.

²³ Shen‐y‐fa ec yn irree‐seose‐reesht veih ny merriu, tra nee ad girree, quoi jeu vees ee echey son ben? son v’ee ny ben da’n chiaght.

²⁴ As dreggyr Yeesey as dooyrt eh roo, Nagh vel shiu er‐y‐fa shen fo marrynys, er‐yn‐oyr nagh vel toiggal eu jeh goo ny jeh pooar Yee?

²⁵ Son ec yn irree‐seose‐reesht veih ny merriu, cha vel ad poosey, ny er nyn goyrt ayns poosey: agh t’ad myr ny ainleyn t’ayns niau.

²⁶ As mychione ny merriu, dy nirree ad; nagh vel shiu er lhaih ayns lioar Voses, kys loayr Jee rish ass y thammag, gra, Mish Jee Abraham, as Jee Isaac, as Jee Yacob?

²⁷ Cha nee Jee ny merriu eh, agh Jee ny bioee: ta shiu er‐y‐fa shen fo marranys vooar.

²⁸ As haink fer jeh ny scrudeyryn cheayll ad resooney cooidjagh, as cur tastey dy row eh er n’ansoor ad dy mie, dênee eh jeh, Cre’n ard‐anney jeh ny annaghyn ooilley.

²⁹ As dreggyr Yeesey eh, Yn chied anney jeh ooilley ny annaghyn, Clasht, O Israel, Ta’n Chiarn yn Jee ain yn ynrycan Chiarn;

³⁰ As ver oo graih da’n Chiarn dty Yee lesh ooilley dty chree, as lesh ooilley dty annym, as lesh ooilley dty aigney, as lesh ooilley dty niart: shoh’n chied anney.

³¹ As ta’n nah anney casley rish, ta shen dy ghra, Ver oo graih da dty naboo, myr dhyt hene: cha vel anney erbee elley smoo na ad shoh.

³² As dooyrt y scrudeyr rish, S’mie shen, Vainshter, t’ou er loayrt yn irriney: son ta un Jee ayn, as cha vel Jee erbee elley agh eh hene.

³³ As dy ve graihagh er lesh ooilley yn chree, as lesh ooilley yn tushtey, as lesh ooilley yn annym, as lesh ooilley yn niart, as dy ve graihagh er e naboo myr er hene, ta shen ny smoo na ooilley ny slane chebballyn‐losht as ourallyn.

³⁴ As tra honnick Yeesey dy dansoor eh dy tushtagh, dooyrt eh rish, Cha vel oo foddey veih reeriaght Yee. As cha by‐lhoys da dooinney erbee maghey shen question erbee sodjey y chur huggey.

³⁵ As dreggyr Yeesey myr v’eh gynsaghey ayns y chiamble, as dooyrt eh, Kys ta ny scrudeyryn gra dy nee Creest mac Ghavid?

³⁶ Son ta David eh hene er ghra liorish y Spyrryd Noo, Dooyrt y Chiarn rish my Hiarn’s, Soie uss er my laue yesh, derrey ver‐ym dty noidyn son stoyl dty choshey.

³⁷ Ta David er‐y‐fa shen eh hene genmys eh ny Hiarn; as kys t’eh eisht yn mac echey? As deaisht yn pobble v’er nyn jaglym cooidjagh rish dy arryltagh.

³⁸ As dooyrt eh roo, myr v’eh gynsagh, Bee‐jee er nyn dwoaie jeh ny scrudeyryn, ta geearree shooyll ayns coamraghyn liauyrey, as sleih dy vannaghey daue ayns ny margaghyn,

³⁹ As ny ard‐stuill y ve oc ayns ny synagogueyn, as ny ard ynnydyn‐soie cuirraghyn:

⁴⁰ T’ad cur mow thieyn mraane‐treoghe, as son scaa dy chraueeaght lhiggey orroo dy ve mennick ec padjer: ta briwnys strimmey ny chour oc shoh.

⁴¹ As myr va Yeesey ny hoie liorish kishtey yn stoyr, ghow eh tastey kys va’n pobble cur argid ayns y stoyr: as ren ymmodee va berchagh cur ayn dy palchey.

⁴² As haink ben voght treoghe dy row, as hilg ee ayn daa vite ta jannoo farling.

⁴³ As deïe eh er e ostyllyn huggey, as dooyrt eh roo, Dy firrinagh ta mee gra riu, dy vel y ven‐treoghe voght shoh er chur ny smoo ayns kishtey yn stoyr, na dy chooilley unnane t’er choyrt ayn.

⁴⁴ Son t’adsyn ooilley er chur ayns ass nyn balchey: as t’eeish myr s’boght ee, er choyrt ayn ooilley ny v’eck, dy jarroo ooilley e cooid‐seihlt.