Jannoo 8 - Yn Conaant Noa 1810

CAB. VIII

¹ As va aigney Saul lhieu ayns y choyrt eh gy‐baase. As ec y traa shen va tranlaase er ny yannoo er yn agglish va ec Jerusalem; as va’d ooilley er nyn skeayley magh trooid cheeraghyn Yudea as Samaria, cheu‐mooie jeh ny ostyllyn.

² As hrog deiney crauee lhieu Steaon dy oanluckey eh, as ren ad dobberan hrimshagh harrish.

³ Agh ren Saul cragh jeh’n agglish, goll stiagh ayns thieyn, as sleodey magh deiney as mraane, as dyn dilgey ad ayns pryssoon.

⁴ Shen‐y‐fa hie yn vooinjer v’er nyn skeayley magh, trooid ymmodee ardjyn, preacheil y goo.

⁵ Agh hie Philip sheese gys ard‐valley Samaria, as ren eh Creest y phreacheil daue.

⁶ As hug yn pobble geill lesh un aigney da’n goo va Philip dy loayrt, clashtyn as fakin ny mirrillyn v’eh dy yannoo.

⁷ Son va Spyrrydyn neu‐ghlen, geamagh lesh ard‐choraa, cheet magh ass ymmodee va seaghnit lhieu: as va ymmodee va’n palsee orroo, as va baccagh er ny lheihys.

⁸ As va boggey mooar ayns yn ard‐valley shen.

⁹ Agh va dooinney dy row enmyssit Simon, va er chliaghtey obbeeys ’syn ard‐valley cheddin, as er chur shaghrynys er pobble Samaria, boggyssagh jeh hene dy ve ny ard‐ghooinney ennagh.

¹⁰ Da shoh v’ad ooilley cur tastey, beg as mooar, gra, Yn dooinney shoh pooar vooar Yee.

¹¹ As da shoh v’ad arrymagh, er‐y‐fa dy row eh ry‐foddey er chur shaghrynys orroo lesh yn obbeeys echey.

¹² Agh tra v’ad er chredjal Philip, preacheil ny reddyn va bentyn rish reeriaght Yee, as ennym Yeesey Creest, v’ad er nyn mashtey chammah deiney as mraane.

¹³ As va Simon hene er hyndaa gys y chredjue: as tra v’eh er ny vashtey, duirree eh marish Philip, goaill yindys, as cur tastey da ny mirrilyn as ny cowraghyn v’er nyn obbraghey.

¹⁴ Nish tra va ny ostyllyn va ec Jerusalem er chlashtyn dy row Samaria er ghoaill goo Yee, hug ad huc Peddyr as Ean.

¹⁵ As tra v’ad er jeet neose, ghuee ad er nyn son dy voddagh ad y Spyrryd Noo y gheddyn.

¹⁶ (Son cha row eh foast er duittym er veg jeu: agh v’ad ynrycan er nyn mashtey ayns ennym y Chiarn Yeesey.)

¹⁷ Eisht hug ad nyn laueyn orroo, as hooar ad y Spyrryd Noo.

¹⁸ As tra honnick Simon dy row yn Spyrryd Noo er ny choyrt liorish goll‐fo‐laue ny hostyllyn, heb eh daue argid,

¹⁹ Gra, Cur‐jee dooys neesht yn phooar shoh, quoi‐erbee ver‐ym my laueyn er, dy vod eh yn Spyrryd Noo y gheddyn.

²⁰ Agh dooyrt Peddyr rish, Lhig da dty argid as oo hene cherraghtyn cooidjagh, er‐yn‐oyr dy vel oo er smooinaghtyn dy vod gioot Yee ve kionnit lesh argid.

²¹ Cha vel aart ny paart ayd ’sy chirveish shoh: son cha vel dty chree ynrick ayns shilley Yee.

²² Gow arrys er‐y‐fa shen jeh dty olkys, as guee gys Jee, hoiggal dy vod smooinaghtyn dty chree v’er ny leih dhyt.

²³ Son hee‐ym dy vel oo ayns y ghall dy herriuid, as yn gheuley dy vee‐chraueeaght.

²⁴ Eisht dreggyr Simon, as dooyrt eh, Guee‐jee shiuish gys y Chiarn er my hon, nagh jig veg jeh ny reddyn ta shiuish er loayrt, orrym.

²⁵ As tra v’ad er n’ymmyrkey feanish as er phreacheil goo yn Chiarn, hie ad reesht gys Jerusalem, as ren ad y sushtal y phreacheil ayns ymmodee jeh baljyn ny Samaritanee.

²⁶ As loayr ainle y Chiarn rish Philip, gra, Trog ort, as immee my‐yiass, gys y raad goll sheese veih Jerusalem gys Gaza, trooid yn aasagh.

²⁷ As hrog eh er, as jimmee eh: as cur‐my‐ner dooinney jeh Ethiopia, ny eunuch, as ayns ard‐oik fo Candace ben‐reïn ny Ethiopianee, fo’n churrym echey va ooilley ny tashtaghyn eck, va er jeet gys Jerusalem dy ooashlaghey Jee,

²⁸ As myr v’eh er y raad thie, ny hoie ayns e ainagh, as lhaih Esaias yn phadeyr.

²⁹ Eisht dooyrt y Spyrryd rish Philip, Immee er‐gerrey as jean sheshaght rish yn ainagh shoh.

³⁰ As roie Philip huggey, as cheayll eh eh lhaih yn phadeyr Esaias, as dooyrt eh, Vel oo toiggal cre t’ou dy lhaih?

³¹ As dooyrt eh, Kys oddym, mannagh bee fer ennagh aym dy chur roym? as ghuee eh er Philip eh dy heet seose, as dy hoie mârish.

³² Yn ayrn jeh’n scriptyr v’eh dy lhaih, she shoh ve, V’eh er ny leeideil myr keyrrey gys y skynn, as myr yn eayn balloo roish e lommyrtagh, myr shen cha doshil eshyn e veeal:

³³ Kyndagh rish e injillid va e vriwnys er ny chassey: as quoi oddys fockley‐magh e ghooghys [flaunyssagh]? son va e vioys goit ersooyl veih’n thalloo.

³⁴ As dansoor yn eunuch, as dooyrt eh rish Philip, Guee‐ym ort, quoi jeh ta’n phadeyr loayrt shoh, nee jeh hene, ny jeh dooinney ennagh elley?

³⁵ Eisht doshil Philip e veeal, as ghow eh toshiaght ec y scriptyr cheddin, as ren eh Yeesey y phreacheil da.

³⁶ As myr v’ad goll er y raad, haink ad gys ushtey dy row: as dooyrt yn eunuch, Jeeagh, shoh ushtey; cre ta dy my lhiettal’s dy ve bashtit?

³⁷ As dooyrt Philip, My t’ou credjal lesh ooilley dty chree, foddee oo. As dreggyr eshyn as dooyrt eh, Ta mee credjal dy nee Yeesey Creest mac Yee.

³⁸ As doardee eh da’n ainagh shassoo: as hie ad ny neesht sheese ayns yn ushtey, chammah Philip as yn eunuch; as vasht eh eh.

³⁹ As tra v’ad er jeet seose ass yn ushtey, hrog Spyrryd y Chiarn lesh Philip ersooyl nagh vaik yn eunuch eh arragh: as hie eh er y raad goaill boggey.

⁴⁰ Agh va Philip er ny gheddyn ec Azotus, as goll er e hoshiaght ren eh yn sushtal y phreacheil ayns ooilley ny ard‐valjyn, derrey haink eh gys Cesarea.