Jannoo 7 - Yn Conaant Noa 1810

CAB. VII

¹ Eisht dooyrt yn ard‐saggyrt, Nee shoh myr te?

² As dooyrt eshyn, Gheiney, vraaraghyn, as ayraghyn, eaisht‐jee, Ren Jee ny ghloyr eh hene y hoilshaghey da nyn ayr Abraham, tra v’eh ayns Mesopotamia, roish my row eh cummal ayns Charran,

³ As dooyrt eh rish, Gow magh veih dty heer hene, as dty chynney hene, as tar gys y cheer neem’s y yeeaghyn dhyt.

⁴ Eisht haink eh magh ass cheer ny Caldeanee, as ren eh baghey ayns Charran: as veih shen, lurg baase e ayrey, scugh eh eh gys y cheer shoh raad ta shiuish nish cummal.

⁵ As cha dug eh eiraght erbee da ayn, wheesh as lheead trie: foast ghiall eh dy jinnagh eh da eh son eiraght, as da e luight ny‐yeï, tra v’eh foast gyn cloan.

⁶ As loayr Jee er yn aght shoh, Dy row yn sluight echey dy vaghey ayns cheer joarree, as dy vreillagh ad fo bondiaght, as dy dellagh ad dy holk roo kiare cheead bleïn.

⁷ As yn ashoon shen daue vees ad ayns bondiaght neem’s y vriwnys dooyrt Jee: as ny lurg shen hig ad magh, as shirveishee ad mee a’sy voyl shoh.

⁸ As hug eh da conaant y ghiarey‐chymmylt: as myr shen hooar Abraham Isaac, as ren eh eh y ghiarey‐chymmylt er yn hoghtoo laa, as hooar Isaac Jacob, as Jacob yn daa henn‐ayr jeig.

⁹ Agh ny shenn‐ayryn greinnit lesh troo chreck ad Joseph gys Egypt, agh va Jee mârish,

¹⁰ As livrey eh eh veih ooilley e heaghyn, as hug eh da foayr as creenaght ayns shilley Pharoah ree Egypt; as ren eh eh ny chiannoort er Egypt, as ooilley e hie.

¹¹ Nish haink genney harrish ooilley cheer Egypt as Chanaan, as seaghyn mooar; as cha voddagh ny ayraghyn ain beaghey y gheddyn.

¹² Agh tra cheayll Jacob dy row arroo ayns Egypt, hug eh magh ny ayraghyn ain hoshiaght.

¹³ As yn nah cheayrt ren Joseph eh hene y hoilshaghey da e vraaraghyn; as va kynney Yoseph er ny hoilshaghey da Pharoah.

¹⁴ Eisht hug Joseph fys, as chuirr eh yn ayr echey Jacob huggey, as ooilley e chynney, three‐feed as queig anmeenyn jeig.

¹⁵ As hie Jacob sheese gys Egypt, as hooar eh baase, eh hene as nyn shenn‐ayryn,

¹⁶ As v’ad er nyn goyrt lhieu harrish gys Sichem, as er nyn oanluckey ayns yn oaie va Abraham er chionnaghey son sym dy argid, veih mec Emmor ayr Sichem.

¹⁷ Agh tra va earish yn ghialdyn, va Jee er vreearrey da Abraham, tayrn er‐gerrey, daase yn pobble, as vishee ad ayns Egypt,

¹⁸ Derrey dirree ree elley, nagh bione da Joseph.

¹⁹ Ghell eh shoh dy foalsey rish y chynney ain, as hug eh drogh‐chorrym da nyn ayraghyn, myr shen dy row ad êginit nyn gloan veggey y hilgey magh, dy ve stroit.

²⁰ Ayns y traa shoh rug Moses, as v’eh lhiannoo erskyn towse aalin, as v’eh er ny voandyrys dy follit three meeghyn ayns thie e ayrey:

²¹ As tra v’eh er ny hilgey magh, ghow inneen Pharaoh eh, as hrog ee eh son mac jee hene,

²² As hie Moses er ynsaghey ayns ooilley creenaght ny Egyptianee, as v’eh pooaral ayns goo as jannoo.

²³ As tra v’eh slane da‐eed bleïn dy eash, haink eh ayns e chree dy gholl dy yeeaghyn e vraaraghyn cloan Israel.

²⁴ As fakin fer jeu surranse aggair, hass eh er e lieh, as goaill cooilleen er y tranlaasagh er e hon, varr eh yn Egyptian:

²⁵ Son heill eh dy beagh e vraaraghyn er hoiggal kys dy row Jee kiarail, dy choyrt livrey‐ys daue liorish y laue echeysyn; agh cha row toiggal oc jeh.

²⁶ As laa ny vairagh haink eh ny vud oc myr v’ad ec streeu ry‐cheilley, as baillish ad y hayrn gys coardail, gra, Gheiney, she braaraghyn shiu; cre’n‐fa ta shiu jannoo aggair yn derrey yeh da’n jeh elley?

²⁷ Agh hug eshyn va jannoo aggair da e naboo eddin da, gra, Quoi ren uss dty er‐reill as dty vriw harrin?

²⁸ Bailt mish y varroo, myr varr oo yn Egyptian jea?

²⁹ Eisht hie Moses er‐chea tra cheayll eh shoh, as v’eh ny yoarree ayns cheer Vadian, raad hooar eh daa vac.

³⁰ As kione da‐eed bleïn, haink huggey ayns faasagh cronk Sina, ainle y Chiarn ayns lossey dy aile ayns thammag.

³¹ Tra honnick Moses shoh, ghow eh yindys jeh’n shilley: as myr v’eh tayrn er‐gerrey dy chur tastey da, haink coraa yn Chiarn huggey,

³² Gra, Mish Jee dty ayraghyn, Jee Abraham, as Jee Isaac, as Jee Yacob. Eisht va Moses er‐creau, as cha by‐lhoys da jeeaghyn.

³³ Agh dooyrt y Chiarn rish, Cur jeed dty vraagyn jeh dty chassyn: son y boayl t’ou dy hassoo er she grunt casherick eh.

³⁴ Ta mee er vakin, ta mee er vakin seaghyn my phobble t’ayns Egypt, as er chlashtyn ny osnaghyn oc, as ta mee er jeet neose dy livrey ad. As nish tar royd, ver‐yms uss er chaghteraght gys Egypt.

³⁵ Yn Moses shoh ren adsyn y obbal, gra, Quoi ren uss dty er‐reill as dty vriw? Eh shoh hug Jee dy ve ny er‐reill as dy choyrt livrey‐ys liorish laueyn yn ainle honnick eh ayns y thammag.

³⁶ Hug eh lesh ad magh, erreish da v’er hoilshaghey yindyssyn as cowraghyn ayns thalloo Egypt as ayns y faarkey‐jiarg, as ayns yn aasagh rish da‐eed bleïn.

³⁷ Shoh va’n Moses cheddin dooyrt rish cloan Israel, Phadeyr nee yn Chiarn y Jee eu y hroggal seose diu jeh nyn mraaraghyn, casley rhym’s; dasyn v’er shiu geill.

³⁸ Shoh eh va harrish yn agglish ayns yn aasagh, marish yn ainle loayr rish er cronk Sina, as rish ny ayraghyn ain: eh hooar goan ny bea dy choyrt ad dooinyn.

³⁹ Da nagh baillish ny ayraghyn ain ve biallagh, agh yioold ad rish, as ayns nyn greeaghyn hyndaa ad back reesht gys Egypt.

⁴⁰ Gra rish Aaron, Jean dooinyn Jeeaghyn hed roïn: er son Moses shoh hug lesh shin magh ass thalloo Egypt, cha s’ain cre’n erree t’er jeet er.

⁴¹ As ren ad co‐chaslys lheiy ayns ny laghyn shen, as heb ad oural da’n jalloo, as ghow ad boggey ayns obbraghyn ny laueyn oc hene.

⁴² Eisht hyndaa Jee, as livrey eh ad seose dy chur ooashley da pooaraghyn yn aer; myr te scruit ayns lioar ny phadeyryn, O hie Israel, vel shiu er hebbal dooys beiyn marroo as ourallyn, rish da‐eed bleïn ayns yn aasagh?

⁴³ As ta shiu er hoiaghey seose cabbane‐agglish Moloch, as rollage yn Jee eu Remphan, co‐chaslyssyn ren shiu y yannoo dy chur ooashley daue: as ver‐yms lhiam shiu ersooyl cheu elley jeh Babylon.

⁴⁴ Va cabbane‐agglish yn eanish ec ny ayraghyn ain ayns yn aasagh, myr v’eh er n’oardaghey, gra rish Moses, Eh dy yannoo eh lurg y sampleyr v’eh er n’akin.

⁴⁵ As hug ny ayraghyn ain, haink ny yeï, lhieu stiagh eh marish Joshua, gys cheer ny Hashoonee, deiyr Jee magh veih fenish ny ayraghyn ain, gys laghyn Ghavid;

⁴⁶ Eh hooar foayr ayns shilley Yee, as va aggindagh dy hroggal thie son Jee Yacob.

⁴⁷ Agh Solomon hrog thie da.

⁴⁸ Ny‐yeih cha vel y Jee smoo ard cummal ayns chiambyllyn troggit lesh laueyn; myr ta’n phadeyr gra,

⁴⁹ Niau my stoyl‐reeoil, as y thalloo stoyl my choshey: cre’n thie hroggys shiu dooys? ta’n Chiarn gra: ny cre vel ynnyd my haaue?

⁵⁰ Nagh nee my laue’s ren dy chooilley nhee jeu shoh?

⁵¹ Shiuish chreoi‐wannallee, as an‐ghiarey‐chymmyltee ayns cree as cleayshyn, ta shiu kinjagh shassoo magh noi yn Spyrryd Noo: myr va ny ayraghyn eu, myr shen ta shiuish.

⁵² Quoi jeh ny phadeyryn nagh ren ny ayraghyn eu tranlaase er? as t’ad er varroo adsyn hoilshee ro‐laue jeh cheet yn Ercairagh, eh ta shiuish nish er vrah as er ghunverys:

⁵³ Hooar shiu yn leigh liorish shirveish ainleyn, agh cha dreill shiu eh.

⁵⁴ Tra cheayll ad ny goan shoh v’ad guint gys y chree, as slieeu ad nyn veeacklyn er.

⁵⁵ Agh v’eshyn lane jeh’n Spyrryd Noo, as yeeagh eh seose dy gyere gys niau, as honnick eh gloyr Yee, as Yeesey ny hassoo er laue yesh Yee,

⁵⁶ As dooyrt eh, Cur‐my‐ner, hee‐ym ny niaughyn foshlit, as Mac y dooinney ny hassoo er laue yesh Yee.

⁵⁷ Eisht dyllee ad lesh ard‐choraa, as stap ad nyn gleayshyn, as roie ad stiagh er lesh un aigney,

⁵⁸ As hilg ad eh magh ass yn ard‐valley, as chlagh ad eh: as hug ny feanishyn nyn eaddagh ny lhie ec cassyn dooinney aeg, va enmyssit Saul,

⁵⁹ As chlagh ad Steaon, geamagh er Jee, as gra, Hiarn Yeesey, gow hood my annym.

⁶⁰ As ghlioon eh sheese, as deïe eh lesh ard‐choraa, Hiarn, ny cur y peccah shoh ass nyn lieh. As tra v’eh er ghra shoh huitt eh ny chadley.