Jannoo 5 - Yn Conaant Noa 1810

CAB. V

¹ Agh va dooinney dy row va enmyssit Ananias, as y ven echey Sapphira, ren thalloo v’oc y chreck,

² As keiltyn ayrn jeh’n phrice er‐fys da e ven, hug eh lesh yn chooid elley, as lhie eh sheese ec cassyn ny hostyllyn eh.

³ Agh dooyrt Peddyr; Ananias, cre’n‐fa ta Satan er lhieeney dty chree dy yannoo breg gys y Spyrryd Noo, liorish keiltyn ayrn jeh price y thallooin?

⁴ Choud as ve dyn chreck, nagh row eh lhiat hene? as erreish da ve creckit, nagh row eh ayns dty phooar hene? cre’n‐fa t’ou er smooinaghtyn er lheid y red ayns dty chree? cha nee gys deiney t’ou er n’yannoo breg, agh gys Jee.

⁵ Tra cheayll Ananias ny goan shoh, huitt eh harrish, as hooar eh baase: as haink aggle mooar orroosyn ooilley cheayll ny reddyn shoh.

⁶ As dirree ny deiney aegey, as hoïll ad seose eh, as hrog ad lhieu magh, as doanluck ad eh.

⁷ As ve mysh three ooryn ny lurg shen, tra haink e ven stiagh, as ve gyn‐yss jee cre v’er daghyrt.

⁸ As dooyrt Peddyr r’ee, Insh dou, nee er lheid yn phrice shen chreck shiu yn thalloo? As dooyrt ish, She, shen va’n phrice.

⁹ Eisht dooyrt Peddyr r’ee, Kys te dy dug shiu nyn goyrle dy cheilley er‐chee dy yannoo molteyrys er Spyrryd y Chiarn? cur‐my‐ner ta ny cassyn ocsyn t’er n’oanluckey dty heshey ec y dorrys, as troggee ad uss magh.

¹⁰ Eisht huitt ee harrish doaltattym ec e chassyn, as hooar ee baase; as haink ny deiney aegey stiagh, as hooar ad ee marroo, as hrog ad lhieu magh ee, as doanluck ad ee liorish e sheshey.

¹¹ As haink aggle mooar er ooilley yn agglish, as er whilleen as cheayll ny reddyn shoh.

¹² As liorish laueyn ny hostyllyn va ymmodee cowraghyn as yindyssyn er nyn yannoo mastey’n pobble; (as v’ad ooilley lesh un aigney ayns phorch Solomon.

¹³ As jeh’n vooinjer elley cha by‐lhoys da dooinney erbee cheet stiagh orroo: agh va soiagh mooar jeant jeu liorish y pobble.

¹⁴ As ren earrooyn mooarey dy chredjuee chyndaa gys y Chiarn, chammah dy gheiney as dy vraane.)

¹⁵ Ayns wheesh as dy dug ad lhieu magh ayns ny straidyn sleih chingey nyn lhie er lhiabbaghyn as lhiaghtyn, dy voddagh eer scadoo Pheddyr goll shaghey; cheet er paart jeu.

¹⁶ Haink ymmodee myrgeddin ass ny ard‐valjyn mygeayrt gys Jerusalem, cur lhieu aslayntee, as adsyn va seaghnit lesh spyrrydyn neu‐ghlen: as v’ad ooilley er nyn lheihys.

¹⁷ Eisht dirree yn ard‐saggyrt as ooilley ny va mârish (v’ad jeh credjue ny Sadduceeyn) as v’ad lane dy yymmoose,

¹⁸ As hug ad laueyn er ny ostyllyn, as hilg ad ad ayns y phryssoon chadjin.

¹⁹ Agh doshil ainle y Chiarn dorrysyn y phryssoon ayns yn oie, as hug eh lesh ad magh, as dooyrt eh,

²⁰ Immee‐jee, as shass‐jee, as loayr‐jee ayns y chiamble rish y pobble ooilley goan y vea shoh.

²¹ As tra cheayll ad shen, hie ad stiagh dy moghey ayns y chiamble, as dynsee ad. Agh haink yn ard‐saggyrt as adsyn va mârish, as symnee ad yn whuaiyl cooidjagh, as ooilley shanstyr cloan Israel, as hug ad fys gys y phryssoon dy chur ad stiagh kion fenish.

²² Agh tra haink ny sidooryn, as nagh dooar ad ad ayns y phryssoon, hyndaa ad back, as dinsh ad,

²³ Gra, Yn pryssoon dy jarroo hooar shin dooint dy shickyr sauchey, as ny arreyderyn nyn shassoo cheu‐mooie jeh’n dorrys: agh tra va shin er vosley, cha dooar shin dooinney erbee sthie.

²⁴ Nish tra cheayll yn ard‐saggyrt as captan y chiamble as ny ard‐saggyrtyn elley ny goan shoh, v’ad fo imnea cre’n erree harragh er y chooish shoh.

²⁵ Eisht haink fer as dinsh eh daue, Cur‐my‐ner, ta ny deiney hug shiuish ayns pryssoon nyn shassoo ayns y chiamble gynsaghey yn pobble.

²⁶ Eisht hie yn captan, as ny fir‐oik, as hug ad lhieu ad, cha nee er niart: (son va aggle orroo dy jinnagh yn pobble nyn glaghey ad.)

²⁷ As tra v’ad oc kionfenish, hoie ad ad kiongoyrt rish y choonceil: as deysht yn ard‐saggyrt ad,

²⁸ Gra, Nagh dug shinyn sarey gyere diu, gyn shiu dy ynsaghey ayns yn ennym shoh? as cur‐my‐ner, ta shiu er lhieeney Jerusalem lesh yn ynsagh eu, as kiarail tayrn orrin loght fuill y dooinney shoh.

²⁹ Eisht dansoor Peddyr as ny ostyllyn elley, gra, S’cair dooin ve ny s’biallee da Jee na da deiney.

³⁰ Ta Jee ny hayraghyn ain er hroggal seose Yeesey, ren shiuish y varroo as y chroghey er billey.

³¹ Eshyn ta Jee er droggal seose gys e laue yesh hene, dy ve ny Phrince as ny Haualtagh, dy chur arrys da Israel as leih peccaghyn.

³² As ta shinyn ny feanishyn echey jeh ny ta shin dy insh diu, as myrgeddin yn Spyrryd Noo, ta Jee er choyrt dauesyn ta ayns biallys da.

³³ Tra cheayll ad shen v’ad guint gys y chree, as hug ad nyn goyrle dy cheilley dy chur ad dy baase.

³⁴ Eisht hass seose ayns y choonceil Pharisee dy row va enmyssit Gamaliel, fer‐ynsee jeh’n leigh, ayns ard‐ghoo mastey ooilley yn pobble, as doardee eh ny ostyllyn dy ve currit magh son tammylt,

³⁵ As dooyrt eh roo, Gheiney Israel, bee‐jee shiuish er nyn dwoaie, cre ta shiu kiarail y yannoo rish ny deiney shoh.

³⁶ Son cha voddey neayr’s dirree magh Theudas, boggyssagh jeh hene dy ve ny ard‐ghooinney ennagh, as huggeysyn v’er ny lhiantyn mysh kiare cheead dooinney: agh v’eshyn er ny varroo, as er whilleen as hast da haink scaa‐lhean as toyrt‐mow.

³⁷ Lurg y dooinney shoh dirree Judas dy Ghalilee, ayns laghyn y cheesh, as chleaynee eh ymmodee dy leih huggey: as ren eshyn myrgeddin cherraghtyn, as v’adsyn ooilley, eer whilleen as hug geill da, er nyn skeayley veih.

³⁸ As nish ta mish gra riuish, Faag‐jee veue ny deiney shoh, as ny cur‐jee eïe orroo: son my ta’n choyrle, ny’n obbyr shoh veih deiney, hed eh naardey:

³⁹ Agh my she veih Jee t’eh, cha jarg shiuish y chur mow eh; er‐aggle dy daghyr diu eer dy chaggey noi Jee?

⁴⁰ As da’n choyrle echeysyn hug ad geill: as tra v’ad er n’eamagh er ny ostyllyn as er smaghtaghey ad, hug ad currym orroo gyn ad dy loayrt ayns ennym Yeesey, as lhig ad y raad daue.

⁴¹ As hie ad magh veih fenish y choonceil, goaill boggey dy row ad coontit feeu dy hurranse nearey son yn ennym echey.

⁴² As gagh laa ayns y chiamble, as veih thie dy thie cha scuirr ad dy ynsaghey as dy phreacheil Yeesey Creest.