Jannoo 28 - Yn Conaant Noa 1810

CAB. XXVIII

¹ As erreish daue v’er roshtyn dy sauchey er thalloo, eisht hooar ad fys dy row yn ellan enmyssit Melita.

² As va ny ellannee feer dooie rooin; son doad ad aile, as ghow ad shin ooilley stiagh kyndagh rish y fliaghey v’ayn, as kyndagh rish y feayraght.

³ As heih Paul kionnan dy vras‐nagyn, as hug eh ad er yn aile, as haink ard‐nieu ass y chiass, as lhian eh rish e laue.

⁴ As tra honnick ny ellannee yn cretoor pyshoonagh, croghey rish e laue, dooyrt ad nyn mast’ oc hene, Gyn dooyt ta’n dooinney shoh ny ghunver, cha lhig kerraghey Yee da ve bio, ga t’eh er scapail y keayn.

⁵ As chrie eh yn ard‐nieu jeh e laue ayns yn aile, as cha dennee eh skielley erbee.

⁶ Agh smooinee adsyn dy beagh eh er n’att, ny er duittym sheese marroo doaltattym; agh tra v’ad foddey er yeeaghyn, as nagh vaik ad aggair erbee er jeet er, haink ad gys smooinaghtyn elley, as dooyrt ad dy nee Jee v’eh.

⁷ Ayns ny ardjyn shen va thieyn as thalloo lesh kiannoort ny hellan, va enmyssit Publius, hug dooin oltaghey‐bea, as aaght ry three laa dy arryltagh.

⁸ As haink eh gy‐kione dy row ayr Phublius ny lhie dy ching ayns y chiassaghey, as ’sy ghiarey‐folley: as hie Paul stiagh huggey, as ghow eh padjer, as hug eh e laueyn er, as laanee eh eh.

⁹ As erreish da v’er n’yannoo shoh, haink feallagh elley neesht va doghanyn oc ayns yn ellan, as v’ad er nyn lheihys.

¹⁰ As ren ad myrgeddin soiaghey mooar‐ooasle y yannoo j’in, as tra ghow shin lhuingys, laad ad shin lesh dy chooilley nhee ymmyrchagh er nyn son.

¹¹ As lurg three meeaghyn, hiauill shin ayns lhong dy Alexandria v’er ve car y gheuree ayns yn ellan, yn cowrey eck va Castor as Pollux.

¹² As goll er thalloo ec Syracuse, duirree shin ayns shen three laa.

¹³ As veih shen hiauill shin mygeayrt, as haink shin gys Rhegium: as ec kione un laa heid y gheay jiass; as yn nah laa haink shin gys Puteoli:

¹⁴ Ayns shen hooar shin braaraghyn, as yeearree ad orrin dy uirriaght mâroo shiaght laa: as shen myr hie shin son y Raue.

¹⁵ As veih shen, tra cheayll ny braaraghyn j’in, haink ad magh nyn guail choud as Appii‐forum, as ny Three thieyn‐oast: as tra honnick Paul ad, hug eh booise da Jee, as ghow eh dunnallys.

¹⁶ As tra haink shin gys y Raue, livrey yn centurion ny pryssoonee gys captan y ghard: agh ve lowit da Paul thie y ve echey da hene, marish sidoor va curmit lesh.

¹⁷ As haink eh gy‐kione lurg three laa, dy deïe Paul er ny ard Hewnyn cooidjagh. As tra v’ad er jeet huggey, dooyrt eh roo, Gheiney as vraaraghyn, ga nagh vel mee er n’yannoo nhee erbee noi yn pobble, ny cliaghtaghyn nyn shenn‐ayryn, ny‐yeih va mee er my livrey seose my phryssoonagh veih Jerusalem gys laueyn ny Romanee.

¹⁸ As tra va’d shoh er vriwnys my chooish, v’ad booiagh yn raad y lhiggey dou, er‐y‐fa nagh row oyr erbee baaish aynym.

¹⁹ Agh tra loayr ny Hewnyn noi shoh, va mee êginit dy scughey my chooish gys Cesar; cha nee son dy row plaiynt erbee aym, jeh dy chassid my ashoon hene.

²⁰ Er‐yn‐oyr shoh eisht ta mee er chur fys erriuish, dy akin shiu, as dy loayrt riu: er‐y‐fa son treishteil Israel dy vel mee kianlt lesh y gheuley shoh.

²¹ As dooyrt adsyn rish, Cha dooar shinyn edyr screeunyn veih Judea my‐dty‐chione, chamoo ren veg jeh ny braaraghyn t’er jeet soilshaghey ny loayrt red erbee dy olk jeed.

²² Agh ta shin booiagh clashtyn voïds, cre t’ou smooinaghtyn: son mychione yn chredjue shoh, ta fys ain dy vel eh ayns dy chooilley ynnyd loayrit n’oï.

²³ As tra v’ad er phointeil laa er e hon, haink ymmodee huggey gys e hie; daue shoh hug eh tushtey, as dymmyrk eh feanish jeh reeriaght Yee, coyrlaghey ad mychione Yeesey, chammah ass leigh Voses as ny phadeyryn, veih moghrey derrey yn astyr.

²⁴ As chred paart jeu shen ny va loayrit, as paart elley nagh ren credjal.

²⁵ As tra nagh choard ad ny mast’ oc hene, ren ad skeayley, erreish da Paul v’er loayrt un ockle, S’mie loayr yn Spyrryd Noo liorish Esaias, yn phadeyr rish ny ayraghyn ain,

²⁶ Gra, Immee gys y pobble shoh as abbyr roo, Ayns clashtyn cluinnee shiu, agh cha jean shiu toiggal: as ayns fakin hee shiu, agh cha der shiu my‐ner.

²⁷ Son ta cree yn phobble shoh er n’aase roauyr, as ta ny cleayshyn oc moal dy chlashtyn, as ny sooillyn oc t’ad er n’yeigh; er‐aggle dy vaikagh ad lesh nyn sooillyn, as dy gluinnagh ad lesh nyn gleayshyn, as dy doiggagh ad lesh nyn gree, as dy beagh ad er nyn jyndaa, as dy jinnin ad y lheihys.

²⁸ Lhig da fys y ve euish er‐y‐fa shen, dy vel saulatys Yee er n’eaishtee ad rish.

²⁹ As tra v’eh er loayrt ny goan shoh, jimmee ny Hewnyn rhymboo, lesh mooarane resooney nyn mast’ oc hene.

³⁰ As chum Paul ry daa vlein magh ayns e hie maillee hene, goaill‐rish dy chooilley unnane va cheet huggey;

³¹ Preacheil daue reeriaght Yee as gynsaghey ny reddyn va bentyn rish y Chiarn Yeesey Creest lesh slane dunnallys, as gyn lhiettal erbee.