Jannoo 27 - Yn Conaant Noa 1810

CAB. XXVII

¹ As tra ve kiarit dy row shin dy ghoaill lhuingys gys Italy, livrey ad Paul as shiartanse dy phryssoonee elley, gys fer va enmyssit Julius centurion v’ayns sheshaght‐chaggee Augustus.

² As goll er‐board lhong veih Adramyttium, hie shin magh son y cheayn, kiarail shiaulley rish coast‐yn Asia, as va Aristarchus, Macedonian veih Thessalonica mârin.

³ As yn nah laa haink shin gys Sidon: as hoilshee Julius ard‐chenjallys da Paul, cur kied da goll mastey e chaarjyn dy ooraghey eh hene.

⁴ As feaysley veih shen, hiauill shin fo Cyprus, er‐y‐fa dy row yn gheay nyn ’oï.

⁵ As tra va shin er hiaulley harrish keayn Cilicia as Pamphylia, haink shin gys Myra ard‐valley ayns Lycia.

⁶ As ayns shen hooar y centurion lhong ass Alexandria son shiaulley gys Italy; as hugh eh shin er‐board.

⁷ As tra va shin er hiaulley dy moal ymmodee laghyn, as s’coan va shin er roshtyn harrish noi Cnidus, son nagh row yn gheay lhien, hiauill shin fo Crete, magh veih Salome:

⁸ As s’coan va shin er gholl shaghey, tra haink shin gys ynnyd ta enmyssit, Ny purtyn aalin, er‐gerrey da ard‐valley Lasea.

⁹ Nish tra va mooarane traa baarit, as dy row shiaulley nish dangeyragh, er‐yn‐oyr dy row imbagh yn trostey nish harrish, choyrlee Paul ad.

¹⁰ As dooyrt eh roo, Gheiney vie, ta mee cur tastey dy bee yn veyge shoh lesh mooarane coayl as assee, cha nee ynrycan jeh’n lught as y lhong, agh myrgeddin jeh nyn mioys.

¹¹ Ny‐yeih hug yn centurion geill smoo da mainshter as pilot ny lhuingey na da goan Phaul.

¹² As er‐y‐fa nagh row eh purt sauchey geuree dooin, choyrlee yn ayrn smoo jeh’n cheshaght ad dy eaysley veih shen, my oddagh ad er aght erbee cosney gys Phenice, as yn geurey y cheau ayns shen; ta ny phurt ayns Crete, as lhie lesh yn neear‐ass as yn neear‐hwoaie.

¹³ As feaysley lesh geay meeley jiass, sheiltyn dy row oc nish nyn yioïn, hiauaill ad ry lhiattee Crete.

¹⁴ Agh ayns traa gerrit dirree geay dowil doirrinagh nyn ’oï enmyssit Euroclidon.

¹⁵ As tra va’n lhong er ny imman noon as noal, as nagh row ee son jannoo raad noi sooill ny geayee lhig shin jee tuittym lesh.

¹⁶ As roie fo ellan dy row, ta enmyssit Clauda, ’smooar yn obbyr v’ain dy ghoaill stiagh yn baatey:

¹⁷ Agh tra v’ee goit stiagh oc, ghow ad saaseyn ayns laue dy niartaghey yn lhong, kiangley mygeayrt ee lesh cablyn; as er‐aggle dy duittagh ad er y gheinnagh vio, ghow ad yn shiaull neose, as myr shen lhig ad y raad jee.

¹⁸ As myr va shin er nyn imman noon as noal erskyn towse lesh y doirrin, yn nah laa deddrymmee ad y lhong:

¹⁹ As yn trass laa hug shin magh lesh nyn laueyn hene greïnyn ny lhuingey.

²⁰ As tra nagh row grian ny eayst ry‐akin rish ymmodee laghyn, as dy row shin fo sterrym nagh nee beggan, chaill shin dy chooilley hreishteil dy hauchys.

²¹ As erreish daue v’er ve foddey nyn drostey, hass Paul magh nyn mast’oc, as dooyrt eh, Lhisagh shiu, gheiney vie, v’er n’eaishtagh rhym’s, as gyn v’er veaysley veih Crete, dy gheddyn yn assee as y coayl shoh.

²² As nish ta mee coyrlaghey shiu dy ve jeh gien mie, son cha bee coayl jeh bioys dooinney erbee nyn mast’eu, agh jeh’n lhong.

²³ Son hass liorym’s noght ainle Yee, quoi s’lesh mee, as eh ta mee dy hirveish,

²⁴ Gra, Ny bee aggle ort, Phaul; shegin dhyt shassoo fenish Cesar: as cur‐my‐ner ta Jee er ghiootal ort ooilley adsyn ta shiaulley mayrt.

²⁵ Shen‐y‐fa, gheiney vie, cum‐jee seose nyn gree: son ta mee credjal Jee, dy bee eh eer myr ve giallit dou.

²⁶ Ny‐yeih shegin dooin ve ceaut stiagh er ellan ennagh.

²⁷ Agh tra va’n chiarroo oie yeig er jeet, myr va shin eiyrit noon as noal ayns keayn Adria, mysh y vean‐oie va ny marrinee gourys dy row ad tayrn er‐gerrey da cheer ennagh.

²⁸ As cheau ad magh yn leoaie, as dennee ad dy row feed feiy oc: as tra v’ad er gholl red beg sodjey, hug ad magh yn leoaie reesht, as hooar ad eh queig feiyn jeig.

²⁹ Eisht er‐aggle dy roieagh ad er creggyn, hilg ad kiare akeryn magh veih yn jerrey, dy jeean jeeaghyn son y laa.

³⁰ As myr va ny marrinnee mysh cosney ass y lhong, as er lhiggey yn baatey sheese er yn ushtey, myr yien dy chur magh akeryn veih toshiaght ny lhuingey,

³¹ Dooyrt Paul rish y centurion, as rish ny sidooryn, Mannagh vuirree ad shoh ayns y lhong, cha vod shiu ve sauchey.

³² Eisht ghiare ny sidooryn teddyn y vaatey, as lhig ad jee tuittym sheese.

³³ As myr va’n laa soilshaghey, choyrlee Paul ad ooilley dy ghoaill beaghey, gra, Jiu yn chiarroo laa yeig, ta shiu er hannaghtyn nyn drostey, gyn lhongey cooie.

³⁴ Shen‐y‐fa my choyrle’s eh shiu dy ghoaill beaghey; son te cour nyn slaynt: son cha duitt wheesh renaig jeh kione unnane eu.

³⁵ As tra v’eh er ghra shoh, ghow eh arran, as hug eh booise da Jee, ayns yn enish oc ooilley, as vrish eh eh, as ren eh toshiaght dy ee.

³⁶ Eisht v’ad ooilley ayns cree mie, as ghow adsyn myrgeddin beaghey.

³⁷ As va shin ayns ooilley ayns y lhong, daa cheead three‐feed as shey anmeenyn jeig.

³⁸ As tra v’ad jeant magh lesh bee, deddrymmee ad y lhong, as hilg ad y churnaght harrish boayrd ’sy cheayn.

³⁹ As tra va’n laa er jeet rish, cha bione daue yn cheer: agh chronnee ad ooig dy row lesh traie, raad v’ad kiarit, my oddagh eh ve, yn lhong y roie stiagh.

⁴⁰ As tra v’ad er droggal ny akeryn, lhig ad ee lesh y cheayn, as feaysley coyrdyn y stiurey, hug ad seose yn shiaull‐mean gys y gheay, as ren ad son y thalloo.

⁴¹ As taghyrt er boayl raad va daa hidey cheet noi‐ry‐hoi roie ad y lhong er grunt; as va’n toshiagh eck soit cha shickyr, nagh row ee scughey, agh va’n jerrey ec brisht lesh niart ny tonnyn.

⁴² As coyrle ny sidooryn ve dy varroo ny pryssoonee, er‐aggle dy snaueagh veg jeu magh, as dy gosnagh ad roue.

⁴³ Agh yn centurion aggindagh Paul y hauail, lhiett eh ad veih shen y yannoo, as doardee eh adsyn oddagh snaue, ad dy hilgey ad hene hoshiaght ayns y cheayn, as ad dy chosney gys y thalloo:

⁴⁴ As y chooid elley, paart er buird, as paart er peeshyn jeh’n lhong: as shen myr ve, dy chosney ad ooilley dy sauchey gys y thalloo.