Jannoo 24 - Yn Conaant Noa 1810

CAB. XXIV

¹ As ec kione queig laa, hie Ananias yn ard‐saggyrt sheese marish y chanstyr, as ard‐phleadeyr dy row enmyssit Tertullus, dy chur stiagh nyn blaiynt gys y chiannoort noi Paul.

² As tra ve’h currit kionfenish, ren Tertullus toshiaght dy loayrt n’oï, gra, Fakin liort’s dy vel shin beaghey ayns shee as sauchys, as dy vel ymmodee obbraghyn mie jeant son yn ashoon shoh liorish creenaght dty reill’s,

³ Ta shin ec dy chooilley earish, as ayns dy chooilley ynnyd, goaill rish, Felix smoo ooasle, lesh slane booise.

⁴ Agh son nagh goym seose rouyr jeh dty hraa, ta mee guee ort jeh dty ooashley foayroil dy chur clashtyn dooin ayns focklyn giarey:

⁵ Ta shin er gheddyn yn dooinney shoh fer erskyn towse boiragh, as doostey anvea mastey ooilley ny Hewnyn er feai‐ny‐cruinney, as ny ard‐leeideilagh ayns shaghrynys credjue ny Nazarenee:

⁶ T’eh myrgeddin er ghoaill er dy an‐chasherickey yn chiamble: as ghow shinyn eh, as baill‐lhien v’er vriwnys eh cordail rish y leigh ain hene.

⁷ Agh haink yn ard‐chaptan Lysias orrin, as eer er‐niart ghow eh ass ny laueyn ain eh.

⁸ Goardaghey e chassidee dy heet kionfenish hood’s: as liorish feysht y dooinney dy vod toiggal y ve ayd hene jeh dy chooilley nhee, ta shinyn dy choyrt ass e lieh.

⁹ As va ny Hewnyn er yn un ghlare rish, gra, dy nee shen myr va’n chooish.

¹⁰ Eisht dreggyr Paul, tra va’n kiannoort er chur kied da dy loayrt, Son wheesh as dy vel fys aym dy vel uss er ve rish ymmodee bleeantyn dty vriw er yn ashoon shoh, ta mee ny s’aggindee dy ansoor er my hon hene;

¹¹ Er‐y‐fa dy vod oo toiggal y ghoaill, nagh vel foast agh daa laa yeig neayr as hie mee seose dy ooashlaghey ec Jerusalem.

¹² As cha dooar ad mee ayns y chiamble ayns argane rish dooinney erbee, ny greinnaghey yn pobble gys irree magh, edyr ayns ny synagogueyn, ny ayns yn ard‐valley:

¹³ Chamoo oddys ad prowal ny reddyn shen t’ad nish dy choyrt ass my lieh.

¹⁴ Agh shoh ta mee goaill‐rish hood’s, lurg yn aght t’adsyn genmys shaghrynys veih’n chredjue, dy nee shen myr ta mish cur ooashley da Jee my ayraghyn, credjal dagh nhee ta scruit ayns y leigh as ny phadeyryn:

¹⁵ As ta treishteil aym gys Jee, shen t’ad hene myrgeddin dy lowal, dy bee ayn irree‐seose‐reesht jeh ny merriu, chammah jeh cairagh as neu‐chairagh.

¹⁶ As er‐yn‐oyr shoh ta mee er my chliaghtey hene, dy reayll kinjagh cooinsheanse gyn loght gys Jee as gys deiney.

¹⁷ Nish lurg mooarane bleeantyn, haink mee dy chur lhiam jeirk gys my ashoon hene, as ourallyn.

¹⁸ Er shoh hooar shiartanse dy Hewnyn veih Asia mee glen ayns y chiamble, agh cha nee lesh chymsaghey sleih, ny boirrainys:

¹⁹ As lhisagh ad shen ve ayns shoh kionfenish, dy yannoo mie yn phlaiynt, my va nhee erbee oc dy choyrt ass my lieh.

²⁰ Er‐nonney lhig dane shoh hene loayrt, my hooar ad mee‐chairys erbee aynym, tra hass mee fenish y choonceil;

²¹ Mannagh row eh son yn un choraa shoh hrog mee, tra hass mee ny mast’ oc, Mychione ïrree‐seose‐reesht ny merriu ta mee jiu er my vriwnys lieriu.

²² Tra cheayll, Felix shoh, hug eh ad shaghey, derrey oddagh eh toiggal sodjey y gheddyn ’sy chooish; as dooyrt eh, Tra hig Lysias yn ard‐chaptan neose, yioyms fys er bun y chooish eu.

²³ As doardee eh centurion kiarail y ghoaill jeh Paul, as e reamys y lhiggey da, gyn lhiettal veg jeh’n ainjys echey dy hirveish er ny dy heet huggey.

²⁴ As lurg laghyn dy row, haink Felix as e ven Drusilla va ny Hew, as hug eh fys er Paul, as hug eh clashtyn da mychione y credjue ayns Creest.

²⁵ As myr v’eh resooney mychione cairys, sheeltys, as y vriwnys ry heet, huitt Felix er creau, as dansoor eh, Immee royd son y traa shoh, as cha leah’s yioym caa cooie er y hon, ver‐ym fys ort.

²⁶ V’eh jerkal neesht dy beagh Paul er chur argid da, cour cosney e reamys: shen‐y‐fa v’eh cur fys er ny s’mennickey dy loayrt rish.

²⁷ Agh ec kione daa vleïn haink Portius Festus ayns ynnyd Felix: as son dy row Felix booiagh jannoo nhee taitnyssagh da ny Hewnyn, daag eh Paul ny phryssoonagh.