Jannoo 22 - Yn Conaant Noa 1810

CAB. XXII

¹ Gheiney, vraaraghyn, as ayraghyn, clasht‐jee rish ny t’aym’s dy ghra ayns my lieh hene.

² (As tra cheayll ad eh loayrt roo ayns glare ny Hebrewnyn, va’d wheesh shen smoo nyn dhost: as dooyrt eh)

³ Ta mish dy firrinagh my ghooinney ta my Hew, ruggyr ayns Tarsus, ard‐valley ayns Cilicia, agh va mee troggit ayns yn ard‐valley shoh, ec cassyn Ghamaliel, as ynsit lurg aght s’ynrick leigh nyn shenn‐ayryn, ayns graih jeean gys Jee, myr t’euish ooilley jiu.

⁴ As ren mee tranlaase er y chredjue shoh gys y baase, kiangley as livrey gys pryssoonyn chammah deiney as mraane.

⁵ Myr ta’n ard‐saggyrt hene gymmyrkey feanish lhiam, as slane quaiyl y chanstyr: voue hooar mee myrgeddin screeuyn gys ny braaraghyn, as hie mee gys Damascus, dy chur lhiam adsyn v’ayns shen, kianlt gys Jerusalem, dy v’er nyn gerraghey.

⁶ As haink eh gy‐kione, myr va mee er my yurnah, tayrn er‐gerrey da Damascus mysh y vunlaa, dy hoilshean doaltattym veih niau soilshey mooar mygeayrt‐y‐moom.

⁷ As huitt mee er y thalloo, as cheayll mee coraa gra rhym, Saul, Saul, cre’n‐fa t’ou jannoo tranlaase orrym?

⁸ As dreggyr mish, Quoi oo, Hiarn? As dooyrt eh rhym, Mish Yeesey dy Nazareth t’ou jannoo tranlaase er.

⁹ As honnick adsyn va mârym dy jarroo yn soilshey, as va aggle orroo; agh cha geayll ad y coraa echeysyn va loayrt rhym.

¹⁰ As dooyrt mish, Cre nee’m, Hiarn? As dooyrt y Chiarn rhym, Irree, as immee gys Damascus, as ayns shen vees inshit dhyt mychione dy chooilley nhee ta kiarit dhyt dy yannoo.

¹¹ As myr va mee doal lesh gloyr y toilshey shen, hug y vooinjer va mârym lhieu mee er y laue, as haink mee gys Damascus.

¹² As haink hym fer dy row enmyssit Ananias, dooinney crauee cordail rish y leigh, echey va goo mie veih ooilley ny Hewnyn va cummal ayns shen,

¹³ As hass eh, as dooyrt eh rhym, Vraar Saul, Dty hoilshey dy row ayd. As ’syn oor cheddin yeeagh mee seose er.

¹⁴ As dooyrt eh, Ta Jee ny ayraghyn ain er dty reih, dy voddagh fys y ve ayd er yn aigney echey, as dy voddagh oo yn Fer‐cairagh shen y akin, as clashtyn coraa e veeal.

¹⁵ Son bee oo yn feanish echeysyn gys dy chooilley ghooinney, jeh ny t’ou er vakin as er chlashtyn.

¹⁶ As nish cre’n‐fa t’ou lhiggey shaghey? irree as bee er dty vashtey, as niee ersooyl dty pheccaghyn, geamagh er ennym y Chiarn.

¹⁷ As haink eh gy‐kione, tra va mee er jeet reesht gys Jerusalem, dy jarroo choud as va mee ec padjer ayns y chiamble, dy huitt mee my‐neealloo;

¹⁸ As honnick mee eh, gra rhym, Jean siyr, as cosne royd er‐y‐chooyl ass Jerusalem: son cha jean ad soiaghey jeh’n eanish ayd’s my‐mychione’s.

¹⁹ As dooyrt mish, Hiarn, ta fys oc dy ren mish pryssooney as bwoailley ayns dy chooilley synagogue adsyn va credjal aynyd.

²⁰ As tra va fuill dty eanish Steaon er ny gheayrtey, va mee my hassoo kionfenish, as m’aigney lhieu ayns y choyrt eh gy‐baase, as yeeagh mee da’n eaddagh ocsyn ren y varroo eh.

²¹ As dooyrt eh rhym, Immee royd: son ver‐ym’s oo er chaghteraght foddey veih shoh gys ny Ashoonee.

²² As deaisht ad rish gys y fockle shoh, as eisht hrog ad seose nyn goraa, as dooyrt ad, Ersooyl‐jee lesh lheid yn er shoh jeh’n thalloo: son cha vel eh cooie eh dy ve bio.

²³ As myr v’ad gyllaghey, as ceau jeu nyn eaddagh, as spreie joan ’syn aer,

²⁴ Hug yn ard‐chaptan sarey eh dy ve er ny chur stiagh ’sy chashtal, goardaghey eh dy ve feyshtit liorish scuitchal, dy ghed‐kyn fys cre’n‐fa va’d gyllaghey myr shen n’oï.

²⁵ As myr v’ad dy chiangley eh lesh yeeallyn, dooyrt Paul rish y chaptan‐keead va ny hassoo liorish, Vel eh lowal diuish dy scuitchal dooinney ta ny Romanagh as gyn deyrey?

²⁶ Tra cheayll yn centurion shen, hie eh as dinsh eh eh da’n ard‐chaptan, gra, Cur twoaie cre t’ou dy yannoo; son ta’n dooinney shoh ny Romanagh.

²⁷ Eisht haink yn ard‐chaptan, as dooyrt eh rish, Insh dou, vel uss dty Romanagh? Dooyrt eshyn, Ta mee.

²⁸ As dreggyr yn ard‐chaptan, Lesh sym mooar dy argid chossyn mish yn seyrsnys shen. As dooyrt Paul, Agh va mish seyr‐ruggit.

²⁹ Eisht daag adsyn eh er‐y‐chooyl va ry‐hoi feysht eh, as va aggle er yn ard‐chaptan hene myrgeddin erreish da toiggal dy nee Romanagh v’eh, as son dy row eh er chiangley eh.

³⁰ Laa ny vairagh er‐yn‐oyr dy baillish slane shickyrys y gheddyn jeh plaiynt ny Hewnyn n’oï deayshil eh eh veih e gheulaghyn, as doardee eh ny ard‐saggyrtyn as ooilley yn choonceil oc dy heet kionfenish, as hug eh lesh Paul sheese, as hoie eh eh kiongoyrt roo.