Jannoo 20 - Yn Conaant Noa 1810

CAB. XX

¹ As erreish da’n irree‐magh shoh ve ec fea, deïe Paul er ny Creesteenyn huggey, as daag eh bannaght oc, as jimmee eh roish dy gholl gys Macedonia.

² As tra v’eh er gholl harrish ny ardjyn shen, as dy jeean er choyrlaghey ad, haink eh gys Greece;

³ As duirree eh ayns shen three meeaghyn: as tra va ny Hewnyn lhie fo‐chlea er e hon, myr v’eh kiarail dy ghoaill lhuingys gys Syria, ghow eh ayns laue dy darragh eh back trooid Macedonia.

⁴ As hie ayns sheshaght mârish gys Asia, Sopater dy Verea, as jeh ny Thessalonianee, Aristarchus as Secundus; as Gaius veih Derbe, as Timothy; as veih Asia, Tychicus as Trophimus.

⁵ Hie ad shoh roïn, as duirree ad er nyn son ec Troas.

⁶ As hiauiail shin veih Philippi lurg feailley ny Caisht, as haink shin huc gys Troas ayns queig laa, as duirree shin ayns shen shiaght laa.

⁷ As er y chied laa jeh’n chiaghtin, tra va shin er jeet cooidjagh dy vrishey arran, ren Paul preacheil daue, as myr v’eh dy gholl roish laa ny vairagh, chum eh seose loayrt derrey mean‐oie.

⁸ As va ymmodee cainleyn foaddit ayns yn ard‐shamyr, raad v’ad er nyn jaglym cooidjagh.

⁹ As va dooinney aeg dy row, va enmyssit Eutychus, ny hoie ayns uinniag, as huitt eh ayns trome chadley: as myr va Paul foddey preacheil, hie eh harrish ayns e chadley, as huitt eh neose jeh’n trass lout, as v’eh er ny hroggal marroo.

¹⁰ Agh hie Paul sheese, as gliooney liorish, as goaill eh ayns e roihaghyn, dooyrt eh, Ny bee‐jee ayns imnea erbee; son ta e vioys ayn.

¹¹ Tra v’eh er‐y‐fa shen er jeet seose reesht, as er vrishey arran, as er n’ee, as er daggloo foddey, gys eer brishey’n laa, jimmee eh roish.

¹² As hug ad lhieu yn dooinney aeg bio, as va gerjagh oc nagh nee beggan.

¹³ As hie shin roishyn dy ghoaill lhuingys, as hiauaill shin gys Assos, kiarail Paul y ghoaill stiagh ayns shen: son shen myr v’eh er n’oardaghey, kiarail eh hene dy gholl ry chosh.

¹⁴ As tra v’eh er jeet hooin ec Assos ghow shin eh er‐board, as haink shin gys Mitylene.

¹⁵ As hiauill shin veih shen, as haink shin yn nah laa jeeragh er Chios; as yn laa er‐giyn chossyn shin gys Samos, as duirree shin ec Trogyllium, as er y chiarroo laa haink shin gys Miletus.

¹⁶ Son va Paul kiarit dy hiaulley shaghey Ephesus, er‐y‐fa nagh row eh booiagh yn traa y vaarail ayns Asia; son v’eh ayns preish siyr, er dy chooilley chor dy ve ec Jerusalem er laa ny Kingeesh.

¹⁷ As veih Miletus, hug eh fys gys Ephesus, as deïe eh er shanstyr ny hagglish.

¹⁸ As tra v’ad er jeet huggey, dooyrt eh roo, Ta fys eu, er‐dyn chied laa haink mish gys Asia, kys ta mee er n’ymmyrkey mee‐hene ny mast’ eu ee dy chooilley earish,

¹⁹ Shirveish y Chiarn lesh dy chooilley injillid aigney, as lesh mooarane jeïr, as seaghyn haink my raad, liorish kialgyn [goanlyssagh] ny Hewnyn:

²⁰ As kys nagh dreill mee back nhee erbee veagh vondeishee diuish, agh hoilshee mee diu, as dynsee mee shiu dy foshlit, as veih thie dy thie,

²¹ Gymmyrkey feanish chammah gys ny Hewnyn as myrgeddin gys ny Ashoonee, mychione arrys gys Jee, as credjue gys nyn Jiarn Yeesey Creest.

²² As nish cur‐my‐ner, ta mee goll fo bree yn Spyrryd gys Jerusalem, gyn fys ve aym cre ta dy haghyrt dou ayns shen:

²³ Er‐lhimmey dy vel y Spyrryd Noo gymmyrkey feanish ayns dagh ard‐valley, gra, Dy vel geulaghyn as seaghyn my chour.

²⁴ Agh cha vel veg jeh ny reddyn shoh dy my agglagh, chamoo ta mee soiaghey jeh my vioys hene, my oddym agh my choorse y chooilleeney lesh boggey, as y chirveish ta er my churrym veih’n Chiarn Yeesey, dy ymmyrkey feanish gys sushtal grayse Yee.

²⁵ As nish cur‐my‐ner, ta fys aym nagh jean shiuish ooilley, nyn mast’ eu ta mee er ve shooyl preacheil reeriaght Yee, my eddin y akin arragh.

²⁶ Shen‐y‐fa ta mee goaill feanish erriu er y laa t’ayn jiu, dy vel mee glen veih fuill dy chooilley ghooinney:

²⁷ Son cha vel mee er haghney dy hoilshaghey diu slane coyrle Yee.

²⁸ Cur‐jee twoaie er‐y‐fa shen diu hene, as da ooilley yn chioltane harrystoo ta’n Spyrryd Noo er n’yannoo shiu nyn aspickyn, dy veaghey agglish Yee, t’eh er chionnaghey lesh e uill hene.

²⁹ Son ta fys aym, erreish dooys v’er n’immeeaght, dy jig moddee‐oaldey jollyssagh stiagh ny mast’ eu, gyn chymmey er y chioltane.

³⁰ Myrgeddin nyn mast’ eu hene nee deiney girree seose, loayrt goan kialgagh, dy chleaynaghey daue hene fir‐eiyrtee.

³¹ Bee‐jee er‐y‐fa shen er nyn arrey, as cooinee‐jee rish three bleeaney dy vel mee er ve kinjagh oie as laa cur raaue da dy chooilley unnane eu lesh jeïr.

³² As nish, vraaraghyn, ta mee chymney shiu gys Jee, as gys goo e ghrayse, ta abyl nyn droggal shiu seose, as eiraght y chur diu nyn mast’ ocsyn ooilley ta er nyn gasherickey.

³³ Cha vel mee er chur saynt da argid, ny airh, ny cooid ghooinney erbee.

³⁴ Dy jarroo ta fys eu hene, dy nee ny laueyn shoh ren shirveish er my ymmyrch, as orroosyn va mârym.

³⁵ Ta mee er hoilshaghey diu dy chooilley nhee, kys laboraght myr shen, dy lhisagh shiu kemmyrk y choyrt da ny annooinee; as cooinaghtyn er goan y Chiarn Yeesey, kys dooyrt eh, Te ny s’bannee dy choyrt na dy ghoaill.

³⁶ As tra v’eh er ghra shoh, ghlioon eh sheese, as ghow eh padjer mâroo ooilley.

³⁷ As cheayn ad ooilley dy treih, lhie er mwannal Phaul as dy phaagey eh,

³⁸ As jannoo yn trimshey smoo ooilley, son ny goan loayr eh, nagh vaikagh ad yn eddin echey arragh. As ren ad sheshaght mârish gys y lhong.