Jannoo 17 - Yn Conaant Noa 1810

CAB. XVII

¹ Nish tra v’ad er gholl trooid Amphipolis as Apollonia, haink ad gys Thessalonica, raad va keeill ec ny Hewnyn.

² As hie Paul, myr va’n cliaghtey echey stiagh mâroo, as son three laghyn doonee ren eh resooney roo ass ny scriptyryn,

³ Soilshaghey as prowal dy beign da Creest v’er hurranse, as er n’irree veih ny merriu: as dy nee Yeesey shoh ta mish dy phreacheil diu, yn Creest.

⁴ As ren paart jeu credjal, as lhiantyn gys Paul as Silas: myr ren earroo mooar jeh ny Greekyn crauee, as myrgeddin dy vraane seyrey.

⁵ Agh ny Hewnyn mee‐chredjuagh greinnit lesh goanlys, ghow ad huc shiartanse dy ghrogh gheiney mee‐reiltagh; as tra va chaglym mooar jeu oc, hug ad ooilley yn ard‐valley bun‐ry‐skyn, as vrish ad stiagh er niart ayns thie Jason, er‐chee ad y choyrt lhieu magh gys y pobble.

⁶ As tra nagh dooar ad ad, hayrn ad lhieu Jason as shiartanse jeh ny braaraghyn gys fir‐reill yn ard‐valley, geamagh, T’ad shoh t’er hyndaa yn seihll bun‐ry‐skyn er jeet ayns shoh neesht;

⁷ As ta Jason er chur aaght daue: as t’ad shoh ooilley jannoo noi oardaghyn Cesar, gra dy vel ree elley ayn, enmyssit Yeesey.

⁸ As va ooilley yn pobble as fir‐reill yn ard‐valley dy mooar seaghnit, tra cheayll ad ny reddyn shoh.

⁹ As tra v’ad er ghoaill raan‐teenyn son Jason as y vooinjer elley lhig ad y raad daue.

¹⁰ As hug ny braaraghyn ersooyl chelleeragh Paul as Silas ayns yn oie gys Berea: as tra v’ad er jeet gys shen, hie ad stiagh ayns synagogue ny Hewnyn.

¹¹ V’ad shoh jeh cree s’ooasle na ny Thessalonianee, ayns dy deaisht ad rish y goo lesh slane arryltys aigney, ronsaghey ny scriptyryn gagh laa, nee shoh myr va ny reddyn shen.

¹² Shen‐y‐fa ren ymmodee jeu credjal: as myrgeddin dy vraane ooasle va nyn Ghreekyn, as dy gheiney cha nee beggan.

¹³ Agh tra hooar Hewnyn Thessalonica fys dy row Paul er phreacheil goo Yee ec Berea, haink ad derrey shen myrgeddin, as ghreinnee ad yn pobble n’oï.

¹⁴ Er shoh hug ny braaraghyn ersooyl Paul jeeragh, myr dy beagh eh dy ghoaill lhuingys: agh duirree Silas as Timothy ayns shen.

¹⁵ As hug y cheshaght hie marish Paul lhieu eh gys Athens: as chaghteraght currit lhieu gys Silas as Timothy ad dy heet huggey ayns dy chooilley hiyr, jimmee ad rhymboo.

¹⁶ Nish choud as va Paul farkiaght ec Athens, son ad dy heet, va e chree er ny ghreinnaghey cheu‐sthie jeh, tra honnick eh yn slane ard‐valley lhie ayns jalloonys.

¹⁷ Shen‐y‐fa ren eh resooney ayns y synagogue rish ny Hewnyn, as rish ny deiney crauee, as ayns thie ny quaallagh gagh laa roosyn va cheet ny raad.

¹⁸ Eisht hoie shiartanse jeh fir‐ynsee ny Epicureanee as ny Stoickyn er: as dooyrt paart jeu, Cre t’ec yn veealerey shoh dy ghra? Dooyrt feallagh elley, T’eh myr dy baillish goaill er‐dy hoiaghey seose Jeeghyn noa: er‐yn‐oyr dy row eh preacheil daue Yeesey, as yn irree‐seose‐reesht.

¹⁹ As ghow ad, as hug ad lhieu eh gys Areopagus, gra, Der oo toiggal dooin, cre ta’n ynsagh noa shoh t’ou uss dy chur magh?

²⁰ Son t’ou fockley magh shiartanse dy reddyn joarree ayns nyn glashtyn: baill‐lhien er‐y‐fa shen fys y gheddyn cre er t’ou cheet liorish ny goan shoh?

²¹ (Son cha row ooilley ny Athenianee as ny joarreeyn v’ayns shen, baarail nyn draa ayns nhee erbee, agh edyr dy insh, ny dy chlashtyn red ennagh noa.)

²² Eisht hass Paul seose ayns mean Areopagus, as dooyrt eh, Gheiney Athens, hee‐ym ayns ooilley nyn graueeaght dy vel shiu feer faase‐chredjuagh.

²³ Son myr va mee goll shaghey, as cur‐my‐ner yn aght ooashlaghey euish, hooar mee altar as yn raa shoh scruit er, GYS Y JEE GYN‐YSS DOOIN. She eshyn er‐y‐fa shen ta shiu dy ooashlaghey gyn fys eu quoi eh, ta mish dy hoilshaghey diu.

²⁴ Jee ren y seihll, as dy chooilley nhee t’ayn y chroo, fakin dy nee eshyn Chiarn niau as thalloo, cha vel eh cummal ayns chiambyllyn troggit lesh laueyn:

²⁵ Chamoo t’eh er ny ooashlaghey lesh laueyn deiney, myr dy beagh eh feme nhee erbee, fakin dy vel eh coyrt da ooilley bioys, as ennal, as dy chooilley nhee;

²⁶ As dy vel eh er n’yannoo jeh’n un uill ooilley ashoonyn sheelnaue, dy vaghey er slane eaghtyr y thallooin, as dy vel eh er n’oardaghey ny earishyn roïe kiarit, as cagliaghyn ny cheeraghyn oc:

²⁷ Ad dy hirrey lurg y Chiarn, my haghyragh daue briaght er e hon, as geddyn magh eh, ga nagh vel eh foddey veih dagh unnane ain:

²⁸ Son aynsyn ta shin bio, as bioyr, as beaghey; myr sheer da paart jeh ny bardoonee eu hene ta gra, Son ta shinyn neesht jeh’n cluight echeysyn.

²⁹ Son wheesh eisht as dy nee jeh Jee haink shin, cha lhisagh shin smooinaghtyn dy vel y Dooghys‐Jee goll‐rish airh, ny argid, ny clagh grainnit lesh schleï as aght‐allys deiney.

³⁰ As er earishyn y vee‐hushtey oc, cha ghow Jee kerraghey; agh nish t’eh cur sarey da dy chooilley ghooinney er feai ny cruinney arrys y ghoaill:

³¹ Er‐yn‐oyr dy vel eh er n’oardaghey laa ry‐hoi yn seihll y vriwnys ayns cairys, liorish y dooinney shen t’eh er phointeil; as jeh shoh t’eh er chur shickyrys da dy chooilley ghooinney, ayns dy vel eh er hroggal eshyn veih ny merriu.

³² As tra cheayll ad jeh irree‐seose‐reesht ny merriu ren paart gannidys: as dooyrt cooid elley jeu, Ver mayd clashtyn dhyt keayrt ennagh elley mychione y chooish shoh.

³³ Myr shen jimmee Paul veih nyn mast’ oc.

³⁴ Ny‐yeih ren shiartanse dy gheiney lhiantyn huggey, as credjal: jeu shoh va Dionysius yn Areopagite, as ben va enmyssit Damaris, as feallagh elley maroo.