Jannoo 16 - Yn Conaant Noa 1810

CAB. XVI

¹ Eisht haink eh gys Derbe as Lystra: as cur‐my‐ner, va dooinney dy row jeh’n chredjue ayns shen, va enmyssit Timothy, mac ben dy row v’er ve ny Hew, as ren chyndaa gys y chredjue; agh va’n Ayr echey ny Ashoonagh:

² Va goo‐mie ec Timothy shoh veih ny braaraghyn va ec Lystra as Iconium.

³ As eshyn baillish Paul dy gholl magh marish, as ghow eh as ren eh eh y ghiarey‐chymmylt, kyndagh rish ny Hewnyn v’ayns ny ardjyn shen: son va fys oc ooilley dy row e ayr ny Ashoonagh.

⁴ As myr v’ad goll trooid ny ard‐valjyn, livrey ad daue ny oardaghyn dy reayll, va sarit liorish ny ostyllyn as y chanstyr va ec Jerusalem.

⁵ As shen myr va ny kialteenyn er nyn niartaghey ayns y chredjue, as er nyn mishaghey ayns earroo gagh laa.

⁶ Nish tra v’ad er gholl trooid Phrygia, as cheer Ghalatia, v’ad er nyn lhiettal liorish y Spyrryd Noo dy phreacheil y goo ayns Asia,

⁷ As erreish daue v’er jeet gys Mysia, chiare ad dy gholl er nyn doshiaght gys Bithynia: agh cha lhig y Spyrryd daue.

⁸ Myr shen hie ad shaghey Mysia, as haink ad neose gys Troas.

⁹ As honnick Paul ashlish ayns yn oie; Hass dooinney jeh Macedonia liorish, as ghuee eh er, gra, Tar noon gys Macedonia, as coon lhien.

¹⁰ As erreish da v’er vakin yn ashlish, ghow shin ayns laue dy gholl jeeragh gys Macedonia, toiggal son shickyrys dy row yn Chiarn er n’eamagh orrin dy phreacheil y sushtal daue.

¹¹ Shen‐y‐fa ghow shin lhuing‐as veih Troas, as haink shin lesh coorse jeeragh gys Samothracia, as yn nah laa gys Neapolis;

¹² As veih shen gys Philippi, yn reih ard‐valley v’ayns yn ayrn shen jeh Macedonia, as bentyn gys y Raue: as duirree shin ayns yn ard‐valley shen shiartanse dy laghyn.

¹³ As er laa yn doonaght hie shin magh ass y valley, gys boayl va lowit son padjer, rish oirr ny hawin; as hoie shin sheese, as loayr shin rish ny mraane v’er nyn jaglym cooidjagh.

¹⁴ As va ben dy row va enmyssit Lydia, jeh ard‐valley Thyatira, as dellal ayns purple v’ee shoh cur ooashley da Jee, as deaisht ee rooin: as doshil yn Chiarn y cree eck, dy choyrt geill da ny goan va Paul dy loayrt.

¹⁵ As tra v’ee hene as lught e thie er nyn mashtey, ghuee ee orrin, gra, My ta shiu er vriwnys mish dy ve firrinagh gys y Chiarn, tar‐jee stiagh gys my hie, as gow‐jee aaght mârym. As cha goghe ee obbal voïn.

¹⁶ As haink eh gy‐kione, myr va shin er y raad goll gys padjer, dy daink ben aeg dy row nyn guail, ayn‐jee va spyrryd faishnee, as v’ee tayrn ymmodee cosney da ny maishteryn eck, liorish e hobbeeys.

¹⁷ Deiyr ee shoh er Paul as orrinyn, gyllagh as gra, Ny deiney shoh sharvaantyn y Jee smoo ard, ta soilshaghey dooin raad y taualtys.

¹⁸ As shoh ren ee ry ymmodee laghyn. Agh Paul seaghnit ec shoh, hyndaa eh, as dooyrt eh rish y spyrryd, Ta mee dy dty harey ayns ennym Yeesey Creest oo dy heet magh ass‐jee. As haink eh magh yn oor cheddin.

¹⁹ As tra honnick ny mainshteryn eck dy row ooilley jerkal nyn gosney ec kione, haare ad Paul as Silas, as hayrn ad ad gys y whuaiyl, fenish fir‐reill yn ard‐valley,

²⁰ Eisht hug ad lhieu ad gys ny fir‐reill, gra, Ta ny deiney shoh er ghoostey ymmodee anvea ayns yn ard‐valley ain, liorish dy nee Hewnyn ad,

²¹ As dy vel ad gynsaghey cliaghtaghyn nagh vel lowal dooinyn, ta fo reill yn Raue, dy ghoaill orrin ny dy reayll.

²² As dirree yn pobble magh nyn ’oï: as raip ny fir‐reill nyn eaddagh jeu, as doardee ad ad dy ve scuitchit.

²³ As tra v’ad er woalley ad dy dewil, hilg ad ad ayns pryssoon, as doardee ad yn wardoor dy reayll ad dy sauchey.

²⁴ As myr va lheid y currym chion currit er, hilg eh ad ayns y phryssoon b’odjey stiagh, as ren eh ny cassyn oc shickyr ayns ny stockyn.

²⁵ Agh ec main‐oie ghow Paul as Silas padjer as arraneyn‐moyllee gys Jee: as cheayll ny pryssoonee ad.

²⁶ As ayns y tullogh va craa mooar thallooin ayn, myr shen dy row undinyn y phryssoon er nyn graa: as chelleeragh va ooilley ny dorryssyn er nyn vosley, as geulaghyn dy chooilley unnane er nyn veaysley.

²⁷ As ghooisht arreyder y phryssoon ass e chadley, as tra honnick eh dorryssyn y phryssoon foshlit, hayrn eh e chliwe, as baillish v’er varroo eh hene, goaill ayns laue dy row ny pryssonee er chosney roue.

²⁸ Agh deïe Paul lesh ard‐choraa, gra, Ny jean aggair erbee dhyt hene; son ta shin ooilley ayns shoh.

²⁹ Eisht deïe eh son soilshey, as lheim eh stiagh, as huitt eh sheese er‐creau kiongoyrt rish Paul as Silas;

³⁰ As hug eh lesh ad magh, as dooyrt eh, Gheiney vie, cre t’orrym dy yannoo dy chosney saualtys?

³¹ As dooyrt ad, Jean credjal ayns y Chiarn Yeesey Creest, as bee oo hene as dty hie er nyn sauail.

³² As loayr ad goo yn Chiarn rishyn, as rish ooilley e hie.

³³ As ghow eh ad yn oor cheddin jeh’n oie, as niee eh ny lhottyn oc; as v’eh hene as ooilley lught e hie er nyn mashtey chelleeragh.

³⁴ As tra v’eh er chur lesh ad stiagh ayns e hie, hoie eh bee rhymboo, as ghow eh hene as ooilley e hie boggey, as chred ad ayns Jee.

³⁵ As tra va’n laa rish, hug ny fir‐reill fys lesh ny sidooryn, gra, Lhig ny deiney shen magh.

³⁶ As dinsh arreyder yn phryssoon yn ordyr shoh da Paul, Ta ny fir‐reill er chur fys dy lhiggey yn raad diu: gow‐jee nish er‐y‐fa shen magh, as immee‐jee reue ayns shee.

³⁷ Agh dooyrt Paul roo, T’ad er nyn mwoalley dy foshlit ga dy nee Romanee shin, as neu‐chyndagh, as er hilgey shin ayns pryssoon; as vel ad nish dyn eiyrt shin magh dy follit? shen red nagh jean; agh lhig daue hene cheet as shin y chur lhieu magh.

³⁸ As dinsh ny sidooryn shoh da ny fir‐reill: as va aggle orroo tra cheayll ad dy nee gys ream y Raue v’ad bentyn.

³⁹ Eisht haink ad as ghuee ad orroo, as hug ad lhieu magh ad, guee orroo dy gholl roue ass yn ard‐valley.

⁴⁰ As tra v’adsyn er jeet ass y phryssoon, hie ad stiagh ayns thie Lydia: as erreish daue v’er vakin ny braaraghyn, ren ad y gherjaghey ad, as jimmee ad rhymboo.