Jannoo 14 - Yn Conaant Noa 1810

CAB. XIV

¹ As haink eh gy‐kione ayns Iconium, dy jagh ad ny neesht cooidjagh stiagh ayns synagogue ny Hewnyn, as dy loayr ad myr shen dy ren earroo mooar chammah jeh ny Hewnyn as ny Ashoonee credjal.

² Agh ghreinnee ny Hewnyn mee‐chredjuagh ny Ashoonee, as physhoon ad ny aignaghyn oc noi ny braaraghyn.

³ Ry‐foddey dy earish er‐y‐fa shen duirree ad ayns shen loayrt dy dunnal ayns y Chiarn, ren feanish y ymmyrkey gys goo e ghrayse hene, coyrt daue pooar cowraghyn as yindyssyn dy ve jeant liorish ny laueyn oc.

⁴ Agh va sleih yn ard‐valley noi‐ry‐hoi: as va ayrn jeu goaill paart ny Hewnyn, as ayrn echey paart ny hostyllyn.

⁵ As tra va irree‐magh er ny yannoo chammah jeh ny Ashoonee, as myrgeddin ny Hewnyn marish ny fir‐reill oc, er‐chee drogh‐ghellal y chur daue, as nyn glaghey ad,

⁶ Hooar adsyn fys er, as chossyn ad roue gys Lystra as Derbe, ard‐valjyn dy Lycaonia, as gys y cheer mygeayrt:

⁷ As ayns shen ren ad preacheil y sushtal.

⁸ As va ny hoie ec Lystra dooinney dy row va er choayl lheihll e choshey, va ny baccagh veih breïn e vayrey, as nagh ren rieau shooyl.

⁹ Cheayll eh shoh Paul loayrt; as yeeagh Paul dy gyere er, as cur‐my‐ner dy row credjue echey dy ve er ny lheihys,

¹⁰ Dooyrt eh lesh ard‐choraa, Shass seose dy jeeragh er dty chassyn. As lheim eh, as huill eh.

¹¹ As tra honnick y pobble cre va Paul er n’yannoo, hrog ad seose ny goraaghyn, gra ayns glare Lycaonia, Ta ny Jeeghyn er jeet neose hooin ayns cummey deiney.

¹² As denmys ad Barnabas Jupiter, as Paul Mercury, er‐y‐fa dy nee eh eshyn va dy floaoil soiaghey magh yn goo.

¹³ Eisht hug saggyrt Jupiter, va cheu‐mooie, jeh’n aid‐valley, lesh dew as attaghyn‐blaa gys ny giattyn, as baillish v’er hebbal oural marish y pobble.

¹⁴ Agh tra cheayll ny ostyllyn Barnabas as Paul jeh, raip ad nyn eaddagh, as roie ad stiagh mastey yn pobble, geamagh,

¹⁵ As gra, Gheiney, cre’n‐fa ta shiu jannoo ny reddyn shoh? Cha vel shinyn agh deiney jeh ny annooinidyn cheddin riu hene, as ta shin preacheil diu shiu dy hyndaa veih ny fardailyssyn shoh gys y Jee bio, chroo niau as thalloo, as y faarkey as dy chooilley nhee t’ayndoo:

¹⁶ As ayns ny earishyn t’er n’gholl shaghey, lhig da ooilley ny Ashoonee shooyl ayns nyn raaidyn hene.

¹⁷ Ny‐yeih cha daag eh eh‐hene fegooish feanish, ayns dy ren eh mie, as dy dug eh dooin fliaghey veih niau, as imbaghyn messoil, lhieeney ny creeaghyn ain lesh beaghey as gennallys.

¹⁸ As lesh ny goan shoh, s’coan ren ad y pobble y lhiettal veih oural y hebbal daue.

¹⁹ As haink shiartanse dy Hewnyn veih Antioch as Iconium, as chleaynee ad y pobble, as ren ad Paul y chlaghey as y hayrn magh ass yn ard‐valley, sheiltyn dy row eh marroo.

²⁰ Ny‐yeih myr va ny Creesteenyn nyn shassoo mygeayrt‐y‐mysh, dirree eh seose as haink eh stiagh ayns yn ard‐valley: as yn nah laa hie eh marish Barnabas gys Derbe.

²¹ As tra v’ad er phreacheil y sushtal gys yn ard‐valley shen, as er n’ynsaghey ymmodee, haink ad reesht gys Lystra, as gys Iconium as Antioch,

²² Niartaghey anmeenyn ny Creesteenyn, as coyrlaghey ad dy hannaghtyn ayns y chredjue, as dy nhegin dooin trooid ymmodee seaghyn goll stiagh ayns reeriaght Yee.

²³ As tra v’ad er n’oardaghey shirveishee ayns ooilley ny kialteenyn, as er ghoaill padjer lesh trostey, ren ad y hymney ad gys y Chiarn, ayn v’ad er chredjal.

²⁴ As tra v’ad er gholl harrish ooilley Psidia, haink ad gys Pamphylia.

²⁵ As erreish daue v’er phreacheil y goo ayns Perga, hie ad sheese gys Attalia.

²⁶ As veih shen ghow ad lhuingys gys Antioch, voish v’ad er ve chymnit gys grayse Yee, son yn obbyr v’ad dy chooilleeney.

²⁷ As tra v’ad er jeet, as er n’eamagh er yn agglish cooidjagh, hug ad coontey daue jeh ooilley ny va Jee er n’yannoo roo, as kys v’eh er vosley dorrys y chredjue da ny Ashoonee.

²⁸ As duirree ad ry‐foddey dy earish ayns shen, marish ny Creesteenyn.