Jannoo 10 - Yn Conaant Noa 1810

CAB. X

¹ Va dooinney dy row ayns Cesarea, enmyssit Cornelius, va ny centurion er y cheshaght va enmyssit yn cheshaght Italian;

² Dooinney crauee, as beaghey ayns aggle Yee, eh hene as ooilley e hie, as v’eh cur mooarane jeirk da’n pobble, as dy mennick ayns padjer gys Jee.

³ Honnick eh shoh ayns ashlish dy baghtal, mysh yn nuyoo oor jeh’n laa, ainle dy Yee cheet stiagh huggey, as gra rish, Cornelius.

⁴ As tra yeeagh eh lesh, va aggle er, as dooyrt eh, Hiarn, cre shoh? As dooyrt eh rish, Ta dty phadjeryn as dty ghiastyllys er jeet seose son imraa kiongoyrt rish Jee.

⁵ As nish chur chaghteryn gys Joppa, as cur fys er Simon ta sliennooit Peddyr:

⁶ T’eh goaill aaght marish Simon yn tanner, ta’n thie echey rish oirr ny marrey: inshee eshyn dhyt cre ta ort dy yannoo.

⁷ As tra v’an ainle loayr rish Cornelius er gholl roish, deïe eh er jees jeh ny fir‐vooinjerey echey as er sidoor crauee jeusyn va dy kinjagh mygeayrt‐y‐mysh:

⁸ As tra v’eh er hoilshaghey dy chooilley nhee jeu shoh daue, hug eh ad gys Joppa.

⁹ Laa ny vairagh myr va’d goll er nyn yurnah, as tayrn er‐gerrey da’n ard‐valley, hie Peddyr seose ’syn ard‐shamyr gys padjer, mysh y cheyoo oor.

¹⁰ As daase eh feer accryssagh, as baillish v’er n’ee: agh choud as v’ad gaarlaghey, huitt eh neeal.

¹¹ As honnick eh niau er ny osley, as saagh dy row cheet neose huggey, myr dy beagh eh brelleein vooar, kianlt ec ny kiare binn, as lhiggit sheese er y thalloo:

¹² Ayn va dy chooilley vonney dy veiyn kiare‐chassagh y thallooin, dy veiyn feïe, as cretooryn snauee, as eeanlee yn aer.

¹³ As haink coraa huggey, Irree, Pheddyr; marr, as ee.

¹⁴ Agh dooyrt Peddyr, Shen dy row foddey voym, Hiarn; son cha vel mish rieau er n’ee red erbee cadjin ny neu‐ghlen.

¹⁵ As loayr y coraa rish reesht yn nah cheayrt, Shen ta Jee er ghlenney, ny enmys uss cadjin.

¹⁶ Va shoh jeant three keayrtyn: as va’n saagh goit seose reesht gys niau.

¹⁷ Nish choud as va Peddyr imneagh rish hene, cre va monney yn ashlish v’eh er vakin: cur‐my‐ner va ny chaghteryn haink veih Cornelius er vriaght son thie Simon, as v’ad nyn shassoo ec y ghiat.

¹⁸ As deïe ad, as dênee ad row Simon va sliennooit Peddyr goaill aaght ayns shen.

¹⁹ Choud as va Peddyr smooinaghtyn er yn ashlish, dooyrt y Spyrryd rish, Cur‐my‐ner, ta three deiney briaght er dty hon.

²⁰ Irree er‐y‐fa shen, as immee sheese, as gow mâroo, fegooish mee‐ourys erbee: son ta mish er choyrt ad.

²¹ Eisht hie Peddyr sheese gys ny chaghteryn haink huggey veih Cornelius; as dooyrt eh, Cur‐my‐ner, Mish eh ta shiu dy hirrey: cre’n eilkin t’eu rhym’s dy vel shiu er jeet?

²² As dooyrt adsyn Cornelius yn centurion, dooinney cairagh, as beaghey ayns aggle Yee, as jeh goo mie mastey slane ashoon ny Hewnyn, t’eh er gheddyn raaue veih Jee liorish ainle casherick, dy chur fys ort’s gys e hie, dy eaishtagh rish dty ghoan.

²³ Eisht deïe eh orroo stiagh, as hooar eh aaght daue. As laa ny vairagh jimmee Peddyr mâroo, as hie myrgeddin shiartanse jeh ny braaraghyn mârish veih Joppa.

²⁴ As yn laa er‐giyn haink ad gys Cesarea: as va Cornelius fieau orroo, as v’eh er n’eamagh er e gheiney‐mooinjerey cooidjagh, as e reih caarjyn.

²⁵ As myr va Peddyr cheet stiagh, hie Cornelius ny whuail, as huitt eh sheese ec e chassyn, as hug eh ooashley da.

²⁶ Agh hrog Peddyr eh, gra, Shass seose; ta mish mee hene myrgeddin my ghooinney.

²⁷ As myr v’eh loayrt rish, hie eh stiagh, as hooar eh ymmodee er nyn jaglym cooidjagh.

²⁸ As dooyrt eh roo, ta fys eu dy nee red neu‐lowal eh son dooinney ta ny Hew, dy reayll sheshaght rish, ny dy heet gys unnane erbee jeh ashoon elley: agh ta Jee er hoilshaghey dooys, nagh lhisin jeeaghyn er dooinney erbee dy ve cadjin ny neu‐ghlen.

²⁹ As she shoh va’n oyr dy vel mee er jeet hiu dy arryltagh, cha leah as hug shiu fys orrym: baillym er‐y‐fa shen shiu dy insh dou cre’n oyr hug shiu fys orrym.

³⁰ As dooyrt Cornelius, Kiare laa er‐dy‐henney va mish my hrostey derrey mysh y traa shoh dy laa, as ec yn nuyoo oor ghow mee padjer ayns my hie, as cur‐my‐ner hass dooinney kiongoyrt rhym ayns coamrey sollys,

³¹ As dooyrt eh, Cornelius, ta dty phadjer er ny chlashtyn, as dty yeirk freilt ayns cooinaghtyn fenish Jee.

³² Cur fys er‐y‐fa shen gys Joppa, dy eamagh er Simon ta sliennooit Peddyr; t’eh goaill aaght ayns thie Simon yn tanner, rish oirr ny marrey: as tra hig eh, loayree eh rhyt.

³³ Chelleeragh er‐y‐fa shen hug mee fys ort: as t’ou er n’yannoo dy mie dy vel oo er jeet. Nish er‐y‐fa shen ta shin ooilley ayns shoh kionfenish, kiongoyrt rish Jee, dy chlashtyn dy chooilley nhee ta Jee er n’oardaghey dhyt.

³⁴ Eisht doshil Peddyr e veeal, as dooyrt eh, Ayns firrinys ta mee cur tastey nagh vel Jee soiaghey jeh persoonyn:

³⁵ Agh ayns dy chooilley ashoon, eshyn ta goaill aggle roish, as gobbraghey cairys, ta soiaghey jeant jehsyn liorish.

³⁶ Yn goo hug Jee gys cloan Israel, preacheil shee liorish Yeesey Creest (eshyn y Chiarn ain ooilley)

³⁷ Yn goo shen (ta mee gra) ta fys euish dy row eh er ny hoilshaghey magh trooid ooilley Judea, as dy ghow eh toshiaght veih Galilee, lurg y bashtey ren Ean y phreacheil;

³⁸ Kys dy ren Jee Yeesey dy Nazareth y ooillaghey lesh y Spyrryd Noo, as lesh pooar; eh hie mygeayrt jannoo mie; as slaanaghey ooilley adsyn va seaghnit liorish y drogh‐spyrryd: son va Jee mârish.

³⁹ As ta shinyn nyn veanishyn jeh dy chooilley nhee ren eh chammah ayns cheer ny Hewnyn, as ayns Jerusalem; eshyn hug ad dy baase er billey ny croshey:

⁴⁰ Eshyn ren Jee y hroggal seose yn trass laa, as hoilshee eh dy foshlit eh,

⁴¹ Cha nee da ooilley yn pobble, agh da feanishyn va reiht ro‐laue liorish Jee, dy jarroo dooinyn ren gee as giu mârish, erreish da v’er n’irree veih ny merriu.

⁴² As hug eh sarey dooin dy phreacheil gys y pobble, as dy ymmyrkey feanish dy nee eshyn, liorish oardagh Yee, ta dy ve briw ny bioee as ny merriu.

⁴³ Leshyn ta ooilley ny phadeyryn gymmyrkey feanish, trooid yn ennym echey, quoi‐erbee chred‐jys ayn, dy vow eh feaysley peccaghyn.

⁴⁴ Choud as va Peddyr loayrt ny goan shoh, huitt y Spyrryd Noo orroosyn ooilley va clashtyn y goo.

⁴⁵ As ghow mooinjer yn ghiarey‐chymmylt va er chredjal, yindys mooar, whilleen as haink marish Peddyr, son er ny Ashoonee myrgeddin dy row gioot y Spyrryd Noo er ny gheayrtey magh.

⁴⁶ Son cheayll ad ad loayrt lesh chengaghyn [joarree] as cur ard‐voylley da Jee. Eisht dreggyr Peddyr,

⁴⁷ Vod dooinney erbee ushtey y lhiettal, nagh bee ad shoh er nyn mashtey, ta er gheddyn y Spyrryd Noo, chammah as shinyn?

⁴⁸ As doardee eh ad dy v’er nyn mashtey ayns ennym y Chiarn. Eisht ghuee ad er dy uirriaght shiartanse dy laghyn.