Jannoo 1 - Yn Conaant Noa 1810

CAB. I

¹ Va’n chied lioar ren mee, O Theophilus, mychione ooilley ny ren Yeesey toshiaght chammah dy yannoo as dy ynsaghey.

² Derrey’n laa v’eh er ny ghoaill seose, erreish da, trooid y Spyrryd Noo, v’er chur dagh nhee ayns currym da ny ostyllyn v’eh er reih.

³ Dauesyn myrgeddin hoilshee eh eh‐hene bio lurg e vaase, liorish ymmodee cowraghyn firrinagh, ayns dy row eh er ny akin lioroo da‐eed laa, as dy loayr eh jeh reddyn va bentyn rish, reeriaght Yee.

⁴ As choud as va’d ooilley cooidjagh mârish, doardee eh daue gyn ad dy gholl veih Jerusalem, agh ad dy arkiaght son gialdyn yn Ayrey, yn gialdyn cheddin (as eshyn) ta shiu er chlashtyn voym’s.

⁵ Son ren Ean dy firrinagh bashtey lesh ushtey; agh bee shiuish ayns traa gerrit er nyn mashtey lesh y Spyrryd Noo.

⁶ Choud as v’ad nish cooidjagh, dênee ad jeh, gra, Hiarn jean oo ec y traa shoh soiaghey seose reesht reeriaght Israel?

⁷ As dooyrt eh roo, Cha vel eh bentyn diuish dy hoiggal ny earishyn, ny ny imbaghyn, ta’n Ayr er reayll ayns e phooar hene.

⁸ Agh yiow shiu pooar veih’n Spyrryd Noo hig erriu: as bee shiu nyn veanishyn dooys chammah ayns Jerusalem, as ayns ooilley Judea, as ayns Samaria, as gys ny ardjyn sodjey magh jeh’n theihll.

⁹ As tra v’eh er loayrt ny goan shoh, v’eh er ny hroggal seose voue, choud as v’ad cur‐my‐ner, as ghow bodjal eh ass nyn shilley.

¹⁰ As myr v’ad jeeaghyn dy gyere seose ’syn aer, as eh goll seose; cur‐my‐ner hass daa ghooinney lioroo ayns coamraghyn sollys.

¹¹ Dooyrt myrgeddin, Gheiney Ghalilee, cre’n‐fa ta shiuish nyn shassoo blakey seose syn aer? nee Yeesey shoh t’er ny ghoaill veue gys niau, cheet reesht er yn aght cheddin ta shiu er n’akin eh goll seose gys niau.

¹² Eisht haink ad reesht gys Jerusalem, veih yn cronk va enmyssit Olivet, va veih Jerusalem jurnah laa doonee.

¹³ As tra v’ad er jeet stiagh, hie ad seose er lout, raad duirree Peddyr as Jamys, as Ean as Andreays, Philip as Thomase, Parlane as Mian, Jamys mac Alpheus, as Simon Zelotes, as Judas braar Yamys.

¹⁴ Chum ad shoh ooilley dy cheilley lesh un aigney ayns padjer as aghin, marish ny mraane, as Moirrey moir Yeesey, as e vraaraghyn.

¹⁵ As ayns ny laghyn shen hass Peddyr seose mastey fir‐eiyrtee [Yeesey] as dooyrt eh (va earroo ny henmyn cooidjagh mysh shey‐feed)

¹⁶ Gheiney as vraaraghyn, beign da’n scriptyr shoh ve cooilleenit, ren y Spyrryd Noo phadeyrys liorish beeal Ghavid mychione Yuaase, va ny leeideilagh dauesyn ghow Yeesey.

¹⁷ Son v’eh er ny earroo mârin, as er ghoaill ayrn jeh’n chirveish shoh.

¹⁸ Nish ren y dooinney shoh magher y chionnaghey lesh y leagh dy vee‐chairys; as tuittym gour e vullee, skeilt eh veih‐my‐cheilley ayns y vean, as roie ooilley e vyn‐nagh ass.

¹⁹ As va shoh er‐fys da ooilley cummaltee Yerusalem; ayns wheesh as dy vel y magher shen enmyssit ayns y ghlare ocsyn, Aceldama, ta shen dy ghra, Yn magher foalley.

²⁰ Son te scruit ayns lioar ny psalmyn, Lhig da’n ynnyd‐vaghee echey ve follym‐faase, as ny lhig da dooinney erbee cummal ayn: as, Yn aspickys echey lhig da fer elley y ghoaill.

²¹ Shen‐y‐fa jeh ny deiney shoh t’er ve ayns y cheshaght ain, oilley yn traa va’n Chiarn Yeesey goll stiagh as magh nyn mast’ ain,

²² Goaill toshiaght veih bashtey Ean derrey’n laa v’eh er ny ghoaill seose voïn, shegin da fer ve ny eanish mârin jeh’n irree‐seose‐reesht echey.

²³ As ren ad jees y phointeil, Joseph va enmyssit Barsabas, va sliennooit Justus, as Matthias.

²⁴ As ghow ad padjer, as dooyrt ad, Uss, Hiarn, ayd ta fys cre t’ayns cree dy chooilley ghooinney, soilshee quoi jeh’n jees shoh t’ou er reih.

²⁵ Dy ghoaill ayrn jeh’n chirveish as yn ostyllys shoh, veih ta Yuaase liorish e pheccah er duittym, as er n’gholl gys e ynnyd hene.

²⁶ As hug ad magh nyn lottyn; as huitt y lot er Matthias, as v’eh er ny earroo marish yn un ostyl yeig.