Hebrewnee 9 - Yn Conaant Noa 1810

CAB. IX

¹ Va eisht dy jarroo fo’n chied chonaant myrgeddin oardaghyn dy hirveish casherick, as cabbane‐agglish seihlltagh.

² Son va cabbane‐agglish soit magh, ayns y chied ayrn jeh va’n cainleyr, as y boayrd, as yn arran‐casherick; ta shoh enmyssit yn ynnyd‐casherick.

³ As cooyl y churtan ’syn nah ayrn, yn cabbane‐agglish ta enmyssit yn ynnyd smoo casherick:

⁴ Ayn va’n censer airhey, as arg y chonaant coodit er dy chooilley heu lesh airh, ayn va’n saagh airh, ayn va manna, as lorg Aaron ren blaaghey, as buird y chonaant;

⁵ As er‐y‐skyn ny cherubim dy ghloyr scaaghey yn stoyl‐myghin: mychione oc cha vod mayd nish coyrt slane coontey.

⁶ Nish tra va ny reddyn shoh soit magh er yn aght shoh, hie ny saggyrtyn gagh laa stiagh ayns y chied ayrn jeh’n cabbane‐agglish, cooilleeney shirveish Yee:

⁷ Agh stiagh ayns yn nah ayrn hie yn ard‐saggyrt ny lomarcan keayrt ’sy vlein, cha nee fegooish fuill, ren eh chebbal er e hon hene, as son shaghrynys y phobble.

⁸ Yn Spyrryd Noo cowraghey liorish shoh, nagh row yn raad stiagh gys yn ynnyd smoo casherick foast jeant foshlit, choud as va’n chied chabbane‐agglish foast ny hassoo:

⁹ Va shoh cowrey son y traa shen, ayn v’er ny hebbal chammah giootyn as ourallyn, nagh voddagh eshyn ren y chirveish y heyrey, myr bentyn rish y chooinsheanse.

¹⁰ Yn chirveish cheddin va shassoo ny lomarcan ayns bee as jough, as ymmodee oonlaghyn as oardaghyn foalley, kianlt orroo derrey imbagh yn stayd noa.

¹¹ Agh ta Creest er jeet dy ve ny ard‐saggyrt jeh reddyn mie ry‐heet, liorish cabbane‐agglish smoo as s’fondee, cha nee jeant lesh laueyn, ta shen dy ghra, cha nee jeh’n troggal shoh;

¹² Chamoo liorish fuill goair as lheiyee, agh liorish yn uill echey hene, hie eh stiagh un cheayrt son ooilley ayns yn ynnyd casherick, lurg da v’er chosney feaysley braa er nyn son.

¹³ Son my ta fuill terriu as goair, as leoie colbagh spreït er y vooinjer neu‐ghlen, chasherickey gys glenney yn eill;

¹⁴ Cre‐woad smoo nee fuill Chreest, ren eh hene y oural gyn foill gys Jee trooid y Spyrryd dy bragh beayn, yn chooinsheanse euish y ghlenney veih obbraghyn marroo dy hirveish y Jee bio?

¹⁵ As son yn oyr shoh she eshyn ta eddyr shin as Jee fo’n conaant noa, myr shen liorish fuilliaghtyn baase dy yannoo lhiassaghey son ny peccaghyn va fo’n chied chonaant, dy voddagh adsyn t’er nyn eam geddyn yn gialdynys jeh eiraght dy bragh farraghtyn.

¹⁶ Son raad ta chymney, te ymmyrchagh neesht dy bee baase yn fer ren y chymney er ny yannoo mie:

¹⁷ Son ta chymmey goaill ynnyd lurg da sleih ve marroo; er aght elley cha vel eh jeh veg y vree choud as ta’n chymneyder bio.

¹⁸ Er‐yn oyr cheddin neesht, cha row yn chied chonaant er ny chasherickey fegooish fuill:

¹⁹ Son erreish da Moses v’er hoilshaghey magh dagh sarey da ooilley’n pobble cordail rish y leigh, ghow eh fuill lheiyee as goair, marish ushtey, as ollan gorrym jiarg, as hyssop, as spreih eh chammah er y lioar as ooilley’n pobble, gra,

²⁰ Shoh fuill y chonaant ta Jee er harey diu.

²¹ Eisht spreih eh myrgeddin lesh fuill chammah yn cabbane‐agglish, as ooilley siyn y chirveish.

²² As cordail rish y leigh ta dy chooilley red son y chooid smoo er ny ghlenney lesh fuill; as fegooish deayrtey‐foalley cha vel veg y leih [son peccah.]

²³ Ve ymmyrchagh er‐y‐fa shen dy beagh ny sampleyryn dy reddyn ayns ny niaughyn er ny ghlenney lhieu shoh; agh ny reddyn flaunyssagh hene lesh ourallyn share na ad shoh.

²⁴ Son cha vel Creest er n’gholl stiagh ayns ny ynnydyn casherick jeant lesh laueyn, ta co‐chaslyslyn jeh’n ynnyd firrinagh; agh ayns niau hene, nish dy hassoo ayns fenish Yee er nyn son:

²⁵ Cha nee dy hebbal eh hene dy mennick, myr ta’n ard‐saggyrt goll stiagh ayns yn ynnyd casherick dy chooilley vlein lesh fuill cretooryn elley:

²⁶ (Son eisht beign da v’er hurranse dy mennick er‐dy hoshiaght y theihll) agh nish un cheayrt son ooilley ayns ny eashyn s’jerree, t’eh er hoilshaghey eh hene dy chur ersooyl peccah liorish jannoo eh hene ny oural.

²⁷ As ’naght myr te er ny phointeil da deiney dy gheddyn baase un cheayrt, agh lurg shoh yn vriwnys:

²⁸ Myr shen va Creest un cheayrt er ny hebbal dy ymmyrkey peccaghyn ymmodee; as dauesyn ta jeeaghyn er e hon, nee eh soilshaghey eh hene yn nah cheayrt fegooish peccah gys saualtys.