Hebrewnee 7 - Yn Conaant Noa 1810

CAB. VII

¹ Son y Melchisedec shoh ree Salem, saggyrt yn Jee smoo syrjey, hie quaïl Abraham myr v’eh er y raad veih stroie ny reeaghyn, as vannee eh:

² Da myrgeddin hug Abraham yn jaghee jeh ooilley ny v’echey: va hoshiaght ayns y ghlare ainyn ree yn chairys, as lurg shen myrgeddin, ree Salem, ta shen, ree yn chee;

³ Gyn ayr, gyn moir, gyn kynney, nagh row echey edyr toshiaght laghyn, ny jerrey bea; agh jeant casley rish Mac Yee, t’eh tannaghtyn ny haggyrt kinjagh [son dy bragh].

⁴ Nish smooinee‐jee cre cha ooasle va’n dooinney shoh, da hug yn shenn‐ayr Abraham hene yn jaghee jeh’n spooilley.

⁵ As dy firrinagh ta sarey ec mec Levi, t’ayns oik y taggyrtys, dy ghoaill jaghee jeh’n pobble cordail rish y leigh, ta shen, jeh nyn mraaraghyn, ga dy daink ad magh ass meeghyn Abraham:

⁶ Agh eshyn nagh row yn kynney echey coontit vouesyn, ghow eh jaghee veih Abraham, as vannee eh eshyn da va ny gialdynyn jeant.

⁷ As gyn dooyt, ta’n fer s’inshilley er ny vannaghey liorish y fer syrjey.

⁸ As ayns shoh ta deiney giare‐heihllagh goaill jagheenyn: agh ayns shen t’eshyn geddyn ad da ta feanish er ny ymmyrkey dy vel eh bio.

⁹ As myr oddym gra, ren Levi hene va goaill jagheenyn, jaghee y eeck ayns Abraham.

¹⁰ Son v’eh foast ayns meeghyn e ayrey, tra hie Melchisedec ny whaïl.

¹¹ Dy beagh er‐y‐fa shen slane seyrsnys [veih peccah] fo saggyrtys kynney Levi, (son fo shen hooar y pobble y leigh) cre’n feme sodjey va son saggyrt elley dy irree lheid as va Melchisedec, as dyn eh ve enmyssit saggyrt lheid as va Aaron?

¹² Son myr va’n saggyrtys er ny chaghlaa, te ymmyrchagh caghlaa ve jeant ayns y leigh myrgeddin.

¹³ Son t’eshyn my‐e‐chione ta ny reddyn shoh loayrit, bentyn rish sheeloghe elley, jeh cha ren dooinney erbee shirveish ec yn altar.

¹⁴ Son te feer chronnal dy daink nyn Jiarn magh ass sheeloghe Yudah; jeh’n cheeloghe shen cha loayr Moses veg mychione y taggyrtys.

¹⁵ As te foddey s’cronnal: dy vel saggyrt elley troggal agh lurg caslys Melchisedec,

¹⁶ Ta er ny oardaghey, cha nee lurg leigh sarey foalley, agh lurg pooar bea gyn jerrey.

¹⁷ Son t’eh gymmyrkey feanish, T’ou dty haggyrt son dy bragh myr va Melchisedec.

¹⁸ Son ta’n sarey va roïe er ny choyrt dy lhiattee, son dy row eh dyn vree as neu‐fondagh.

¹⁹ Son cha ren y leigh nhee erbee slane ynrick, agh ve fosley raad gys treishteil share; liorish ta shin tayrn er‐gerrey gys Jee.

²⁰ As ayns wheesh as nagh row eh er ny oardaghey ny haggyrt fegooish breearrey.

²¹ (Son va ny saggyrtyn shen jeant fegooish breearrey: agh eh shoh lesh breearrey, liorishyn dooyrt rish, Ta’n Chiarn er vreearrey, as cha gow eh arrys, T’ou uss dty haggyrt son dy bragh myr va Melchisedec.)

²² Wheesh shen smoo va Yeesey jeant ny raane jeh conaant share.

²³ As v’adsyn dy jarroo ymmodee saggyrtyn, er‐yn‐oyr nagh row ad dy hannaghtyn foddey kyndagh rish baase:

²⁴ Agh ta ec y dooinney shoh er‐yn‐oyr dy vel eh tannaghtyn dy bragh, saggyrtys gyn caghlaa.

²⁵ Shen‐y‐fa t’eh pooaral myrgeddin dy hauail gys y chooid sodjey adsyn ta cheet gys Jee liorishyn, fakin dy vel eh dy bragh bio dy yannoo stiagh [rish Jee] er nyn son.

²⁶ Son va lheid yn ard‐saggyrt shoh cooie er nyn son, ta casherick, gyn loght, glen, scarrit voish peccee, as jeant ny syrjey na ny niaughyn;

²⁷ Echey nagh vel feme gagh‐laa, myr t’ec ny ard‐saggyrtyn shen, dy hebbal oural, hoshiaght son e pheccaghyn hene, as eisht son peccaghyn y phobble: son shoh ren eh un cheayrt, tra heb eh seose eh hene.

²⁸ Son ta’n leigh, jannoo ard‐saggyrtyn jeh deiney giare‐heihllagh; agh ta’n goo dy vreearrey va er‐dyn leigh, jannoo yn Mac [ny ard‐saggyrt] ta er ny chasherickey son dy bragh.